Minister Gerd Leers di Imigrashon i Asilo mes ke stipulá e tèmpo pa hasi palabrashonnan ku otro paisnan den Reino tokante eksigenshanan pa imigrante." Esei lo duna e resultadonan di mas mihó", asina Leers a bisa awe durante diliberashon ku parlamentu hulandes. Leers a reakshoná riba e proposishon di lei di VVD den kual e otro partido di koalishon ta boga pa eksigenshannan mas severo pa imigrantenan for di Kòrsou, Sint Maarten i Aruba. Hulanda ta deliberando ku e paisnan aki tokante un lei di tráfiko di persona nobo den Reino.

Hulandes pèrdi na Filipinas
Ehersito filipino ta buskando e hulandes Ewold Horn. Asina e komandante di marina lokal ta informá. Sentenares di mariner i otro personal di marina ta buskando den mondi di mangrove riba islanan chiki den parti sur di Filipina. Segun e komandante Horn i un turista swiso, ku tambe nan a sekwestrá, lo ta riba un di e islanan den regio. E hulandes i e swiso tabata studia para riba un di e islanan di e archipiélago Tawi Tawi ora a sekwestranan. No ta konosi ta ken a sekwestra e dos hòmbernan.

Sospechoso hulandes detené na Colombia
Colombia a detené un hulandes paso e lo a asesiná un hòmber ku tabata studiando pa bira polis na Kòrsou. A ekstraditá e hòmber wikènt k'a pasa. Ta akus'é di a tira riba e polis den un nightclub fin di òktober 2010. E polis a fayesé despues na hòspital. E sospechoso a hui bai Colombia. A detené djabièrnè den un skol di deporte. Ta asosiá e hòmber ku un gèng ku tabata ekstorshoná hende na Kòrsou. I segun prensa colombiano e hòmber lo tabatin kontakto tambe ku gèngnan kriminal ku tabata kana mata hende na Amérika Sentral. Polis na Colombia a haña pista di e hòmber despues di un investigashon ku a dura sinku luna den kual nan a traha estrechamentu ku polis na Kòrsou i ku Interpol. E sospechoso tabata biba ilegal na Colombia.

Obama ke un término mas
Presidente merikano Barack Obama ta haña ku e meresé un di dos término. Obama a bisa esaki djadumingu den un entrevista ku NBC. E entrevista tabata tokante ekonomia merikano ku lo ta drechando. Lo tin tambe mas kupo di trabou ta bin aserka. Djabièrnè a anunsiá ku na yanüari a bin 243.000 kupo di trabou aserka na Estados Unidos. E sifra di desempleo lo a baha te 8.3 porshento. Obama a mustra ku esaki ta un kontraste grandi kompara ku e krisis ekonómiko i desempleo haltu ku tabatin el a heredá di su antesesor republikano na 2009. Esaki segun Obama ta hustifiká su reelekshon. E elekshonnan presidenshal na Merka ta tuma luga dia 6 di novèmber.

Amante di Kennedy ta revela relashon
Un amante di èks presidente John F. Kennedy a revelá detayenan di nan relashon den un buki. E tabata un relashon di un aña i mei, te dia a asesiná Kennedy na 1963. E mucha muhé ku e tempu ei tabata tin 19 aña tabatin kuater dia ta traha na Kas Blanku ora ku Kennedy a manda yam'é bin den su ofisina. Ei el a kita e mucha muhé su paña i su virgenidat. E mucha muhé ta skibi tambe kon Kennedy a drog'é ku droga pa oumenta gana di sèks i kon e mester a hasi sèks ku un otro trahado mientras Kennedy tabata wak. E èks amante di Kennedy ta bisa tambe ku e presidente merikano a papia kuné tokante e krisis na Cuba tempu ku un gera nuklear tabata menasando entre Estados Unidos i Union Soviétiko. Segun e èks amante Kennedy lo a preferá pa su yunan tabata kora enbes di morto.

60 aña riba trono
Awe Queen Elizabeth ta 60 aña reina di Gran Britania. Na 1952 el a subi trono komo susesor di rei George di 6, despues ku esaki a fayesé a konsekuensha di kanser di pulmon. Den un deklarashon Elizabeth a gradisi pueblo pa e sosten i animashon ku el a risibí último 60 aña. E ta bisa ku e ta hopi komové pa e tantísimo karta i karchi ku el a risibí pa motibu di su hubileo di djamanta. E no ta selebra su hubileo awe. E festividatnan mas importante ta tuma luga na yüni. E or'ei tin entre otro un paseo di boto di barkunan históriko riba Theems, ku Lareina mes na kabes. Elizabeth ta e di dos monarka britániko ku a sinta asina largu riba trono. Reina Victoria a sinta mas largu, kasi 64 aña.

Deporte
E tùrner hulandes/surnameo/antiano Jeffrey Wammes ta bai wes pa e por partisipa na Weganan Olímpiko. E no ta diakuerdo ku e desishon di bònt di tùrn pa nominá Epke Zonderland i no e seka NOC/NSF. Wammes a kumplí ku tur eksigensha, mientras Zonderland mester demonstra ahinda si e ta den bon kondishon. E bònt di tùrn ta bisa ku Zonderland tin mas chèns riba un medaya. Wammes ta enfatisá ku e no tin nada kontra Zonderland, pero ku e ta kuestioná e manera di prosedé di e bònt, ku e no ta haña ophetivo. Tratamentu di e kaso lo tuma luga dia 21 di febrüari.

Kentura ta subi
Kentura di Elfsteden a kuminsa kontamina hende ku ta hunga plaka tambe. Riba e sait di hunga plaka Unibet.com mas o menos 1000 persona a kuminsa pusta riba e pregunta si e kareda di skats ta tuma luga entre awor i aprel. 63% ta kere ku e ta tuma luga. E promedio di e plaka ku e personanan ta hunga ta 10 euro. Na e momentunan aki esnan ku ta bisa ku e kareda ta sigui ta haña 1,40 euro pa kada euro ku nan hunga. Esnan ku bisa, nò e no ta tuma luga ta haña 2,70 pa kada euro, si enberdat e kareda di skats no tuma luga.
E asusashon di Friesche Elfsteden a tene un konferensha di prensa awe mainta pa informá ku ainda nan no sa si i ki dia e kareda di skats ta tuma luga. Mester vris en todo kaso hopi algun dia promé ku por bisa ku esaki ta bai sosode di bèrdè. Djarason hefenan di rayon ta bolbe reuni.

Wer na Hulanda.
Awe den dia tin solo i e temperatura ta 5 grado. Awenochi ta bira nubla i tin chèns ku sneu ta kai. Dianan bindero ta keda hopi friw.