Delegashon ruso a yega Siria

E minister di asuntunan eksterior di Rusia Lavrov a yega Siria. E ta buska un solushon diplomátiko pa e konflikto sangriente na Siria, asina prensa ruso ta informa. No ta kla ainda si e ta bin ku proposishonnan konkreto. Rusia i China a haña hopi krítika despues ku fin di siman k'a pasa nan a blòkia un resolushon di Nashonnan Uní den Konseho di Seguridat. Den e resolushon ta urgí Assad di Siria pa e baha komo presidente. E krítika no a bin solamente di paisnan oksidental, pero tambe di paisnan árabe. Mas o menos 100 persona lo a pèrdè nan bida a konsekuensha di e bombardeonan ku a tuma lugá ayera na Homs.

Militar ku man duru kontra polis
Na Salvador, un suidat na Brazil ku miones di habitante, militarnan a aktua ku man duru durante un demonstrashon pa mas salario pa polis. A plama e demontrantenan ku gas lakrimógeno i bala di rùber. Salvador ta kapital di e estado Bahia. Di e 30.000 polisnan ku tin den e suidat un tersera parti ta welga for di siman pasa. Na ke mas salario. For di dia ku e welga a kuminsa, mas ku 90 persona a asesina mas ku 90 persona. Pa garantisa seguridat na Salvador un tik, gobièrnu a buta 3000 militar riba kaya. E polisnan taden welga a okupa parlamentu regional di Salvador. Entretantu militarnan a rondoná e edifisio.

Cruijff ta haña rason
Korte di Amsterdam a duna Johan Cruijff rason den e wisio di apelashon den e kaso entre Cruiff i e otro miembronan di hunta di komisario di klùp di futbòl Ajax. Riba òrdu di wes mester a anulá nombramentu di Louis van Gaal i Martin Sturkenboom den gerensha di Ajax. Korte ta haña ku e manera di prosedé di e otro komisarionan ta inaseptabel. E komisarionan a ekskluí Cruijff di e prosedura di nombramentu di van Gaal i Sturkenboom.

Kabelnan di elektrisidat di trein a kibra
Na Woerden un trein ariba ku abou a keda pará ketu algun ora pa motibu di kabel di elektrisidat ku a kibra. Esaki a sosode awe mainta, djis despues ku ora di mas tráfiko a pasa. E trein di Utrecht pa Den Haag mester a warda te ora por a tou e bai kuné. A pesar ku e kalefakshon sentral no tabata funshona mas, pasaheronan a bisa ku nan no a sinti friu, pasó tabatin hopi hende den e trein.

Nada no ta pasa ku zona di euro
Nada no ta pasa si Gresia sali for di zona di euro. Asina komisario oropeo Neelie Kroes ta bisa awe de Volkskrant. "Kada be nan ta bisa: si un pais sali for di zona di euro, hinter e konstrukshon ta kai den otro", asina Kroes ta bisa. E no ta partidario si pa Gresia kambia euro pa drachme. E komisario oropeo tin krítika pisa riba e gobièrnu griego nobo di promé minister Papademos. Kroes ta haña ku Atenas no ta kumpli ku su promesanan. E ta haña ku Gresia mester siguí e ehèmpel di Italia, kaminda e promé minister nobo Monti si ta trahando duru den e bon direkshon pa drecha situashon finansiero di e pais.

Fayo den kámara di vigilansha
Por mira imágenan di miles di kámara di vigilansha di e marka Trendnet laif riba ínternèt. A konsekuensha di un fayo den e sistema, tur hende ku ke por mira e imágennan. Por mira esakinan entre otro via sierto mashin di buska riba ínternèt. Ta trata di kámara den edifisio pero tambe por ehèmpel den kas di hende. Bishitantenan di ínternèt a bati alarma ora ku nan a mira imágennan den kamber di mucha. Hèkernan tabata sa un luna kaba di e problema akí. E fábrika di e kámaranan no a publiká e notisia aki.

Presidente di Maladiva a entregá retiru
Presidente Mohamed Nasheed di Maladiva a entrega su retiru, despues di tres siman di protesta kontra su gobièrnu. Den un diskurso na telebishon el a bisa ku ta mihó e retira. Nasheed a pasa tur su tareanan over pa e vise presidente. Ya pa basta siman kaba ta reina inkietut na Maladiva. Pueblo a lanta kontra Nasheed pasó el a duna un wes su retiru.

CITOtoets
Mas o menso 162 mil alumno di skol básiko na Hulanda ta kuminsa awe ku nan CITOtoets. Esaki ta algu mas tantu ku aña pasa. Ta tene Citotoets, ku ofishalmente yama tèst final di enseñansa básiko, bou di alumnonan di grupo 8 di skol básiko. A base di e resultadonan ta stipulá si un mucha ta bai vmbo, havo o vwo. Probablemente ta último be ku tene e tèst na febrüari. Si tantu parlementu hulandes komo senado bia diakuerdo ku un proposishon di lei di ministerio di enseñansa, ta tene e tèst entrante otro aña na  aprel.

Raad van State ta kontra prohibishon riba burka
Hende muhé mes mester sa si e ke bisti un burka si òf nó. No ta na gobièrnu pa prohibí paña ku ta tapa kara. Asina Raad van State ta bisa tokante e prohibishon riba burka ku gobièrnu ke bai bin kuné. Gabinete a manda e proposishon di lei pa prohibi burka pa Tweede Kamer. Un di e motibunan pa bin ku e lei ta ku burka ta stroba igualdat entre hende hòmber i hende muhé. Pero segun e órgano di konseho di mas haltu di gobièrnu hende muhénan mes mester por skohe pa bistí un burka si òf no.

Kentura di skats
Asusashon Elfstedentocht no ta laga e pronóstikonan malu influensh'é. Meteorólogonan ta bisa ku ta djadumingu  so e kareda por tuma luga pasó despues temperatura ta subi i eis ta kuminsa dirti."Laga nos no laga e pronóstikonan obliga nos menshona un dia pa e kareda", asina bosero Immi Jonkman ta bisa. Tweede Kamer ke pa skolnan duna alumnonan un dia liber èkstra ora e kareda tuma luga.

E pronóstiko di tempu:
na Hulanda: awe ta un dia hopi kla pero friu. E parti nort ta un tiki nublá i por ta sneu ta kai un tiki. Temperatura máksimo ta mas o menos 4 grado bou di sero.