Aruba i Hulanda lo koperá mas intensivo riba tereno di enseñansa i siensia. Minister di Enseñansa, Kultura i Siensia Marja Van Bijsterveldt-Vliegenthart ayera huntu ku minister arubano di Hustisia i Enseñansa Arthus Dowers a pone su firma bou di un akuerdp pa e koperashon aki.

Pa alumno i studiante ku ta sigui nan trayekto di enseñansa den diferente parti di Reino ta importante pa e programanan di enseñansa konektá bon. Ta p’esei Hulanda i Aruba lo bai koperá mas intensivo riba tereno di supervishon di enseñansa, bon dominio di idioma hulandes i mantenshon di lei di enseñansa obligatorio. Ademas un koperashon mas intensivo ku formashon pedagógiko di dosente (universitario) ta forma parti di e plannan.

Siensia
Pa reforsá siensia den Karibe, lo lanta un ret di konosementu na kua organisashon di naturalesa Carmabi na Kòrsou i un sentro di konosementu multifunshonal na Sint Eustatius tambe partisipá. Bou di e nòmber ‘Siensia den Karibe’ e Organisashon hulandes pa Investigashon Sientífiko (NWO) ta lanta un programa di invesigashon ku sientífiko i investigadó di Hulanda i Karibe. E koperashon eksistente di kuido di monumento lo kontinuá. Un tópiko nobo den e koperashon ta atenshon pa e rikesa na herensia imaterial ku Aruba tin.