Algemeen Dagblad a tir'un bista den mundu di Jetro Willems. E hóben hungadó di bala di 18 añ' tabata rayo di speransa, pa no bisa lus den skuridat total di selekshon oraño, 'un banderin rib'un barku k'a hasi un mal papel', asina e matutino ta bisa di e leftback kurasoleño. Den e weganan pa Kampeonato di Futbol pa Kopa Oropa el a aktua impetuosamente i el a kometé e tipo di fayonan ku ta nòrmal pa su edat, pero esei sí: sin ningun temor ni inhibishon.

Te ainda periodistanan ta proteh'é, pasó nan no ta menshoná sierto kos k'el a yega di bisa. Ma tin momento k'e ta dal poko komentario genial mané: "Mi ta biba mi soño i mi ta spera ku mi no ta spièrta nunka mas." Willems ta e úniko dje grupo ku a regresá for di EK ku'n bunita relato. Na Kòrsou e ta un modelo ehemplar pa hubentut, asina Algemeen Dagblad a bin komprondé di Radio Kòrsou. Pero e matutino a skibi Radio Curaçao...

De Telegraaf ta spièrta vakashonistanan p'e violensha na República Dominicana. Ministerio di Asuntunan Eksterior a agudisá konseho di biahe konsiderablemente. De Telegraaf ta kere ku e informenan ku e mes a saka resientemente, ta motibu pa e medida akí. Siman pasá e matutino a raportá ku a atraká un famia hulandes i ku a mata un muhé makamba.

Ta rekomendá biaheronan pa no sali for di terenu dje parkenan di rekreo. Tambe ta urgi nan pa paga bon tinu i tene kuidou mas tantu ku nunka despues ku solo baha, ora nan ta koriendo rib'e kareteranan ku ta konektá e diferente siudatnan na San Dumingu. Kétubai e destinashon karibense ta mashá popular bou di vakashonistanan hulandes. Aña pasá 45.000 turista makamba a bai ku fakansi n'e pais karibense.

Mester investigá e violensha hulandes na Indonesia di 1945 te 1949 tur di nobo i djun forma mas kompleto, ta titular k'a sali den De Volkskrant. Tres instituto sientífiko di renombre a pidi gobièrnu hulandes pa bolbe investigá intervenshon militar di Hulanda n'e kolonia di ántes. Esei ta nesesario pa por komprondé e tipo di guera ku a hiba ayá i e pakiko dje krueldatnan ku kometé e tempu ei.

Fin di aña pasá, kasi 70 aña despues, Hulanda a pidi despensa anto wes a dikta ku mester paga indemnisashon p'e masakre ku e kometé na Rawagede, un pueblesitu yavano. Algun siman pasá a entregá kleim di daño i perhuisio p'e echo ku a violá regla di guera na Zùit-Celebes, ku awendia yama Sulawesi.

Trouw a dediká atenshon n'e kumbre di nashonnan na Rio de Janeiro. Sentenares di grupo sosial ta topa otro den un parke kant'i playa pa papia di un mundu ku produkto mas durabel. Na mes momentu Rio-plus-20, e kumbre di Nashonnan Uní tokante durabilidat, ta reuní den sala di kongreso. Organisadornan dje kumbre di nashonnan, entre nan e organisashon pa desaroyo Oxfam Novib, ta haña ku n'e otro kumbre ta papia muchu riba ekonomia. Asin'ei no ta solushoná e problema di hamber, ni asuntunan sosial i ambiental.

Trouw ta skibi mas aleu ku presidente brazilero Dilma Rousseff, anfitriona dje kumbre di Nashonnan Uní enkuanto durabilidat no ta mashá interesá den medio ambiente. Esnan ku ta kritiká su maneho ta bisa ku fe tempu k'el a asumí presidensha di Brazil, a redusí ocho parke nashonal kaba den Amazonas pa traha lugá pa planta di forsa di awa i pa outopista.

Semper bo a puntra bo mes kon bin bo tin mas òf ménos ploi den kara kompará ku otro hende? De Volkskrant a bin k'e respuesta. Koló di bo kutis ta un faktor importante. Lus di solo tin ménos efekto nosivo pa hende koló skur, komo ku partíkula di pigmento ta wanta rayonan ultravioleta di solo. Ademas kutis kolós skur ta mas diki, ta p'esei e no ta ploi dje lihé ei. Ma tin algun otro faktor tambe. Kara di hende ku ta huma ta bira bieu muchu mas lihé, en kambio hende demasiado gordo no tin dje tantu ploi ei.