WILLEMSTAD – Dia 8 di febrüari 1958, awe 54 aña pasá, miembro di Konseho insular Chano Margaritha di Partido Demokrátiko a disidí di papia papiamentu so den Konseho insular.

Ta promé be ku idioma di Yunan di Kòrsou a bira idioma di e debate polítiko. E kos no a kai bon seka Gezaghèber e tempu ei, Michael Gorsira. El a bati ku martin di presidente i a pidi Margaretha papia hulandes..

Pero Chano Margaritha tabata ke pa esnan ku a vota p’e por a komprond’é tambe. E hendenan den tribuna publiko kasi a kai for di na stul di sorpresa. Konseho insular a debatá tokante e eskoho i na final a bai di akuerdo.

Presidente di Staten aktual Ivar Asjes awe ke duna atenshon na e evento históriko. “Esaki ta un dia importante den parlamentu pa tur Yu di Kòrsou”, asina Asjes ta haña, “Chano Margaretha meresé tur honor pa su akto di kurashi.”