Akash nunka a konosé su tata. Su tata ta John Baboeram, un di e víktimanan di e asesinatonan di dezèmber 1982 na Sürnam. Den AD Akash ta bisa ku e ta konsiderá su tata un héroe. Awe tribunal militar ta disidí si ta siguí ku persiguishon hudisial di presidente Desi Bouterse i e sobrá sospechosonan si òf no.
Akash ta konta di un momento impreshonante di su hubentut. Na aña 1992, dies aña despues di dezèmber 1982 el a kedá konfrontá ku e asesinato sangriento di su tata den su klas na skol básiko na Zoetermeer. Na okashon di dies aña di e asesinatonan a pasá un reportahe al respekto na televishon eskolar. Akash a logra desahogá su mes via músika rèp. Awor e no ta rabiá mas, e ta bisa.

A detené e kriminal di ínternèt Robert Jan van der Z. nasé na Amsterdam, na Isla Margarita, Venezuela. Asina De Telegraaf ta anunsiá riba su portada awe. Ta trata di un estafador masha odiá sigun e korant.  E tabata ofresé produkto via ínternèt riba saitnan ku tabata mustra masha profeshonal, pero ora hende kumpra,  e no tabata entregá nada. Tabata buska Van der Z. rònt mundu. El a skohé pa siguí ku su aktividatnan na Isla Margarita pasobra e pais no tin un akuerdo di ekstradishon ku Hulanda.

Personalidat di Fresku tin diferente faseta anto e rèpdó aki ta mustra tur. Segun De Telegraaf esaki no ta masha usual sekka músikonan. Awe e di dos álbum di Fresku ku e titulo Maskerade ta subi merkado. Roy Reymound di 25 aña, esei ta su nòmber real, ta konsiderá su mes un kontadó di kuenta.  E ta konta kuenta komo e rèpdó Fresku pero tambe komo su personahe Gino Pietermaai. E ta ninga di laga pon’é den un hòki manera ta bisa na Hulanda. Den kuadro di e afan aki a sali un dokumental ku ta mustra algun eksperimentu artístiko ku Fresku a hasi huntu ku e artista di kabarèt Theo Maassen. 

E banko di negoshi merikano Morgan Stanley a gana 170 mion di euro ku kompra di 10% di akshonnan di KPN, nèt promé ku e empresa mehikano América Móvil a anunsiá su oferta pa kumpra akshon di KPN. De Volkskrant ta habri ku e notisia aki.
Preis di akshonnan di KPN a subi di 6,50 euro pa 8 euro despues ku e multimionario mehikano Carlos Slim a anunsiá su oferta. Sigun De Volkskrant no ta konosí si tin un relashon entre e dos akontesimentunan aki. E banko Morgan Stanley a ninga di duna e korant un deklarashon.

Miembro di parlamento pa CDA Kathleen Ferier ta haña ku su partido mester tene un debate abierto. Ferier ta bisa den Trouw ku no por skonde pasado. Asin’aki e ta reakshoná riba e súplika di Henk Bleker ku ta den kontienda pa bira lider dje partido, pa no papia mas di e koperashon frakasá ku PVV. Ferier tabata kontra e koperashon ei i e ta haña ku mester duna kuenta i rason awor tambe. ‘No mester tin miedu di hasi esei.’

NRC Next tin un potrèt di dos hòmber afrikano ku ta sunchi otro riba su portada. E kampo di bataya pa derechonan homoseksual di mundu oksidental ta moviendo den direkshon di Afrika segun e korant. Oponentenan di derechonan homoseksual ta bon pará awor'ki na Afrika. Preshon di paisnan oropeo pa derechonan homoseksual tin un impakto kontrario. Te ainda Suráfrika ta e úniko pais ku tin derechonan homoseksual den su konstitushon. E suidatnan Kaapstad i Johannesburg tin un mundu gay basta intensivo. Sobrá di e kontinente ta despachá homoseksualidat komo un konsepto oksidental.

Riba portada di de Volkskrant, AD i NRC Next un aviso di Wereldomroep. E aviso ta pone atenshon na e transmishon di 24 ora ku tin awe komo despedida di transmishonnan na Hulandes di Wereldomroep. De Telegraaf a dediká un artíkulo na e despedida bou di e titular ‘Dag luisteraars, Ayó oyentenan.’ Sigun direktor Jan Hoek e transmishon tin komo lema ‘orguyoso...,i un lágrima.’ E ta splika tambe kon Wereldomroep lo siguí boga pa protekshon di libertat di ekspreshon.