Algemeen Dagblad a pone un relato djaki te aya riba su portada tokante agreshon kresiente den avion. Personal di kompanianan di aviashon hulandes manera KLM, Transavia i ArkeFly ta haña nan mas i mas ku pasahero molestoso ku ta intimidá i menasá nan na bordo. Pa dia sa surgi un promedio di kuater insidente riba buelonan hulandes.

E aña akí so kaba mester a entregá ocho pasahero na mareshosei pa motibu di malkomportashon, loke ta mes tantu ku persona ku den henter 2011. Presidente di sindikato di personal di kabina ta boga pa no laga hende agresivo barka avion. Fe na airopuerto por konta ku un persona lo komportá malu, or'e ta stòmburachi por ehèmpel. Djis ninga nan entrada, kla, segun presidente dje sindikato pa personal di kabina.

Mas notisia di aviashon den e matutinonan djawe. Ayera e Airbus mas grandi na mundu, esta A380, a efektuá su promé aterisahe ofishal na Schiphol. Un periodista di De Volkskrant tabata na bordo. E avion ku ta pertenesé n'e flota aéreo di Emirates ta bula di Dubai pa Amsterdam visevèrsa anto e tin tres piso. Esun mas abou ta pa sinta. E segundo piso tin un bar di bèrdè mes anto te ariba parse un krusero ku sine, sala pa hasi ehersisio, kabina pa ducha i asta un spa. Un pasahero komun ku stul den economy class ta paga 800 euro pa pasashi, mientras ku esnan di first class ta paga te 5000 euro. Awèl p'e montante ei un perfume den bòter chikí di diseño modèrnu no ta dje shik ei mas.

Trouw ta informá ku e promé gabinete outónomo di Kòrsou ta yegando su fin. Vários polítiko a hala atras pasó nan no ta dispuesto na respaldá gobièrnu kurasoleño mas. Asin'ei e partidonan di koalishon a sobra 9 so di e 21 asientonan den Staten, un minoria pues. E korant ta skibi ku n'e isla ta asumí ku un dje dianan akí minister presidènt Schotte lo ofresé su retiru. Ekspertonan ta boga p'un gabinete di perito, pa asina no tin mester di tene elekshon atrobe.

Den NRC.NEXT a sali un relato impreshonante di Joeri Boom, koresponsal na India. E siman akí kasi 600 mion di hende a keda sin koriente. Ta te ora a yam'é for di Hulanda numa el a sa ku e fayo di koriente tabata notisia mundial. E kos ta ku aya koriente ta bai asina tantu be ku e no ta straña niun hende mas. Hopi biá magnitut djun fayo asina no ta konosí tampoko. Tabata fèrfelu wèl, pero bida a sigui gewon sin koriente. Snèiru o sea sastre ta uza mashin di kose ku pedal, esnan di ántes di manda ku pia. Anto ora ku empresa mekániko no pòmp awa di estado mas, trùk ku tank'i awa ta subi kaminda, kore rònt pa abastesé e kliente.

Horor na Voorburg, pegá ku Den Haag. Aya empleadonan di truk'i shushi a bai haña kurpa sin bida meimei di shushi grandi. Den Algemeen Dagblad a sali potrèt dje arestonan ku a sigui despues. Por mira polis bai ku seis hòmber di bui ku parse asiátiko. E kurpa a dal abou ora ku e kuedónan di shushi a hisa un kashi. Dos sak'i desperdisio pegá na otro ku teip kòrá a lora kai for di dje. Por a mira e kurpa atraves dje skernan den e sak'i plèstik. Opviamente e persona a muri basta ten pasá. Identidat dje víktima no ta konosí ainda.

Badr Hari, un kickboxer destaká di desendensha marokanu a atmití di a gòlpia un komersiante na Sensation White, un evento ku músika Dance ku ta tene tur aña na Hulanda. E notisia a sali grandi grandi riba portada di De Telegraaf. Promé Hari a desmentí di tabata involukrá den e pelea, es mas, el a bisa ku e no a mira nèt nada, loke ta notabel, pasó e komersiante k'a keda gravemente heridá a deklará bon kla ku Hari a bati'é.

E korant ta bisa ku awor e bringadó a hala su deklarashon anterior aden. Supuestamente el a dal e víktima un be so, anto ku algun otro hende a sigui bati e komersiante. Polis a sera un persona mas sospechá dje maltrato.

Hòspitalnan hulandes ta bai traha ku'n remedi nobo prometedó kontra kanser di pechu ku no ta reakshoná riba hormona. Outoridat oropeo di medikamentu a aprobá e remedi. Muhénan ku metástasis di kanser di pechu por biba mas largu sin ku e enfermedat sigui plama, asina ta pará den De Telegraaf. Na momento ku e remedi akí no tin efekto, e or'ei numa ta pasa pa kimoterapia, un tratamentu muchu mas drástiko.

Nederlands Dagblad ta informá ku Vierstroom, un organisashon di kuido médiko na Gouda, ta bai obligá famia di habitantenan demente di dos sentro di kuido pa koperá n'e institutonan ei. Aki poko ten famia mester ta kuater ora pa luna disponibel pa kumpli ku tareanan na bienestar dje habitantenan. Direktor Jeroen van den Oever ta kere ku esaki ta nesesario pa tene kalidat di kuido na nivel haltu.