Molèster di sneu. Den e parti nort di Hulanda tin un situashon kaótiko pa motibu di sneu. Ta hopi drùk riba kareteranan rondó di suidatnan grandi. Kuminsamentu di mèrdia tabatin fila di mas ku 400 kilometer. Tabatin algun dalmentu di outo un tras di otro. Riba hopi kaminda tráfiko ta para ketu o ta kore poko poko. Nederlandse Spoorwegen a adaptá e horario. Na Schiphòl buelonan tin retraso o te asta a kanselá buelo.

Limitashon di antiano
Partido di koalishon CDA ta asombrá pa e plan di VVD pa bin ku eksigenshanan mas severo pa imigrantenan di Kòrsou, Aruba i St. Maarten. Base di e proposishon di lei di VVD ta ku imigrantenan ku ke establese nan mes na Hulanda no por tin un karchi penal i nan mester dominá hulandes. Ademas nan mester demonstra ku nan tin un entrada i ku nan tin un preparashon adekuá di manera ku nan por haña un trabou. E eksigenshanan mas severo ta pa evita ku personanan ku menos rekurso ta kai den mal kaminda. CDA ta haña un move straño di VVD pa bin awor ku su mes proposishon di lei. No ku e partido tin opheshon kontra e lei, pero e CDA ta mustra riba e echo ku den akuerdo di gobernashon a palabrá kaba ku gabinete lo bin ku un plan komo tal. PVV si ta kontentu ku e plan di VVD pero nan ta puntra nan mes si e plan ta sufisiente severo.

Sifranan di kriminalidat alarmante
Hóbennan alóktono ainda ta kai mas tantu be den man di polis i hustisia kompará ku hóbennan outóktono. Esaki segun e rapòrt anual di e ofisína di planifikashon soshal kultural ku a lèk. SCP ta bisa ku e kantidat di antiano i marokano ku ta kai den man di hustisia ta hopi alarmante. Den e rapòrt ku nan ta presenta otro siman ofishalmente tin skibí ku 65 % di hóbennan marokano sa haña nan envolvi ku polis. Antianonan ta mas tantu be sospechoso, siguí pa marokano i sürnam.

Mas severo pa migrantenan kriminal
Minister Leers ke aktua mas severo kontra migrantenan kriminal. E ta proponé pa kita pèrmit di estadia di un imigrante ku hañé envolvi ku hustisia den e promé aña. Awe gabinete ta papia tokante e proposishon. Migrantenan ku hasi nan mes kulpabel na aktonan kriminal serio por konta ku ekspulshon mes ora. Segun minister Leers migrantenan mester realisa nan mes ku nan ta trese nan pèrmit di estadia na peliger si nan kometé aktonan kriminal. Ekspertonan ta kere ku e plan ta empugna na reglanan oropeo.

Mas morto na Egípto
Na Egípto nan ta bolbe demonstra kontra régimen militar. Na Cairo sentenares di hende a reuní djabièrnè dilanti ministerio di asuntunan interno, djis seka di plasa Tahrir. Nan a tira polis ku piedra. Polis na su turno a tira ku gas lakrimógeno. Den otro suidat tambe nan ta bolbe demonstrá. E resien demosntrashonnan ta konsekuensha di e susesonan despues di un wega di bala na Port Said, ku a gosta bida di 74 persona. E demonstrantenan ta reprocha polis ku nan no a hasi nada. Ayera 3 persona a pèrdè nan bida i 400 a keda heridá.

Atentado di bòm na Colombia
Shete persona a muri den un atentado riba un ofisina di polis den e suidat kolombiano Tumaco. Por lo menos 70 persona a haña leshon. Segun outoridatnan e movimentu geriyero FARC ta responsabel pa e atentado. Djis dilanti di e ofisina di polis un bòm a eksplotá ku tabata mará riba un motosaikel. Minister di defensa kolombiano a manda 300 militar pa Tumaco pa yuda buska e malechornan. Den e suidat ta reiná un gera formal entre gègnan di droga i FARC tokante kontrol riba rutanan di droga.

Tèst di sida gratis
Durante próksimo karnaval gobièrnu di Brazil ta bai ofrese tèstnan di aids gratis. Karnavalistanan por haña sa dentro di 15 a 20 minüt si nan ta infektá ku e viro HIV ku por okashoná sida, esta aids. Asina minister di salubridat públiko Padilha a duna di konose. E minister a bisa ku e kampania ta dirigí speshalmente riba hóbennan homoseksual entre 15 i 24 aña. Den e grupo aki e kantidat di infekshon ku HIV a subi entre 1998 i 2010 ku 10 porshento. Ademas gobièrnu ta bai parti 70 mion kondon gratis durnate karnaval.

Rasismo ta plamando na Oropa
Rasismo ta plamando na Oropa. Asina e komisario pa derechinan humano Thomas Hammarberg di Konseho di Oropa ta bisa. Xenofobia i rasismo ta oumentando den un kantidat di pais oropeo ku konsekuenshanan negativo pa migrante, Roma i otro minorianan.

Morto dor di frieldat
Frieldat na Hulanda ta influenshá bida diario kada dia mas. E dianan aki supermerkadonan ta bende masha kuminda di wenter manera; rookworst, sopi di bonchi bèrdè, zürkol i chapapoti. Ultimo 15 aña Hulanda no a uza asinta tantu gas pa kenta kas manera a hasi djárason pasá. E dia ei ta den e tòp 3 di dia ku outomibilista ta'tin mas problema ku su outo. Un persona sin kas a vris muri na Wageningen. E hòmber di 43 aña a pasa anochi den deposito di un konosí. E konosí no tabata na kas. For di investigashon di polis a sali na kla ku e hòmber a muri a konsekuensia di e frieldat.

Wer na Hulanda:
Sneu ta kai rònt Hulanda. Pero den e parti nort wer a kuminsa drecha. Mayan solo ta bria pero ta hopi friw. Temperatura ta 4 grado bou di sero.