Parlamentu lo aprobá fondo permanente di Euro
Mañan parlamentu hulandes lo vota pa aprobá e fondo di emergensia di euro, ESM. E debate a kuminsá ayeranochi i a sigui awemainta pero pa motibu di agendanan yen a disidí di para e reunion i sigui mañan. Lider di PVV, Geert Wilders, ta mira e posibilidat pa retrasa e debate. E ta kontra e fondo permantente pa salbanguardia e moneda euro. Ayeranochi tambe el a pidi pa pospone e reunion. E ke warda té ora e proseso kontra e fondo pasa den korte. Mas aleu Wilders ta haña ku un gabinete demishonario no tin e outoridat pa aprobá un fondo di emergensia i duna 4.5 miar di euro. Pero gran mayoria di Parlamentu Hulandes ta di akuerdo ku fondo.

Disturbio den prizòn Point Blanche na Sint-Maarten
Tabatin un disturbio den prizòn Point Blanche na Sint-Maarten. Detenidonan a nenga di bai bèk nan sèl pasombra ya pa dos dia kaba nan no tin awa di kranchi. Un pòmp ku ta defekto no ta pòmp awa di manera ku e por subi seru yega na e prizòn. Mes ora polis tabata kla pa drenta den akshon. Minister Spies enkargá ku asuntunan den reino a skibi un karta na parlamentu tokante e situashon prekario i ahigiéniko ku e prisoneronan ta aden.

Kantidat di notifikashon di agreshon den avion ta subi
Mareshosé ta hañado mas i mas notifikashon di agreshon ku ta tuma lugá na bordo di avion. E aña aki a detené 10 pasahero agresivo. Ta mesun tantu ku a detene den henter aña 2011. Ta nota e subida pasombra kompanianan aereo ta denunsia e kasonan mas regularmente. Ayernochi a detene un pasahero na Schiphol na momentu ku el a yega Hulanda. E hòmber no tabata ke mara su faha di seguridat. Ora e stiwardès a pidi'é pa hasi esei, el a menasa e muhé.

Egipto ta bai urna
Mas ku 50 mion siudadano egipsio por bai urna awe i mañan pa skohe un presidente nobo. Ta e promé elekshon despues di kaida di Hosni Mubarak na febrüari aña pasá. 13 kandidato ta partisipá na e elekshon. Ta kere ku kuater di nan lo por gana e elekshon. Un di nan ta Amr Moussa. E tabata minister enkargá ku asuntunan di eksterior durante gobernashon di Mubarak. Tambe èks promé minister Ahmed Shafik a postulá su mes komo kandidato presidensial. E ta faborito serka ehèrsito, e ta un èks komandante di forsa aereo. Abol Fotouh tambe ta un di e kandidatonan preferí. Fraternidat musulman a sak'é for di nan organsashon na momentu ku el a postulá su mes komo kandidato. Ta spera ku niun kandidato lo haña mayoria di vota den e promé buèlta. E di dos buèlta ta tuma lugá riba 16 i 17 di yüni.

Por bai bin investigashon tokante subimentu di markado di bolsa di Facebook
Kontroladó di bolsa merikano ta evaluando si ta bai insisia un investigashon riba Facebook su subimentu di merkado di bolsa. Entretantu e promé invershonistanan a hiba keho na Facebook i na e bolsa. Ayera un biaha mas e preis di akshon di Facebook a baha. Subimentu di merkado di bolsa di Facebook ta birando un fiasko. Tur kos a kana robes na momentu ku e kompania di enternèt a subi merkado di bolsa siman pasá djabièrnè. E sistema di merkado no a traha bon i sòru pa retraso. Tampoko sa si a haña tur enkargo di kompra i benta.

Polis ta tene razia na Rotterdam i aresta seis persona
Polis na Rotterdam a tene un razia ayeranochi i a detene seis persona. Ta sospecha nan di trafikashon di droga. Kuerpo polisial a tene e razia na Rotterdam-Zuid. A konfiská droga i miles di euro. Aña pasá kuerpo polisial di Rotterdam a instituí un tim speshal pa investigá trafikashon di droga na Rotterdam Zuid. Bendementu di droga ta sòru pa basta molèster pa habitantenan.

Lei nobo di asilo pa mucha: 500 mucha por bini na remarke pa keda Hulanda
500 mucha buskadó di asilo lo bini na remarke pa keda Hulanda, esta segun e lei nobo di asilo pa mucha. Unicef Nederland i Defence for Children a partisipá esei ayera durante e programa notisiero Nieuwsuur. Segun e proposishon di lei, e muchanan ku ta kedando mas ku 8 aña na Hulanda lo bini na remarke pa haña un pèrmit di estadia permanente. Nan lo tin nan raisnan na Hulanda. Minister Leers enkargá ku Imigrashon, Integrashon i Asilo ta kontra e lei. E ta teme ku di e manera aki famia di e mucha tambe lo ke keda Hulanda.

Coach Van Marwijk ta rabia riba simpatisantenan di Bayern München
Bert van Marwijk, treiner di selekshon Oraño, ta rabiá riba simpatisantenan di ekipo Bayern München. Nan a "buuu" futbolista Arjen Robben ayeranochi na momentu ku el a subi fèlt. Motibu ta e pinalti ku el a tira afó durante wega kontra Chelsea durante final di Champions League. Bo no ta hasi esei ku bo mes hungadó. "Inaseptabel", asina Van Marwijk a ekpresá su mes. Oraño a pèrdè e wega kontra Bayern, 3 pa 2.

Wer na Hulanda:
Ta birando mas nublá prinsipalmente den interior. Ta spera kaida di awaseru i mal wer posiblemente ku kaida di hagel. Ta hopi kayente. Mañan tambe solo ta bria. Temperatura ta entre 22 i 28 grado.