ORANJESTAD - Di e hefe di e departamento di Jeugd- en Zedenpolitie (JZP) Aruba a wordo avisa cu den e ultimo temponan nan ta hayando casonan di hendenan mayor di edad cu ta hibando of tratando di hiba hobennan, vooral femenino, den e baho mundo di industria sexual.

E ta un secreto publico, segun e vocero di Polis, cu nan ta priminti e hobennan aki placa facil y hasta ta gara nan cu e promesanan falso di lo sali of entretene celebridadnan of turista cu lo ta of no ta spera actonan sexual y cu lo paga nan hopi placa.

Tabatin hasta casonan unda cu ta sea gaña nan pa hasi actonan sexual a base di pago y despues no ta paga nan of hasta viola nan sexualmente.

Segun informacionnan ricibi hopi hoben ta wordo acerca via websitenan of rednan social ya cu den e mercado di industria sexual hendenan perverso ta exigiendo cada dia pa e trahadornan ta mas y mas hoben.

E Jeugd- en Zedenpolitie (JZP) menciona ta investigando diferente caso di abuso pero tambe di acercamento na hobennan. Loke si nan ta lamenta ta cu hopi hoben mes, boluntariamente ta hinca nan mes den e mercado sushi aki di baho mundo, cu tur e consecuencianan terribel cu esaki por trece cune.

Tanto pa nan estudio (hopi ta dropout di scol), nan salud (nan por haya malesa venerico, depresion, suicidio, drogadiccion, etc) y nan seguridad (abuso di parti di cliente y hefenan di trabou) y hasta esclabitud moderno (sex slaves industry).

E hecho cu nan mes ta bay di acuerdo pa hasi cos pa placa ta pone cu hopi biaha despues no por persigi e malechornan aki pa violacion sino mas tanto pa fraude ya cu ta trata di un transaccion financiero.

Cualkier persona cu sa algo relaciona cu casonan of negoshinan illegal asina, por tuma contacto cu e departamento di JZP na (+297) 5852500 of por duna un tip anonimo na tiplijn 11141. Tambe e publico por manda e polis un e-mail na of hasta contact via Facebook na prevenciondicrimen.