WILLEMSTAD – Trahadónan di Kranshi ta bai traha bèk ‘bou di protesta’ for di djaweps 2 di febrüari. Nan ta duna promé minister Gerrit Schotte i minister Carlos Monk (Planifikashon Gobernamental i Servisio, PS) ‘un término rasonabel’ pa bini ku un solushon definitivo pa e tenshonnan na e servisio di gobièrnu aki relashoná ku binimentu bèk di hefe di e servisio Harold Daal.

Esaki ta resultado di un deliberashon kòrtiku djárason meinta den Fòrti ku representantenan di e aktivistanan. Schotte a insistí pa garantisá servisio i Monk ke ‘sosiegu i pas’. Monk a indiká anteriormente ku “si un hefe di servisio no por inspirá su trahadónan e no por mantené un puesto asina pa e salario ei”.

Gobièrnu i sindikato awó ta konsentrá riba realisashon di un ambiente di trabou kaminda e relashon di trabou ta kana zetá entre e hefe di servisio i su trahadónan. Trahadónan di Kranshi djárason a enfatisá atrobe ku nan pasenshi ku Daal a kaba kompletamente.