Na Den Haag e órgano hulandes ku ta dediká atenshon na hende muhé, e asina yamá 'Vrouwenpodium', a entregá djamars dia 13 di sèptèmber shete obra di arte na parlamentarionan hulandes. Meta dje akshon ta pa pone atenshon na e konsekuenshanan di e medidanan di gobièrnu pa hende muhé. E órgano di konsulta pa hulandesnan karibense, OCAN, tambe tabata presente pa entregá e obranan. Direktor di OCAN, Marom Ayoubi ta haña tipo di akshonnan asina importante pa hende muhé antiano bibá na Hulanda. "Meta ta pa nos hende muhé desaroyá nan mes pa nan tin nan propio plaka." Pesei ta nesesario keda mustra gobièrnu ariba pa pone atenshon na e tópikonan di partisipashon di hende muhé riba merkado laboral, segun Ayoubi.