KRALENDIJK - E Instituto di Reino pa Salubridat Públiko i Medio ambiente (RIVM) lo hasi un investigashon di kontinuashon pa ku e efektonan di medio ambiente riba Gotomeer despues di e kandela na Bonaire Petroleum Corporation (BOPEC). E servisio di Reino pa e islanan hulandes karibense (RCN) ta informá mas aleu ku sí ta asina ku Kolegio Ehekutivo di Boneiru mester entregá un petishon ofisial na gobièrnu hulandes. 

E investigashon di kontinuashon kímiko lo ta dirigí na promé lugá riba eventual rísikonan riba medio ambiental di posibel presensia i distribushon di materianan kontaminá den e suela, awa (den tera), organismonan i lodo di Gotomeer.

Tambe lo hasi investigashon di kontinuashon pa chek e presensia di PFOS (perfluor octaan sulfonaat), un materia ku ta akumulá su mes den medioambiente i ku ta desintegrá difísilmente. Te ku un korto tempu pasá PFOS ainda tabata aparesé den skuma di paga kandela pero a keda prohibí por lo tantu na Hulanda. Investigashon anterior di RIVM den Gotomeer a mustra ku no por ekskluí e rísikonan di medioambiente di PFOS. A keda rekomendá pa hasi investigashon adishonal.

RIVM lo kompilá e programa di demanda pa e investigashon aki den estrecho konsulta ku gobièrnu di Boneiru. Ta spera ku por tèrminá e investigashon e aña aki. A base di e resultadonan di e investigashon di kontinuashon, ta keda na e Kolegio Ehekutivo di Boneiru pa evaluá si ta nesesario tuma pasonan mas aleu i wak ken lo mester pone responsabel.

E Kolegio Ehekutivo tambe a pidi sosten finansiero di Hulanda pa hasi un investigashon dje posibel konsekuensianan pa naturalesa, manera e desaparishon di e flamingonan na Gotomeer. Pero segun RCN un investigashon asin’aki tin solamente sentido ora ku e resultadonan di e investigashon kontinuativo di RIVM ta disponibel i ku en bèrdat señalá rísikonan pa medio ambiente. Na e momentunan aki ainda no por a mustra e konekshon entre e bahada di e kantidat di flamingonan i e posibel materianan kímiko den Gotomeer despues dor di e kandela na BOPEC.