WILLEMSTAD – E instalashon pa limpia awa di riol na Boneiru i ku a kosta kasi 40 mion florin probablemente lo bai funshoná e aña aki tòg.

Ora ku a kaba di traha e instalashon a deskubri ku na Boneiru no tin riol, ke men no tabatin manera pa transportá e awa shushi pa e instalashon pa limpia awa.

Joop Atsma, sekretario di estado pa Infrastruktura i Medio Ambiente ta solushona e problema aki awó. E ta dispuesto di paga gastunan pa konektá kasnan i negoshinan riba riol i karga e gastunan di eksplotashon ku ta hopi mas haltu ku loke Boneiru por karga.

Atsma ta den kombersashon ku kompanianan di awa hulandes tambe pa mira ku nan por hunga un papel den maneho di awa na Hulanda karibense.