Gerdi Verbeet lo no bolbe bèk den parlamento despues di elekshon. For di 2001 Verbeet ta den parlamento i for di 2006 e ta presidente. “Si awor mi skohe pa un lugá riba lista di PvdA, mi ta obligá di ta disponibel kuater aña mas, pero awor tempu a yega pa otro asuntu,”e ta bisa den un deklarashon. E ta enfatisá ku kasi 20 aña el a traha den òf den besindario di Binnenhof.

Gobièrnu nobo pa Sint Maarten
Sint Maarten tin un gobièrnu nobo. Djasabra e koalishon di gobièrnu bieu a pèrdè mayoria den Staten pasobra United Peoples Party a retirá su sosten. Presidente di frakshon Romain Laville di UP ta sigui komo miembro independiente. A forma un koalishon nobo entre Democratic Party di promé minister Sarah Wescott-Williams, partido di oposishon National Alliance i tres miembro di Staten independiente, entre nan Laville. E koalishon nobo tin 10 di e 15 asientonan den Staten. Wescott-Williams ta keda promé minister. Lo remplasá e kuater ministernan di UP.

Na bishita di Obama eksploshon na Kabul
Den e kapital afgano Kabul tabatin sigur tres eksploshon djis despues di e bishita di sorpresa di presidente Obama. Taliban a eksihí responsabilidat pa por lo ménos un di e eksploshonnan. Despues di e eksploshonnan tabatin tiramentu tambe. Segun un hefe di polis a kai sigur seis morto. Obama tabata na Afganistan pa un bishita kòrtiku i ònferwagt na trupanan merikano i na presidente afgano Karzai. Obama i Karzai a firma un tratado, kaminda ta tene e posibilidat habri pa un parti di e merikanonan keda na Afganistan despues di 2014 tambe. Nan por yuda train e trupanan afgano di seguridat.

Hòmber kulpabel di atentado suisido
Na New York a haña un hòmber kulpabel di a planeá un atentado den metro di New York. Na 2009 e ker a kometé un atentado suisido den metro, djis promé ku e konmemorashonnan di e atentadonan di 11 di sèptèmber. E hòmber ta un merikano nasé na Bosnia di 28 aña, i e por haña kastigu di bida. Na sèptèmber lo disidí eksaktamente kiko lo ta su kastigu.

Disidente Chen a sali for di embahada merikano
E disidente chines Chen Guang Chen a bandoná embahada merikano. Segun un trahadó Chen a sali for di e edifisio di su propio boluntat. A hib’é un hòspital kaminda el a reuní ku su famia. E disidente siegu tabatin seis dia den embahada merikano despues ku el a hui for di su kas den e provinsia Shendong. Ei Chen tabatin aresto di kas. E tin aña ta lucha kontra e polítika chines di un yu so. E minister merikano Clinton ta na China awe pa un deliberashon anual stratégiko i ekonómiko. Tabatin riesgo ku e asuntu di Guang Chen, lo a kita atenshon di e deliberashonnan. Gobièrnu chines ke pa Merka pidi despensa pa e estadia di Chen den embahada.

Bolivia mester kompensá kompania ku a nashonalisá
Union oropeo a pidi Bolivia pa kompensá e kompania di elektrisidat spaño REE pa nashonalisashon di un empresa di nan. Segun un bosero di Komishon oropeo nashonalisashon ta un señal negativo pa invershonista di eksterior. Ayera presidente Evo Morales a ordená ehérsito pa konfiská e edifisionan di TDE, e transportadó di mas grandi di e pais latino merikano. El a motivá su desishon komo un homenahe na pueblo boliviano, ku segun e ta lucha pa haña nan materia prima natural bèk.
 

Spies ta pèrmití burka atrobe
Minister Spies di CDA no ta mira nada mas den un prohibishon di burka i di nashonalidat dòbel. Komo minister di asuntunan interno el a defendé e dos plannan aki. VVD i CDA a palabrá e asuntunan aki ku PVV na 2010. Despues ku gabinete a kai e proposishonnan aki a kita for di mesa, asina Spies a bisa De Volkskrant. Na yanüari ainda Spies a anunsiá ku gabinete lo sigui ku e prohibishon di burka. El a yama e prohibishon “sumamente importante”. Ayera Spies a anunsiá ku e ta kandidato pa bira kabes di lista di CDA.

A arestá un sospechoso di atrako fatal
Polis a kue un di e sospechosonan di e atrako fatal riba e hoyero di Den Haag Ruud Strattman. Banda di mei anochi a arestá Ziya B. di 19 aña den e bario Schilderswijk na Den Haag E di dos sospechoso ainda no a kue.

Aktivista di Greenpeace ta baha den planta nuklear
Na Fransha un aktivista di medio ambiente di Greenpeace ku un paraglider a baha riba tereno di un sentral nuklear. E ker a demonstrá ku e sentral tin mal seguridat. E hòmber a pasa riba e sentral ku e glider, tira un bòm di huma riba e tereno i despues a baha paden riba e tereno di e sentral na sùit ost di Fransha. A arest’é mes ora. Aña pasá gobièrnu franses a primintí ku lo hasi e sentralnan nuklear mas seif. E aktivista ker a mustra ku ainda esaki no a sosodé.

Gobernador Scott di Florida ta taha negoshi ku Cuba i Siria
Gobernador Ricky Scott di Florida ayera a firma un kòntrakt ku ta taha gobièrnunan lokal den e estado pa sera kòntrakt ku empresa ku ta hasi negoshi ku Cuba òf Siria. Segun Scott gobièrnunan no por duna sosten na diktadura ku ta oprimí nan populashon. No ta sigur si e lei lo tin efekto pasobra ta gobièrnu federal na Washington ta trata ku maneho di den eksterior. E gobernador ta spera ku Kongreso i presidente Obama lo aprobá e reglanan nobo.

Pronóstiko di wer
Promé tin periodo ku solo. Den kurso di dia lo bini mas nubia i for di den suit tin chèns riba yobida. Lo bira 14 grado