Trouw ta bolbe dediká atenshon amplio na e eskases di alóktono den tòp di organisashonnan soshal hulandes. E korant a dediká su editorial tambe n'e tópiko akí. Gobièrnu no ta hasi sufisiente esfuerso mas pa laga merkado laboral ta un mihó reflekshon di komunidat aktual. Segun Trouw no ta bon pa pasa e tarea aki pa dunadó di trabou. Esaki no ta funshoná, asina e korant ta konstatá. Den e kaso di emansipashon di hende muhé a keda komprobá ku si gobièrnu okupá su mes ku esaki, e ta yuda.

Eksperto i personanan envolví tambe ta kompartí e opinion. Direktor Joan Ferrier di e sentro di ekspertisio riba tereno di emansipashon ta bisa, ku e maneho di diversidat a sorú te ku 2010 pa oumentu di e kantidat di alóktono den direktiva di organisashonnan. "Gabinete ta kere muchu ku basta un persona ta kompetente i e pèrkurá haña su diplomanan, tur kos ta bin di mes. Lucia Baboelal-Thakoer, mènedjer den sektor di kuido, ta miembro di diferente direktiva i su eksperensha ta ku un direktiva, ku ta konstistí di tur klase hende, por splika mas mihó dikon ta importante pa un organisashon ta mas diverso posibel. "Tòp di un organisashon mester duna e bon ehèmpel", asina e ta bisa den Trouw.

'Bula ku avion entre islanan na Antia ta un pesadia, tantu mainta komo anochi', asina De Volkskrant ta skibi awe. Antó esaki ta literalmente bisá, pasó e buelo di mainta 7or entre Kòrsou i Aruba ta sali 10 or, asina ta pará rib'e bòrchinan. Pero ta te despues di 10or ta kuminsá embarka pasahero. Ata pasaheronan ku nan selular na orea pa purba kambia nan sita. Un pasahero ta bisa: 'Por ta e buelo di regreso ta te awe mardugá'.

Esaki ta un ehèmpel di e mal komunikashon aéreo i alabes karu entre e islanan i entre e islanan ku Hulanda. Asina minister Spies di Relashonnan den Reino ta tende durante su bishita pa sera konosí ku e islanan. Tweede Kamer a boga kaba pa konsiderá tur buelo den Reino komo buelonan interno, di manera ku e pasashinan por bira mas barata.

Mas notisia di aviashon den De Telegraaf. Latinoamérika ta brinda KLM oportunidat di krese. E kantidat di buelo pa Latinoámerika ta bai subi konsiderablemente te 104 pa siman. E destinashonnan mas importante ta bira Rio de Janeiro, Buenos Aires i Quito. Panama tambe ta birando destinashon importante. 'Paisnan manera Peru i Brazil no konosé krísis', asina Roderik Rodermond, vise presidente komersial pa Latinoámerika ta bisa. "Bo no ta tende nos keha riba e kantidat di asiento bendé riba e ruta pa Brazil". Rodermond ta kere ku Weganan Olímpiko di 2016 lo duna Brazil un boost mas.

Último simannan no a tende mashá di komisario Edgar Davids den tur e pleitunan ku tabatin den den seno di Ajax. Pero ayera, ora ku hunta di komisario a baha sí el a blo na un entrenamentu dibeachsoccer dje selekshon nashonal. Algemeen Dagblad a publiká un potrèt di Davids, hungando bala ku un kara masha serio. Pero ei tambe Davids no kier a bisa nada dje problemanan di Ajax. Anto promé ku bo realisá, Davids a disparsé.

Un sementerio di promesa no kumplí i leinan simbóliko, palabranan di Ed Nijpels, un di e miembronan mas importante di partido VVD. E ta kritiká su partido mashá. Den Algemeen Dagblad e ta bisa ku su partido ta halando bai mas i mas den direkshon di PVV di Geert Wilders. Komo ehèmpel e ta menshoná introdukshon di kastigunan di prizòn mínimo. Nijpels ta haña e medida akí apsurdo. Nijpels ta oponé oumentu di gastu di grefi, mashá paso esaki lo stroba hende di haña trato hustu.

De Telegraaf sa ku minister Maxime Verhagen di CDA ta serk'i choka formalmente ku PVV. CDA ke pa VVD i PVV bai di akuerdo ku reformashonnan den sektor di kuido i riba merkado laboral i di bibienda. Mester ekonomisá algun miar mas. Den un entrevista ku ta sali mañan den e korant, Verhagen ta bisa: "Bo no por papia kumi di ekonomisashon sin papia di reformashon tambe. "Pero PVV no ke mishi ku entre otro e periodo di WW ni ku lei di retiru.

Nederlands Dagblad ta skibi djun triunfo pa investigashon sientífiko dje enfermedat di Alzheimer. Sientífikonan merikano a deskubrí ku un remedi eksistente pa tratamentu di kanser, por kombatí síntomanan di Alzheimer seka ratòn. E klònchinan di proteína den selebre ku ta kousa e malesa, ta disparsé i memoria di e ratónnan ta drecha atrobe. Revista sientífiko Sience ta publiká un artíkulo awé riba e deskubrimentu spektakular aki. E tratamentu ta traha mashá lihé. Denter di seis ora e konsentrashon di proteina ta baha. Despues di 72 ora mas ku mitar di e klònchinan a disparsé. E sientífikonan ta atvertí si ku e eksperimentu a duna resultado seka ratón, pero ku e efekto seka hende por ta menos spektakular.

De Telegraaf ta skibi ku tin un free for all den tarífanan pa kasamentu na rat. E diferensha den loke munisipionan ta kobra un pareha ku ta bai kasa por suma algun 100 euro. E organisashon pa sekshon di enlase nupsial ta boga pa mas transparensha. Hopi biaha no ta kla pa un pareha kiko e tin ku paga eksaktamente.