WILLEMSTAD – Tin un oumento di Ladronisia di pipa di koper na Kòrsou. Awe Aqualectra a haña 24 notifikashon di ladronisia di pipa di awa na Kòrsou den diferente bario, partikularmente na Souax i Gato.

Tambe den e barionan Jandoret, Julianadorp, Seru Loraweg, Lelienberg, i Sabana Hundu ladronnan a dal bai. Den otro bario tambe ladronisia di pipa di koper ta oumentá. Na Gato diferente kas a kai víktima di ladronisia. 21 di e kasonan a tuma lugá entre sink’or i shet’or di meinta. Aqualectra mester a pone no ménos ku kuater tim tékniko traha pa garantisá suministro di awa.

E ladronisia di pipa di koper ta dispidí hopi awa. Ademas e kompania ta hañ’é ku gastu èkstra di trabou di tékniko i konekshon di pipa di awa nobo.

Aqualectra ta apelá na habitantenan di bario pa ta alerto. Asina nan mira algu sospechoso òf mira persona deskonosí banda di meter di awa, nan mester yama polis.