Leers ke mantené registrashon di etnisidat. Minister demisionario Gert Leers ta haña ku ta keda nesesario pa registrá desendensha di migrantenan. Solamente ku echo i sifra por haña un bon bista di e posishon di migrantenan den komunidat hulandes. E minister ta reakshoná riba un konseho ku el a risibí di Raad voor Maatschappelijke Ontwikkeling. E órgano di konseho aki ta skibi den un karta ku gobièrnu no mester huza e terminologianan alóktono i outoktono mas. E órgano ta haña e luga kaminda un migrante a nase mas importante ku su desendensha étniko. Mas aleu Raad voor Maatschappelijke Ontwikkeling ta skibi ku gobièrnu mester ta kouteloso ku hasimentu di distinkshon entre hende di diferente etnisidat.

Borssele ta seif
Segun ekspertonan estranhero tambe e sentro nuklear na Borssele ta seif. Nan ta aseptá e resultadonan di e asina yamá tèst di strès ku e sentral mester a pasa aña pasa. Despues di e desaster na Fukushima na 2011 Union Oropeo a disidí di kontrolá tur sentral nuklear riba e aspekto di seguridat. Ekspertonan oropeo ta bisa ku e sentral na Borssele ta di un kalidat estupendo. Nan ta positivo tambe tokante algun kambio ku e sentral a proponé.

Bleker ke lugumai enbergia nunklear
Kandidato pa kabes di partido CDA, Bleker ke legumai energia nuklear riba término largu. Asina el a bisa durante un debate na Rotterdam entre e seis kandidatonan. CDA semper tabata pro energia nuklear i na 2010 e partido a bisa ku e ta pro konstrukshon di dos sentral nuklear mas na Hulanda. Alemania por ehèmpel segun Bleker  ta laga mira bon ku por otro tambe. Ayera e seis kandidatonan pa bira lider di CDA a debatí ku otro pa di promé be. E debate na Rotterdam no tabata masha di gaba. E diferenshanan entre e seis kandidatonan tabata hopi chiki. E sigiente debate ta tuma luga mayan na Groningen.

Akshon di KPN a subi
E preis di un akshon di KPN a subí na bolsa di balor na Amsterdam ku mas ku 20 porshento. Awe mainta a anunsiá ku e kompania di telekomunikashon mehikano América Móvil ke tuma un parti di KPN over. E kompania ke ampliá su parti den den KPN di 5 porshento pa kasi 30 porshento. Na bolsa di balor e preis di un akshon di KPN a subi ku kasi un kuart kompará ku e preis ayera ora ku bolsa di balor a sera. Kompra di e akshonnan di KPN lo kosta América Móvil in total 2, 6 miar di euro. KPN ta haña e oferta relativamente positivo. América Móvil ta propiedat di e mehikano Carlos Slim, segun e revista Forbes e hómber mas riku na mundu.

Comba a entrega su mes
E baron di droga kolombiano Javier Calle Senna a entrega su mes na Aruba na funshonarionan merikano di e servisio di rastreamentu den asuntunan di droga DEA. Asina polis kolombiano a anunsiá. Estados Unidos a pone un rekompensa na disposishon di 5 mion di dòler pa su detenshon. Ta sospechá Comba, manera nan ta yama Calle Senna, di kontrabanda di droga na gran eskala pa Estados Unidos. E tabata lider di e agrupashon para militar Los Rastrojos.Comba lo a entrega su mes djabièrnè i entre tantu nan lo a trasladé kaba pa New York. Segun e minister di hustisia kolombiano Esguerra e baron di droga lo a negoshá luna largu riba su entrega. E lo a ofresé informashon balioso tokante otro baron di droga a kambio di menos kastigu.

FARC ta afirmá sekuestro di periodista
E movimentu terorista kolombiano FARC a afirmá ku nan a sekuestrá un periodista franses. E reportero a disparsé siman pasa durante un tiroteo entre ehersito kolombiano i luchadónan di FARC. E franses tabata raportando tokante e tiramentu pero segun FARC e tabata hasi propaganda pa ehersito kolombiano. FARC ke duna e periodista su libertat solamente despues di un diskushon amplio tokante libertat di informashon. Antes e organisashon terorista a yega di sekuestrá hende diferente be, pero resientemente el a primintí di stòp ku esaki. For di luna pasa FARC no tin ni polis, ni militar ni polítiko komo rehen; pero si algun suidadano.

Santorum ta sostené Romney
Rick Santorum a ekspresá su sosten pa Mitt Romney komo kandidato presidenshal pa partido Republikano. Den un imeil pa su simpatisantenan Santorum ta skibí ku e ta hasi tur su esfuerso pa derotá presidente Obama na novèmber awor. Santorum, èks senador di Pennsylvania a legumai e bataya pa bira kandidato presidenshal republikano luna pasa.  E tabatin un retraso grandi riba Romney. Elekshonnan presidenshal na Estados Unidos ta tuma luga dia 6 di novèmber.

Atentadó di bòm den karsonsio
CIA ta bisa ku un atentadó di al-Qaida a frakasá. Dia 2 di mei, un aña pasa ku a mata lider di al-Qaida Osama bin Laden, e organisashon terorista kera kometé un atentadó riba un avion merikano. E organisashon a desaroyá un bòm di karsonsio nobo pa hasi e atentadó. Ku un tipo di bòm asina'ki un hómber kera hasi un atentadó tambe riba promé dia di pasku na 2009 riba un buelo di Amsterdam pa Detroit. Pero e atentadó ei a frakasá. No ta konosi kiko a pasa ku e sospechoso.

Premio literario pa A.F.Th. van der Heijden
Outor A.F. Th. van der Heijden a gana e presitigioso premio literario Libris Literatuurprijs. El a gana e premio di 50 mil di euro pa su buki Tonio. E buki ta trata su úniko yu hómber ku a fayesé dos aña pasa despues di un desgrasia ku baiskel. Den e buki e outor ta hasi un rekonstrukshon di e último dianan den bida di su yu. Van der Heijden mes no a presensiá entrega di su premio ayeranochi den Amstel Hotel na Amsterdam. For di dia ku su yu a muri, e no ta sali mas for di kas.

Pronóstiko di tempu na Hulanda
Awaseru ta kai den e parti wèst di pais, den parti ost tin un tiki solo. Temperatura ta 16 pa 20 grado. Mayan ta hopi nublá i áwaseru ta kai. Temperatura ta 18 grado.