CARACAS – PdVSA, e kompania di zeta di estado venesolano a mira su ganashi subi ku 35 porshento na 2011. E subida tabata kompletamente pa kousa di subida di preis di zeta, segun e minister venesolano di energia, Rafael Ramirez, ku alabes ta presidente di PdVSA.

E reservanan di e kompania di estado a subi ku 14.7 porshento na 2011 te 174 miar dòler. Ta berdat ku sifranan di benta na 2011 a subi te 128 miar dòler pero segun ofisina di prensa Reuters, PdVSA ainda debe su suministradónan hopi plaka. Ademas último añanan e kompania a fia hopi plaka.

Debe
“E fiansanan ta nesesario pa paga invershonnan nobo di un total di 236 miar dòler merikano pa añanan 2013 te 2015”, Ramirez ta bisa. Debe di PdVSA na 2011 tabata kasi 35 miar dòler, un oumento di kasi 40 porshento kompará ku 2010. Analistanan ta ferwagt ku e aña aki e kompania lo hasi mas debe.

E volúmen di benta di e kompania di estado a subi pa motibu di preis di zeta krudo. Un barí na 2011 tabata kosta un promedio di 101.06 dòler, un oumento di 40.5 porshento kompará ku aña pasá.

Orinoco
PdVSA tin planeá pa na 2012 produsí mei mion barí mas pa dia te ku 3.5 mion barí di zeta krudo pa dia. E oumento lo bini prinsipalmente di proyektonan den e faha di zeta di Orinoco, kaminda e kompania tin intenshon di produsí 470 mil barí pa dia.

Kapasidat di refineria PdVSA na Kòrsou ta di 335 mil barí pa dia. E produkshon aki ta bou di hopi preshon pa motibu di fayo i mantenshon di e refineria bieu i e aña aki no a alkans’é.

Venezuela ta spera ku e sektor di zeta ku ta stankando lo rebibá. E pais ke kuminsá un serie di proyekto ambisioso di joint venture ku kompanianan strañero den e region. Einan segun e minister tin un di e reservanan di zeta di mas grandi di mundu.