Kontrol demokrátiko na Boneiru
Kosnan no ta bai bon na Boneiru riba tereno di kontrol demokrátiko. Asina Wilbert Stolte, representante di Reino na Boneiru, Saba i Statia, ta bisa. Segun Stolte eilandsraad di Boneiru no ta reuní sufisiente i no ta publiká su relatonan. Ademas tin un diputado ku ta hasi otro trabou pagá i un otro diputado ta paga un miembro di eilandsraad di su mes partido 1500 dòler pa luna. Stolte a pidi gobièrnu di Boneiru pa un reakshon, pero te ainda e no a haña esaki. Probablemente e no ta haña esaki pasobra ayera mainta gobièrnu a pèrdè su mayoria den eilandsraad. I awe i isla di flamingu ta selebra Dia di Boneiru ku diferente aktividat, pero tambe ku un demonstrashon pasífiko pa protesta kontra e situashon aktual na e isla, kaminda entre otro preisnan a subi sky high.

Minister Hillen na Isla'riba
Minister di defensa Hans Hillen ta awe di bishita na St. Maarten kaminda e lo asistí entre otro na un entrenamentu garndi pa ayudo di emergensha. Pa esaki nan ta imitá un desaster okashoná pa orkan. Hillen lo papia tambe ku gobernador Eugene Holiday i promé minister Sarah Wescot-Williams. Na St. Eustatius e minister ta bishita entre otro e terminal di zeta. Hillen ta bai Saba tambe kaminda e lo bishita e bapor Ms. Johan de Witt. Hillen ta keda isla'riba te djabìernè.

Oumento di preis di oro
Preis di oro ta keda subi ketu bai. A konsekuensia di un krisis finansiero nobo ku ta menasá i e inseguridat di euro i dòler, hopi invershonista ta skohe pa oro. Na e momentunan aki mester paga mas ku 1921 dòler pa un OUNCE di oro. Esaki ta un rekòrt. Mas ku dos siman pasa e rekòrt tabata 1913 dòler pa un OUNCE.

Banko sentral di Suisa ta pone limit
Pa evita ku invershonista ta invertí no solamente den oro, pero tambe den moneda di e pais, banko sentral di Suisa a pone un limit na oumentu di e moneda frank respekto di euro. Ekonomia di Suisa por hañe den problema si su moneda bira muchu karu. Prinsipalmente eksportashon lo sufrí. Bolsa di balor di Amsterdam a habri awe un tiki negativo. Ayera AEK a baha ku mas ku kuater porshentu.

Morto na Texas
E kandelanan di boske na Texas a kosta bida entre tantu di dos persona. Un mama hòben di 20 aña i su yu muhé di un aña i mei a pèrdè nan bida despues ku ront nan kas tabata na kandela. E kandelanan di boske a kima destruí kasi sinkushen kas. Na e estado merikano tin akutlamente un 25 kandela foko di kimamentu, kubriendo un total di shen kilometer kuadrá. A evakuá miles di hende. Sekura permanente i bientu duru ta pone ku e kandela ta plama lihé. Gobernador Perry di Texas a posponé su kampania pa elekshonnan presidenshal.

Investigashon Dignotar
Hustisia ta kuminsa un investigashon kontra Dignotar. Hèkernan iranes a ataká e kompania ku ta reglá seguridat di saitnan di gobièrnu manera servisio di belasten i DigiD, dos luna pasá. Pero e kompania no a bisa nada. Ademas Diginotar mes ta mal proteha i e ta uza programa di kòmpüter bieu.

Eskases di wes
Prekupashon pa eskases di wes. A konsekuensha di ekonomisashonnan 35 jurista so a kuminsa e aña akí ku e spesialisashon pa bira wes. Aña pasa tabatin 125 kandidato. Segun e asusashon Nederlandse Vereniging voor Rechtspraak si sigui asina awero tin muchu tiki wes pa remplasa esnan ku ta bai ku penshun. E asusashon tin miedu ku a konsekuensha di e eskases e listanan di espera pa kasonan den korte ta bira mas largu.

Pronóstiko di tempu
E rabu di orkan Irene (engels) ta soru awe pa hopi molèster na Hulanda. Ku ráfaganan di bientu duru i hopi áwaseru, ku lo kai prinsipalmente awe tardi i awe nochi. E temperatura ta 17 grado.