LIMA (ANP) - E denunsia kontra Joran van der Sloot no tin mester di kambia. Fiskal mayó prinsipal na Lima, kapital di Peru a determiná esaki. No tin nada mas pa stroba inisio dje proseso kontra van der Sloot. Tribunal tin ku fiha fecha awor, asina Máximo Altez, èks abogado di Joran Van der Sloot a bisa ayera djaluna.

Ta akusá Van der Sloot di a mata Stephany Flores di Peru den su kamber di hotèl na Lima dia 30 di mei 2010. Na sèptèmber a tene e promé seshon públiko dje kaso. Tribunal a disidí di manda e kaso bèk pa OM, pa studia e denunsia dinobo.

Famia di Stephany Flores a ophetá e denunsia di asesinato siguí pa ladronisia, ku Ministerio Públiko (OM) a formulá. Promé ku esei OM a demandá 30 aña di sèl i un but di mas o menos 50.000 euro. Abogado di famia Flores, Edward Elvarez, a kere ku e denunsia mester tabata robo siguí pa asesinato. Pa esaki e sentensia ta 35 aña te bida largu den prizòn.

Máximo Altez a bisa di ta fèrwagt ku awor Van der Sloot lo risibí 20 te 30 aña di kastigu di prizòn. E ta kere tambe ku probablemente e proseso lo kuminsá denter di un luna. "Esei nan lo purba sigur, pasó prinsipio di dezèmber término máksimo dje 18 lunanan di su aresto preliminar ta kaduká'', segun Altez.

Van der Sloot su abogado por entregá petishon pa laga su kliente warda riba e proseso pafó di prizòn, despues ku e 18 lunanan vense. Di su parti, OM por entregá un petishon pa prolongá aresto preventivo.