Atleta Churandy Martina a klasifiká pa kampionato pa título oropeo na Helsinki (Finlandia) í pa Weganan Olímpiko 2012 na Londen.

Na Gainesville, Florida e koredó kurasoleño, ku ta kompetí pa Hulanda, a demostrá di ta den kondishon ainda ku un velosidat di sprent di 20.42 sekòndu p'e ban di 200 meter n'e kareda di Tom Jones Invitational. El a pasa finish komo di dos koredó, e koredó merikanu Justin Gatlin a sali ganadó k'e velosidat di 20.11.

Entretantu seis atleta hulandes a klasifiká pa Olimpiada na Londen. Ademas di Martina, ta trata di Rutger Smith, Erik Cadée, Hilda Kibet, Lornah Kiplagat i Monique Jansen.

Pa Kampionato oropeo di Atletismo na Helsinki (27 di yüni te 1 di yüli), sinku atleta a klasifiká awor: Churandy Martina (kareda di 200 meter), Fabian Florant (salto tripel), Rutger Smith (lansamentu di bola í di deskùs), Erik Cadée (tira deskùs) i Monique Jansen (tambe pa tira deskùs).

N'e kareda di Tom Jones Invitational, Brian Mariano a kubri distansha di 100 meter den 10.48 sekòndu. E tim hulandes di èstafèt, o sea kareda di relevo, konsistiendo di Brian Mariano, Churandy Martina, Jerrel Feller i Guus Hoogmoed, a anotá 39.53 sekòndu riba ban di 4 x 100 meter.