WILLEMSTAD - E kantidat di dióksido di swafel den hairu kurasoleño tabata demasiado haltu den e fin di siman tras di lòmba. Midimentu dor di Stichting Schoon Milieu op Curaçao (Smoc) a revelá esaki.

A midi balornan di 700 µg/m3 (mikrogram pa meter kúbiko). Esaki ta 200 µg/m3 mas ku e balor máksimo ku World Health Organization (WHO) a stipulá. Un hende komun i koriente no tin mag di ta eksponé pa mas ku dies minüt na 500 µg/m3.

Efektonan
Dióksido di Swafel (SO2) ta un gas ku un holó skèrpi ku ta aparesé ora kima materia fosil manera karbon i zeta. Balornan haltu di SO2 ta un problema grandi prinsipalmente pa pashèntnan di astma.

SO2 por tin efekto riba e sistema respiratorio i e funshonnan di pulmon. Tambe e por okashoná iritashon na wowo. Ora SO2 bin den kontakto ku awa, esei ta forma ásido di swafel, un di e komponentenan mas importante pa awaseru zür.