Na Amsterdam a surgi choke frontal entre dos trèin. Mas o menos 136 persona a keda heridá. Brantwer ta bisa ku por lo menos 56 hende ta gravemente heridá, 13 ta den kondishon "sumamente serio".

Kasi tur e 80 personanan ku leshon leve a risibí tratamentu na e sitio di aksidente mes. A interná mayoria víktima na VU medisch centrum, ma a hiba algun herido Lucas Andreas Ziekenhuis i Slotervaartziekenhuis tambe. .
 
Choke frontal
E trèinnan ku a dal den otro ta un 'sprinter', ku ta para na hopi stashòn, i un trèin rápido, tipo 'Intercity dubbeldekker'. E sprinter tabata bayendo Uitgeest, miéntras ku e trèin rápido tabata biniendo di direkshon kontrario: for di Den Helder ku destinu Nijmegen. E mashinest dje dubbeldekker a keda seriamente heridá, kondishon di esun dje sprinter por pasa.
 
Ainda no a logra saka afó kon bin e trèinnan riba e mes spor. E desgrasia a tuma lugá band'i 18.24 or pegá ku Westerpark, entre Amsterdam Centraal Station i stashòn Sloterdijk.
 
Konekshon alternativo
E aksidente a brua tráfiko feroviario por kompleto den un zona basta grandi alrededor di Amsterdam. NS a manda konvoi pa hiba biahero Haarlem. Ta konsehá pasahero prosedente di airopuerto Schiphol, ku tin ku sigui pa Amsterdam, pa hasi uso dje konekshon ku Duivendrecht.
 
Inspekshon di transporte ta investigando kousa dje desgrasia di trèin. Outoridatnan ta bisa ku e daño material ta konsiderabel. Entretantu ProRail a partisipá ku a logra kita e sprinter for di spor. Den kurso di dia ta kita e Intercity tambe for di kaminda.
 
 
Pa mas notisia wak Notisiero NOS