WILLEMSTAD – Minister Nasser El Hakim di Asuntunan Ekonómiko ta invitá e kompanianan di aviashon InselAir i DAE pa bin sinta kuné na mesa. E ta haña ku e dos kompanianan kurasoleño mester por koperá na un manera konstruktivo.

E kantidat di oportunidat den merkado di aviashon ta subiendo. Kompanianan di aviashon internashnal tambe a ripará esaki. Si InselAir i DAE hiba konkurensha na un manera konstruktivo, nan por hasi mihó uso di e oportunidatnan ku tin, segun El Hakim.

Na 2011 diferente kompania di aviashon nobo manera COPA Airlines, Air Canada i airberlin a bini Kòrsou. Kòrsou a reforsá e relashon ku KLM tambe. Ma nan por logra mas, pasobra Estádos Unídos i Merka Latino ta mira Kòrsou komo un konekshon logístiko den Karibe. El Hakim a apelá na InselAir i DAE pa invesigá posibilidatnan pa koperá riba rutanan internashonal.

InselAir i DAE basta tempu kaba ta nuá. Tur dos a hiba diferente kaso den korte kontra otro. Den e último kaso wes a dikta ku nan mester hasi bon “disfrutando di un kòp’i kòfi”. Ta manera awó ta minister ta basha e kòfi aki.