HELSINKI – Churandy Martina na kampeonatonan oropeo (EK) di atletismo na Helsinki lo kore 200 meter i estafeta 4 x 100 meter. Lo e no usa su pèrmit di start riba 100 meter.

Ta tene e kampeonato oropeo di 27 di yüni te ku promé di yüli.

Martina último wikènt a prolongá su titulo hulandes riba e ‘kareda real’ (100 meter) i a laga sa ku ainda e ta duda entre 100 i 200 meter na EK. Despues di deliberashon ku su coach Dennis Mitchel el a disidí di skohe pa 200 meter.

Riba papel Martina tin mihó chèns den e kareda aki. E temporada aki el a hiba e rekòrt hulandes pa 19.94. Durante Weganan Olímpiko na Lònden Martina lo start riba 100 í riba 200 meter.