WILLEMSTAD - E barku di Marina Real, Hr. Ms. Tromp, ta habri su portanan pa pueblo di Kòrsou. Esaki ta tuma lugá djadumingu 5 di ougùstùs na Nieuwe Werf na Otrobanda entre 2’or pa 5’or di atardi.

Esaki ta un oportunidat úniko pa bishitá Hr. Ms. Tromp ya ku ta e promé fregata di e tipo aki ku ta nabegá den Karibe.

Defensa aereo
Ta trata aki di un barku tipo fregata ku un sistema di defensa aereo hopi avansá. Hr. Ms. Tromp ta speshalisá riba defensa aereo, kaminda e por defende hinter un skala di barku. E karakteristika di mas remarkabel ta e forma fisiko 'stealth' ku ta hopi strak. Hr. Ms. Tromp ta konta ku un tripulashon di 202 persona.

Trafikashon di droga
Banda di su prestashon maritimo, e tarea prinsipal ta pa kombati trafikashon di droga. E barku aki ta ser usá tantu pa Marina Real komo Wardakosta. Durante di e periodo ku e ta nabegá pa Wardakosta, su tarea ta konsisti di duana, supervishon riba peska i medio ambiente marítimo i aktuashon den kaso di emergensia.