Drone ta mata lider di al-Qaida na Pakistan

Merikanunan a mata lider di al-Qaida na Pakistan, asina funshonarionan di gobièrnu pakistani a bisa agensia di prensa franses AFP. Ta trata di Badr Mansoor. Supuestamente el a peresé n'e region nortwèst di Pakistan durante atake k'un drone, ku ta un avioneta sin tripulante. E pakistaninan ta bisa ku un miembro di al-Qaida a konfirmá morto di Mansoor. E merikanunan mes no a reakshoná ainda riba e notisia akí.

Algun siman mas pa Gresia kaba ku pakete
Union Oropeo i Fondo Monetario internashonal ta duna Gresia dos siman mas di tempu pa keda kla ku'n pakete di medida di ousteridat, asina agensia di prensa Bloomberg ta informá. E notisianan ku ta drentando for di sírkulonan dje Union i di IMF mes ta poko diferente: e griegonan lo tin di ekonomisá muchu mas di loke nan a fèrwagt. Lo a dunan nan tres siman mas pa kaba di formulá e plannan nobo di ekonomisashon. Loke sí ta sigur ta ku gobièrnu griego mester ekonomisá algun sentenar di miones di euro èkstra, pa bolbe bin na remarke pa yudansa di emergensha. Mester redusí suèldu mínimo, band'i 15.000 ámtenar tin ku bai kas anto mester kòrta penshun, kos ku hopi griego i algun gobernante no ta dispuesto na aseptá. Awetardi e ministernan oropeo di Finansa ta reuní n'un kumbre ku a konvoká den purá.

Apsolushon aleman reporteronan hulandes
Wes aleman a apsolvé dos periodista dje programa di televishon hulandes EénVandaag. Jan Ponsen i Jelle Visser mester a komparesé dilanti mesa bèrdè, pasó nan a filma Heinrich Boere, un kriminal di guera aleman, ku kámara skondí na sèptèmber di 2009. Si a sentensiá nan, nan lo a bai tres aña será. Boere mes a entamá e kaso. Den di Dos Guera Mundial e tabata miembro djun komando di morto di SS. Boere ta sintando un kastigu di bida largu den prizòn n'un hòspital di prezu na Nord-Rhein-Westfalen.

Komisarionan di Ajax a disidí di baha numa
Hunta di Komisario di Ajax a disidí di baha, asina a kaba di partisipá aworatu ei. Posishon dje komisarionan a bira insoportabel despues di dikshon di wes dje siman akí. Wes a husga ku nan no tabatin derechi di nombra Louis van Gaal komo direktor, sin konsultá ku Johan Cruijff, e di sinku komisario di Ajax.

Árabenan ke manda opservadó Siria atrobe
Liga árabe ke reanudá mishon di opservashon na Siria, segun Ban Ki-moon, sekretario general di Nashonnan Uní, kende a kòmbersá ku presidente dje Liga. Fin di luna pasá mester a suspendé e mishon debí na violensha persistente n'e pais na Medio oriente. E echo ku Konseho di Nashonnan Uní no a logra akordá un resolushon kontra Siria ta sumamente desastroso, segun Ban Ki-moon. Falta di konsenso den seno dje Konseho ta enkurashá Siria pa intensifiká e guera kontra su mes pueblo, na pareser dje hefe di Nashonnan Uní. Ehérsito di gobièrnu sirio a bombardeá siudat Homs pa di sinku dia konsekutivo. Habitantenan dje siudat sirio ta bisa ku e bombardeo djayera tabata esun mas pisá.

Estado Washington tambe ke kasa homo
Ayera parlamentu merikanu di Washington, estado den nortwèst di Merka a aprobá un konsepto di lei definitivamente ku ta posibilitá matrimonio homoseksual. Generalmente ta asumí ku gobernador Christine Gregoire lo firma e lei otro siman. Ta nifiká ku Washington ta e di shete estado merikanu ku ta ankra matrimonio homo den lei, despues di Connecticut, Iowa, Massachussetts, New Hampshire, New York, Vermont i kapital Washington. Na California ainda kasamentu homo ta tópiko djun lucha hurídiko. Djamars korte a dikta ku prohibishon di kasamentu di hende dje mes sekso ta pugna ku konstitushon merikanu.

Desmantelashon grupo di skimmer di Rumania
Polis na Den Haag a desmantelá un banda di skimmer di Rumania. Despues djun atrako na ka'i hende, polis a logra detektá nan. E organisashon kriminal a instalá aparato pa skem tarheta bankario na bankomátiko. Ku e imitashonnan nan tabata lanta e plaka den eksterior, entre otro na Repúblika Dominikanu. E grupo a hòrta miones di euro. Polis di Hulanda a kolaborá ku reshèrshi di Rumania i a detené 17 hende, 15 na Rumania i dos na Hulanda.

NS ke dal bai ku sait di reserva pa mas info
Kompania di trein hulandes, Nederlandse Spoorwegen tin pensá di bin ku'n di dos wèpsait ku informashon pa biahero. Por uz'é e or'ei si esun ofisial bira sobrekargá ku bishitante, asina bosero di NS a bisa. Un alternativa ta pa amplia kapasidat dje aktual wèpsait un tiki mas, kos ku a sosodé kaba aña pasá. Aktualmente e wèpsite por akapará 24.000 bishita pa minüt. Promé ku esei tabata 7000. Siman pasá wèpsait di NS a aki afó vários biá despues ku yobida di sneu a brua tráfiko di trein. Hopi biahero a keha ku nan no tabata risibí sufisiente informashon.

Warda prenda presioso keda bashí despues
Un empleado di limpiesa n'un hotèl na Den Haag tabatin un fortuna na prenda hopi aña wardá den kashi. Na 2006 e dama a haña e prendanan den lòbi di hotèl. Despues ku seis luna a pasa anto niun hende no a reklamá nan na hotèl, a laga e señora di limpiesa bai kas ku nan numa. Aña pasá el a disidí di laga nan balorá nan. A bin resultá ku balor dje prendanan ta mas ku shete mion di euro. Polis a konektá e hayasgo mésora k'un denunsia fechá 2006, ku esposa di èks embahador merikanu Arnall a entregá. Entretantu e señora ei a haña tres mion bèk di seguro. Awor e dama di limpiesa ta spera ku lo dun'é dies porshento di premiashon ku sa duna esnan ku haña kos valioso, ma komo ku awor  e hoyanan ta di un agensia di seguro strañero, nan no ta obligá na pag'é.

Fanátikonan di skats no mester desesperá
Amantenan di skats no tin nodi desesperá, awor ku Elfstedentocht no ta sigui mas. Na 2010 Planbureau voor de Leefomgeving, un ofisina di planifikashon pa ambiente di biba a analisá estadístikanan di wer di henter un siglo. A resultá ku keintamentu di klima ta afektá HUlanda muchu mas den zomer ku den wenter. Den un siglo di tempu, temporada di zomer a bira un promedio di 2.2 grado mas kalor, den wenter ta 1.2 grado 'so'. Theo Brandsma, sientífiko di klima ku ta traha pa KNMI a kalkulá e chèns djun elfstedentocht pa e siglo akí a base di sifra. Si densidat di èis lo tabata e úniko kondishon, lo por tene 10 te 26 kareda di skats, ma loke ta pasa ta ku kalidat di èis tin di aber ku mas faktor, ademas di e densidat, pues e kantidat real di gira di skats ta menos e siglo akí: kuater anto si kos bai bon: dies den ún siglo.

Pronóstiko di tempu na Hulanda
Awetardi bientu ta bira di ost pa nortost. Hairu friu ta penetrá atrobe den e pais. Den oranan di mardugá shelu ta yen di strea. Temperatura ta varia entre 5 i 10 grado bou di 0, pero mañan mainta e ta parse 15 grado bou di 0. Despues tin basta solo sí i temperatura ta algun grado bou di sero.