Mal wer na Sürnam
Bientunan fuerte, hopi awaseru i olanan grandi den laman, mal wer a asotá Sürnam. Parti di dak di Hòspital Sint Vincentius a waya bai pero tambe daknan di otro kasnan. Gran parti di e pais no tin koriente. Polis, brantwer i militarnan ta dunando yudansa pa limpia i kita restunan di dak, palunan ku a kai pero tambe palunan di koriente ku a keda destruí. Sentro Nashonal di kombatimentu di katástrofe a habri un sentro di krisis.

Tanja Jadnanansing number 4 riba lista di PvdA
Tanja Jadnanansing ta number 4 riba lista di partido PvdA ku e partido ta partisipa na elekshon di parlamentu kune na sèptèmber. Esaki ta hopi remarkabel. E bosero di enseñansa tabata number 28. E kandidato ku a subi mas di puesto riba e lista ku e partido ta presentá awe ta Desiree Bonis. E ta kandidato number 9. Bonis tabata embahador na Siria i ta traha awor na ministerio di asuntunan di eksterior. Un otro kandidato den top 10 di e partido ta John Kerstens. E ta presidente di sindikato FNV Konstrukshon. Awemèrdia e Partij van de Arbeid ta presentá su lista nobo.

Ta kita shèf di polis merikano for di trabou
Estado di Florida a kita shèf di polis for di trabou enkonekshon ku e kaso di Trayvon Martin. E kaso a sòru pa basta indignashon pasombra promé polis no kera arestá e sospechoso ku a tira un hóben pretu mata. Un vigilante a tira Trayvon Martin. Hopi merikano ta di opinion ku ta trata di un asesinato rasista. Dado momentu a disidí di arestá e vigilante tòg, ta akus'é di homisidio.

Gobièrnu di gresia ta huramentá
Posiblemente e gobièrnu nobo di Gresia enkabesa pa promé minister Samaras ta huramentá awe. E partidonan den koalishon lo ta yegando na un akuerdo, ta trata di partido konservativo Demokrasia Nobo i dos partido sosialista Pasok i partido demokrátiko iskierdista. No sa ahinda ken lo bira minister den e gabinete nobo. Solamente sa ken ta bira e minister di finansas. I esei ta Vassilis Rapanos, direktor aktual di banko sentral.

Tin ku keda warda riba resultado di elekshon na Egipto
No ta bai partisipá resultado di elekshon na Egipto awe, manera a palabrá anteriormente. Komishon di elekshon no por bisa ki dia ta bai hasi esei. E komishon mester di mas dia pa trata keho di kandidatonan. Tantu kandidato Mohammed Morsi komo Ahmed Shafiq ta kleim di ta e ganadó. Mas ku 400 keho a drenta tokante elekshon na Egipto.

Prínsipe William di Gran Bretania ta kumpli 30 aña
Awe prens William di Gran Bretania ta kumpli 30 aña. Esei ta nifiká ku e ta haña disposishon di e mionesnan ku su mama, prinsesa Diana, a laga atras p'é. Diana a laga mas ku 13 mion pond atras pa su yunan despues ku el a muri den un aksidente di outo. Entretantu e montante lo a subi bira mas ku 20 mion di pond esta mas ku 25 mion di euro. Diana a skibi den su testamento ku su dos yu hòmbernan lo haña mes un montante na momentu ku nan hasi 30 aña. Medionan di komunikashon britániko ta spekula ku William i su kasá Catherine lo kumpra un kas ku e sèn. N'é momentunan aki e pareha ta biba den e palasio di prínsipe Charles ku ta keda na Londen.

Vietnamesnan involukrá den kontraband di marihuana na Hulanda
Mas i mas kriminal vietnames ta involukrá plantashon di marihuana na Hulanda. Pero nan no ta dominá e merkado manera ta e kaso na Alemania, Gran Bretania i Slovakia. Esei a sali for di un investigashon ku konseho di mando polisial a hasi. A deskubrí diferente plantanshon di vietnamesnan, mayoria ta keda den bisindario di Helmond, prinsipalmente den kas di famia. Algun di e plantanshonnan aki ta ligá ku krímen internashonal.

Reunion de parlamentu hulandes ta bolbe kuminsá lat
Atrobe un reunion di Parlamentu Hulandes ta kuminsá lat. Agèndanan yen ta pone ku tin ku kuminsá mas trempan ku debatenan pero meskos ku ayera no por a kuminsá na tempu pasombra tiki parlamentario tabata presente. Mester tin por lo menos 76 parlamentario pa por kuminsá ku e reunion.

Aksidente grave riba karetera prinsipal A73, shofùr ta fayesé
Un shofùr di trùk a fayese awemainta riba karetera prínsipal A73 na momentu ku e tabata pará banda di su trùk. E aksidente a sosodé na Nijmegen. E outo ku a okashoná e aksidente a kore bai. Polis ta suponé ku e shofùr a baha for di e trùk pa mara su karga. Su identidat no ta konosí.

Wer na Hulanda:
Awemainta mainta solo ta bria i ratu ratu ta nublá. Temperatura ta entre 22 i 25 grado. Awemèrdia ta bira mas nublá i awa ta kai. Mas den anochi tin mal wer ku chèns di bos i welek i bientu fuerte. Mañan solo ta bria pero ta nubla tambe, mèrdia awa ta kai. Ta un poko mas fresku. Temperatura ta 19 grado.