Boletin di notisia, 7 di sèptèmber

Goedgedrag proponé pa bira gobernador di Kòrsou
A proponé Frits de los Santos Goedgedrag komo gobernador di Kòrsou. Lo e okupá e funshon aki for di 10 di òktober, ora Kòrsou bira pais independiente den reino. Asina Ministerio di asuntunan interior i relashonnan den reino a laga sa awe. A proponé Eugène Holiday komo gobernador di Sint Maarten, e tambe lo kuminsá 10 di òktober.

Bouterse ta bishitá Guyana
Presidente Bouterse di Sürnam a bishitá e pais bisiña Guyana. Tabata su promé bishita den ekstranhero for di dia ku el a bira presidente. Na Guyana entre otro el a papia tokante un solushon pa e konflikto di frontera ku ta eksistí pa añanan kaba. E dos paisnan tin plan pa traha un brùg riba e riu di frontera Corantijn, pa promové komersio entre e dos paisnan. Na un rueda di prensa Bouterse a laga sa ku e tin konfiansa den e proseso tokante su involukrashon den e asesinatonan di desèmber 1982. Su sentensia na Hulanda pa trafikashon di droga el a yama 'ko'i hari'. Segun e presidente e kaso ta basá riba un testigu, ku ta sera na Bèlgika pa trafikashon di droga. Dia 25 di sèptèmber e presidente di Sürnam lo papia den Reunion General di Nashonnan Uní.

Formashon di gabinete hulandes ta kontinuá
E lider di SP, Roemer a proponé na Reina Beatris pa nombra dos informadó, e èks presidente di Socaal Economische Raad Wijffels i e èks lider di SP Jan Marijnissen. Roemer ta haña ku awó mester investigá un koalishon sentro iskierdista promé. Segun e e lider di VVD, Rutte, por lo pronto a haña sufisiente chèns. E idea pa laga Rutte mes skibi un konsepto pa un akuerdo di gobernashon, Roemer ta haña 'gastamentu di tempu'. Pero djaluna anochi un mayoria ku ta sostené e idea aki a kuminsá surgi. Rutte mes i Wilders di PVV i Verhagen di CDA ta boga p'esaki. Wilders ke kuminsá negoshá atrobe ku VVD i CDA tokante un gabinete derechista, pasobra awó un kritiko importante, esta Ab Klink ,a sali. Henter meinta Lareina ta risibí presidentenan di frakshon di e parti chikitunan. Awe parlamento ta debatí ku èks formadó Opstelten tokante e fayo di formashon di un gabinete di VVD i CDA ku sosten di PVV.

Mas víktima di avalancha di tera na Guatemala
Na Guatemala djaluna trahadónan di reskate a bolbe kuminsá buska víktimanan di e avalanchanan di tera. Desena di hende a fayesé i nan ta ferwagt mas áwaseru pisá den e área. Wikènt pasá awa tabata kai asina tantu ku mester a stòp e trabou di reskate. Nan ta kere ku kantidat di morto ta rònt di sinkuenta. Presidente Colon a bisa na radio ku hendenan ta wardando kurpanan di nan famia i amigunan. Tabata un fin di siman trágiko pa e pais, segun e presidente.

Tempestat tropikal Hermine
Dilanti golfo di Méhiko a forma un tempestat tropikal ku e nòmber Hermine. Segun meteorólogo e tempestat su forsa lo oumentá i bira orkan ora e yega tera firme, probablemente na frontera di Méhiko i Estádos Unídos. Djaluna e tempestat a yega su velosidat máksimo di 85 kilometer pa ora.

Plan di Obama pa stimulá ekonomia i krea trabou
Presidente Obama ta bini ku un plan pa krea trabou i stimulá ekonomia. Mas lat awe lo e divulgá detayenan di e plan. Segun un bosero di Kas Blanku ta trata di un invershon di sigur 50 miar dòler. Ta usa e plaka pa konstrukshon i mantenshon di kaminda, aeropuerto i liña di trèin. Ademas Obama ke lanta un banko speshal pa finansiá e proyektonan. Pa haña plaka ta posíbel ku e lo limitá bentaha fiskal pa kompanianan di zeta i gas.

Hòmber a subi dak di raskashelu na San Francisco
Polis na San Francisco a arestá un hòmber riba dak di un edifisio raskashelu. E hòmber a subi Millenium Tower ku ayudo di pia chupadó. Ora el a yega dak el a pone un bandera merikano. Brantwer a trata di para e hòmber, pero nan no por a alkans’é. Segun media ta trata di un hòmber di 54 aña di edat ku a yega di subi raskashelu mas be, entre otro Sears Tower na Chicago.

Atake terorista na Pakistan
Den nortwèst di Pakistan a kai sigur 17 morto ora ku un terorista suisida a laga un outo eksplotá seka un warda di polis. E víktimanan ta polis i siudadano. E eksploshon a distruí e edifisio kompletamente, i segun outoridatnan tin sigur 40 hende heridá. A kometé e atentado den e siudat Lakki Marwat. Den e regio e ehérsito di gobièrnu ta buska luchadó di Taliban. Ehérsito merikano tambe ta ataká einan. Ku avion chikí sin tripulashon nan ta manda raket riba e kamindanan ku Taliban ta skonde.

Na Iran a aresta Abogado di Bahrami tambe
A arestá e abogado di e muhé di desendensha hulandes-iranes Zahra Bahrami. Asina e stashon di radio iranes Zamaneh, ku ta situá na Amsterdam, ta bisa. Ta akusá e abogado femenino di aktividatnan kontra estado i propaganda kontra gobièrnu iranes. E hulandes-iranes Bahrami ta será riba sospecho di e mesun aktividatnan aki. Ademas lo el a trata di smòkel droga. Bahrami por haña kastigu di morto p'esaki.

Shòk ta sigui temblor na Nieuw Zeeland
E siudat Christchurch na Nieuw Zeeland a sufri di shòknan pisa ku a sigui e temblor. Esun di mas pisá tabatin un forsa di 5 punto 4 riba eskala di Richter. A atvertí poblashon pa e shòknan aki, i ta p’esei no tabatin pániko. E temblor di e wikènt ku a pasa a afektá sigur 150 mil kas den e siudat. Ayer’anochi por a bai sentro atrobe, despues ku a kontrolá tur edifisio haltu. Ta kalkulá e daño material riba sigur un miar di euro.

Donor di spèrma ke duna hende blanku so
Un hòmber ku simpatia ekstremista derechista ku tabata ke pa usa su spèrma solamente pa pashènt blanku, a haña dos banko di spèrma na Hulanda dispuesto pa kumpli ku su deseo. Riba Internèt e hòmber ta bisa ku e ke reforsá rasa ario ku su spèrma. E asosiashon pa inseminashon artifisial awó ta bai mira si mester adaptá e reglanan pa donashon di spèrma.

Áwaseru a stroba tráfiko hulandes
E áwaseru pisá di awe meinta na Hulanda a kousa e kantidat di mas grandi di fila di e aña aki. Meinta mitar di nuebe tabatin 630 kilometer di fila. Espesialmente rònt di Amsterdam i Utrecht tráfiko tabata kompletamente será. ANWB a rekomendá hendenan pa sali kas mas lat warda e fila baha, si esaki ta posibel.

Pronóstiko di wer
Ta mashá nublá i hopi awa ta kai. Awe tardi i awe nochi shelu lo klara kuminsando den sùit. Temperatura máksimo ta di 17 grado. Mayan ta nublá i tin yobida. Temperatura mayan 18 grado.