Boletin di notisia, 12'or di mèrdia.

A rekoudá mas ku 1.5 mion durante teletòn na Kòrsou
A rekoudá 1.5 mion florin djadumingu na Kòrsou durante un teletòn pa yuda víktimanan di tormenta tropikal Tomas. Anteriormente gobièrnu di Kòrsou huntu ku komersio a duna garantia ku nan lo yuda ku 2.5 mion. Ta un montante sumamente grandi pa un akshon asina'ki na Kòrsou. Gobièrnu a atvertí habitantenan durante e teletòn ku tin mal tempu atrobe na kaminda. Ta spera hopi awa ku bos i welek i bientu fuerte awemainta. Awaseru fuerte a okashoná hopi daño na miles di kas na Kòrsou. Sigur 1000 persona a laga registrá nan mes komo víktima.

Hóben kousadó di molèster no ta drenta bario mas
Hóbennan ku ta kousa molèster den bario lo por haña un prohibishon di por lo ménos 2 aña. Den e periodo akí nan no tin mag di bishitá e bario. Tambe hues por dikta ku e hóben no tin mag di tin kontakto ku algun persona den e bario òf ku e tin ku mèldu su mes regularmente serka polis. Minister di Hustisia, Opstelten ta skibi den un karta dirigí na parlamentu hulandes ku por hasi uzo di e medida akí pa delitonan leve manera vandalismo, uzo abiertamente di droga of aglomerashon. Un hóben ku haña un kastigu asina'ki por keda bai skol i biba na su kas. E medidanan ta konta pa hóben for di 12 aña.

Merka ta dispuesto na kita nòmber di Sudan for di lista pretu
Estádos Unídos ta dispuesto na kita nòmber di Sudan for di lista pretu, si nan referèndùm na yanüari próksimo kana bon i si respetá e resultado. Esei gobièrnu merikano a primintí presidente Al Bashir di Sudan. Merka a pone e pais riba e lista na 1993 pasombra Sudan lo ta yuda skonde teroristanan manera por ehèmpel, Osama Bin Laden. E 2 referèndùmnan ta tuma lugá despues di e tratado di pas ku a sera na 2005, pa asina finalisá guera sivil. Na yanüari habitantenan di parti sùit di Sudan ta vota pa independensia. Habitantenan di e área di frontera entre nort i sùit por vota riba na kua parti di e pais nan ke pertenesé. Presidente Bashir a deklará ku e ta aseptá solamente un union nashonal komo resultado pero en general ta spera ku Sùit Sudan lo skohe pa independensia.

Morto ta kai na Myawaddy
Sigur 7 morto a kai na Myawaddy, sitio na frontera di Birma, despues di un lucha entre militarnan i miembronan di pueblo Karen. E lucha a kuminsá despues ku un rakèt a kai riba un kas di un persona ku ta riba lista di e partido ku ta den gobièrnu. Ayera e partido akí a partisipá na elekshon na Birma. Miembronan di oposishon ta anunsiá esei awe for di Mae Sot, pegá ku frontera birmes na Myawaddy. Gobièrnu a konfirmá e lucha. Tres siudadano a pèrdè nan bida durante tirotéo na Myawaddy, outoridatnan ta partisipá. E pueblo Karen ta forma parti di e poblashon di 50 mion habitante di Birma. 7 porshento ta Karen.

Mandatarionan di paisnan oksidental ta kondená akshon na Birma
Mandatarionan di paisnan oksidental no tin niun palabra positivo tokante e desaroyonan rònt di elekshon na Birma. E prome elekshon despues di 20 aña na e pais no a bai honestamente i kompletamente liber. Asina a reservá un kuartu di asientonan pa ehèrsito i e partidonan di mas importante di oposishon no a partisipá. Entre otro presidente Obama a ekspresá su krítika. Minister Rosenthal di relashonnan eksterior ta desepshoná ku e sistema ku elekshon a bai pero ta spera sí ku mando militar lo bin ku otro maneho i e elekshon lo ta komienso di demokrasia. No ta konosí ahinda ki dia ta partisipá resultado di e elekshon.

Transporte di residuo radioaktivo ta kore atrobe na Alemania
E transporte di residio radioaktivo ku destinashon Gorleben ta kore atrobe. Awemainta polis a kita e delaster demostrantenan di riel. Segun polis e akshon a kana trankil. Miles di persona a bai sinta riba riel ayeranochi. Polis no por a yega fásil serka e demostrantenan pasombra ta difisil pa yega na e área. A para e trein Lünenburg i a pone waya di sumpiña. Lünenburg ta keda 30 kilometer for di e stashon final na Dannenberg. Pero e trein ku residuo radioaktivo atrobe ta na kaminda pa Dannenberg. For di e stashon ei ta pone e kontainernan riba trùk rumbo pa Gorleben kaminda ku lo warda e shushi den un mina di salu bieu.

Otro siman desishon ta kai den Fórmula 1
Otro siman lo sa ken ta bira ganadó i ta haña e título mundial di Formula 1. E delaster kareda ta tuma lugá na Abu Dhabi. Spaño Fernando Alonso lo por a gana e título ayera pero durante Gran Prix na Brazil el la logra solamente di 3 lugá. Aleman Sebastian Vettel a gana e kareda. Australiano Mark Webber a finalisá na di 2 lugá. Alonso ta na kabes di klasementu ku 246 punto, Webber ta su tras ku 238 punto. Vettel ta na di 3 lugá ku 231 punto.

Wer na Hulanda:
Awemainta na parti nort solo ta bria. Na parti sùit awa ta chip. Den transkurso di dia tur kaminda ta nublá i awa ta chip. Bientu ta supla poko fuerte i temperatura ta 7 grado. Mañan tambe ta nublá, awa ta kai i ta keda friu.