Minister Liesbeth Spies di Asuntunan Interno i di Relashonnan di Reino ta prekupá ku e desaroyonan na Kòrsou, kaminda parlamentu a manda gabinete demishonario kas. "Kualke hende komun i koriente, pues minister di Relashonnan di Reino tambe lo prekupá k'e situashon ei", asina señora Spies a bisa awé na final di reunion semanal di Konseho di minister di reino. "Kádabe t'un sorpresa e loke ta sosodé na Kòrsou", asina e mandatario hulandes a añadí.

Mas aleu e minister a papia djun situashon 'estrabagante' e siman akí, esta, e skisma djun mayoria parlamentario di resto dje miembronan di Staten, pa motibu di kondukta diktatorial di presidente di parlamentu. Spies a bisa ku no ta asuntu di polítika hulandes pa buska solushon na Kòrsou. E ta kere tambe ku e krísis polítiko na Kòrsou ta durando 'muchu tempu kaba'. E ta spera ku pronto lo sali for dje impase. For di òktober 2010 Kòrsou ta pais outónomo den Reino hulandes.

Krísis i pelea polítiko
Un mayoria di Staten, o sea parlamentu di Kòrsou, a kore ku e nuebe ministernan demisionario di gabinete Schotte. No ta kla si e kos aki por den sentido di derechi konstitushonal. Kòrsou ta den krísis parlamentario algun siman kaba. Fo'i tempu ku gabinete a kai, presidente parlamentario Ivar Asjes ta opstakulisá tur reunion públiko. Dje forma akí e ke evitá su retiru i esun dje ministernan demisionario.

Ayeranochi e krísis polítiko a bai resultá den un pelea. Simpatisantenan dje partidonan gobernante kier a prevení entrada di miembronan di oposishon na edifisio di Staten, loke a kondusí na bringamentu. Anthony Godett, visepresidente elekto di parlamentu di Kòrsou a kome sla.