GRONINGEN (ANP) - Awe, djaweps e poliklínikanan di UMCG, e sentro médiko universitario di Groningen tabata será henter dia debí na fayo di kòmpiuter. Sentenares di sita no por a sigui mas. Djaweps den oranan di anochi a solushoná tur problema. Djabièrnè e polinan por habri normal atrobe, asina un bosero a bisa.

Pa motibu dje fayo no tabatin enternèt den e hòspital i e wèpsait tambe tabata 'down'. UMCG no tabata telefónikamente aksesibel tampoko. A pidi ambulans ku pashènt levemente eridá pa akudí na otro hòspital.

UMCG ta kalkulá ku den kared'i 300 pashènt a bin hòspital pòrnada. Mester a kanselá dies operashon ku no tabata dje urgente ei. E operashonnan di emergensha sí por a sigui sin mas.

E sentro médiko universitario lo averiguá kousa eksakto di e fayo digital. E instituto médiko lo wak tambe ki medida mester tuma pa evitá tipo di problemanan asina den futuro. No ta promé biá ku kos ta faya na e hòspital na Groningen: na 2009 i 2010 tambe e sistemanan tabata 'down'.