WILLEMSTAD – E bario Otrobanda ta bringa pa mantené hòspital Sint Elisabeth den sentro di siudat. Diferente agrupashon, entre nan Palataforma Otrobanda di e konosido Jopi Hart, ta enfatisá ku turismo den e parti bieu aki di siudat ta benefisiá di un hòspital moderno.

Segun e organisashonnan, presensia di e siudat ku su infrastruktura ta importante pa funshonamentu di un hòspital nobo. Un sentro di siudat aksesibel ku bon previshon, manera hotèl i restorant ta fasilitá e funshon regional ku Sehos tin.

Ta p’esei e plannan ku gobièrnu tin pa desaroyá e área di Rif pa turismo ta kombiná bon ku presensha di un hòspital moderno den besindario. E organisashonnan den Otrobanda ta rekonosé ku e tereno di 70 mil meter kuadrá ta interesante pa laga invershonista traha un sentro komersial, diferente hotel i apartamento luhoso, pero ku presensha di un hòspital ta deha mas.

Un oferta variá di servisio ta trese ekilibrio den e desaroyo turístiko-komersial di sentro di siudat. Ademas un hòspital lo promové desaroyo di turismo médiko den un sentro di siudat ku tin tur sorto di fasilidat i entretenamentu.