Minister Winston Lackin rabiá ku alegashonnan kontra Desi Bouterse
Winston Lackin minister enkargá ku asuntunan di eksterior di Sürnam ta rabiá ku akusashonnan dirigí kontra promé minister Desi Bouterse. Bouterse lo ta involukrá den trafikashon di droga. Ayera a sali for di investigashon polisial ku dealer di kokaina na Amsterdam, lo a menshoná nòmber di e presidente di Sürnam. 'Nunka Hulanda lo stòp di difamá Bouterse. Mi ta ripará esei diferente biaha durante kombersashonnan ku kontaktonan internashonal', asina Lackin a deklará na wèpsait notisiero Starnieuws. Tambe chèf di kantor di Bouterse a bisa ku su presidente no ta involukrá den trafikashon di droga.

Rutte i Samsom tin konfiansa den kolaborashon
Mark Rutte, lider di VVD i Diederik Samsom, lider di PvdA tin konfiansa den un koperashon. Esei nan a bisa na final di e promé reunion konhunto ku eksplorador polítiko Kamp. Segun Rutte i Samsom tin un fundeshi pa un kolaborashon fruktífero entre VVD i PvdA. Niun di dos a remarká algu tokante un kolaborashon ku un di tres partido.

Ta haña mas ku 5 tonelada di kokaina na Colombia
Polis na Colombia a bin deskubrí mas ku 5 tonelada di kokaina na diferente region na e pais. Na provinsia La Guajira a konfiská kasi 2 tonelada di droga. A deskurbrí kasi mesun montante tambe na region Cauca, region ku te algun tempu pasá tabata den man di organisashon di guerilla FARC. Tambe a konfiská droga den region na parti oriental. Segun outoridatnan ta trata di kantidat di droga ku ta produsí pa paga aktividatnan di FARC. Entre yanuari i yüli di e aña aki ya kaba a deskubrí mas ku 116 tonelada di kokaina na Colombia, ta trata di 43 porshento mas ku aña pasá. Otro luna kombersashonnan di pas entre FARC i gobièrnu kolombiano, ta tuma lugá na Noruega.

Hayazgo di kurpanan sin bida mutilá na Mèxico
Na Mèxico a haña kurpanan sin bida mutilá i mará na otro di 17 hòmber. Lo a tira nan mata. A haña e restunan humano riba tereno di un finka pegá ku un karetera prinsipal na parti sentral wèst, pegá ku Tizapan el Alto. Identidat di e kurpanan no ta konosí. Pa años kaba bandanan di droga ta batayá i likidá otro.

Dosentenan di skol ta sigui wèlga na Chicago
Wèlga di e 30.000 dosentenan di skol ku a kuminsá siman pasá na Chicago ta sigui e siman aki. Pa e motibu ei mas ku 400.000 alumno ta na kas na e di dos siudat di mas grandi di Merka. Alkalde Rahm Emanuel a partisipá ayera ku e lo entamá un kaso kontra e dosentenan pa asina pone un fin na e wèlga di enseñansa públiko. E dosentenan ta kontra algun medida di presidente Obama. El a disidí di amplia orario eskolar, posponé oumento di suèldo i hasi regla di kontrolá dosentenan mas estrikto. E dosentenan tin prinsipalmente difikultat ku e delaster regla. Hopi dosente ta teme ku ta bai hasi uzo di e regla ei pa kita nan for di trabou.

Ta reskatá kurpanan sin bida di víktimanan di aksidente ku alumno di KLM Flight Academy
Na siudat merikano Arizona a rekuperá kurpanan di e víktimanan di aksidente aereo ku alumno di KLM Flight Academy. Ta trata di dos hulandes i un merikano. Siman pasá djaweps e avioneta a aksidentá. Despues di dos dia a haña e avion. E avioneta lo a bula dal kontra un seru, segun outoridatnan. No ta konosí kon esei por a sosodé, pasó ora ku e avioneta a despegá, wer tabata bon. Awe a tene un servisio di konmemorashon pa e víktimanan, esta e studiante i su instruktor, na aeropuerto Eelde. Ta trata di e studiante di mas yòn di KLM Flight Academy.

Shell lo no logra saka gas i petroli for di den awanan di Alaska
E aña aki Shell lo no logra saka gas i petroli for di awanan di Alaska. E kompania a hañ'é ku un kontratempu tékniko. Un tapadera speshal pa tapa buraku ora kos lèk a kibra. Basta tempu kaba organisashonnan ambiental ta purba wanta trabounan di Shell den e area ei. Fondo mundial di Naturalesa a atvertí kaba ku lo por surgi problema ku e tapa. Siman pasá Greenpeace a hiba akshon kontra boramentu na Alaska. Na Hulanda a mara konduktor di kombustibel na otro na pòmpstashòn pa outomobilista no yena nan tanki ku gasolin.

Ivan Rodriguez coach nobo di Mr. Cocker HCAW
Ivan Rodriguez di 40 aña ta e coach nobo di ekipo di beisbòl Mr. Cocker HCAW. John Debbaut i Jose Baez lo asistí Rodriguez ku su ekipo na Bussum. Ahinda tin ku agregá un coach di picheo. E ekipo di beisbòl hulandes a pèrdè final ayera durante Kampionato Oropeo di beisbòl. Nan a pèrdè 3 pa 8 kontra Italia.

Wer na Hulanda
Ta nublá pero seku. Den transkurso di mèrdia solo lo bria. Temperatura ta entre 18 i 19 grado.