DEN HAAG – Parlamento hulandes no por para e plannan di ekspanshon di kompania di transbordo Nustar na Sint Eustatius. Sekretario di estado Joop Atsma a bisa esaki ayera den e deliberashon ku e komishon parlamentario fiho pa Relashonnan den Reino.

E kompania merikano ke ekspandé su kapasidat di transbordo di 67 tanki pa 25 te ku 40 tanki èkstra. E tankinan eksistente ta keda skondí den seru i kasi no ta visibel riba e isla, pero e ekspanshon pa un lokashon nèt na rant di Oranjestad sí.

Outorisá
Segun Atsma ta gobièrnu di e isla so ta outorisá pa determiná si ekspanshon ta deseabel sí òf nò. Bestuurscollege nobo ta positivo ku un ekspanshon, pero tambe tin reserva kontra e lokashon ku e kompania a proponé. Mester di un gran kantidat di pèrmit ainda pa hasi e ekspanshon posíbel. Ta Reino ta duna esakinan. Mientras tantu ku Nustar su plannan ta kumpli ku lei i regla na Hulanda, no por ninga e pèrmitnan, Atsma ta bisa.