Yasser Arafat sospechá di a muri venená

Lo koba saka kurpa di lider palestino Yasser Arafat for di graf pa investigá si ta venená a venen'é ku polonio, un elemento radioaktivo. Awe outoridatnan a duna pèrmit pa hasi esei. Ayera notisiero Al Jazeera a revelá ku a deskubrí un kantidat ineksplikablemente haltu di polonio no natural riba pertenensha di Arafat. Su biuda ke sa awor di kiko su kasá a muri djun forma asina repentino. Dia 24 di òktober 2004 e tabata bon bon di salú ainda te p'e fayesé dia 11 di novèmber. E notisiero ta bisa ku Arafat tabata sufri di habriment'i barika serio, ku el a pèrdè peso i ku e tabatin gan'i arohá konstantemente den e simannan promé ku su morto. Loke ta e mes síntomanan ku e víktima mas famoso di intoksikashon ku polonio tabatin, e èks spiòn ruso Aleksander Litvinenko, kende a muri na 2006.

Wilders ke pa Hulanda yama Antia ayó
Si ta kos ku PVV di Geert Wilders por disidí, Hulanda lo yama Antia ayó, asina ta pará den programa dje partido, ku a presentá ayera djamars, pero baimentu inesperá di dos di e parlamentarionan a eklipsá e detaye ei. "Nos ta deseá i pèrmití e islanan soberania total. Mas lihé, mas mió", asina por lesa den e programa. Wilders ke pone paro direkto tambe n'e fluho di plaka pa Kòrsou, pasó segun e polítiko hulandes, gobièrnu dje isla outónomo ta korupto. Ademas mester manda antiano kriminal bèk nan pais ku e promé buelo. Dia 12 di sèptèmber Hulanda ta bai urna pa eligí un gobièrnu nobo.

Lopez Obrador ke pa konta voto dinobo
Pèrdèdó dje elekshon presidenshal na Méhiko, o sea Lopez Obrador, ke pa konta tur voto dinobo. E ta kere k'esei ta nesesario pasó ta "na interes di demokrasia i di e pais". Fe ora a partisipá viktoria elektoral di Enrique Peña Nieto, kandidato iskierdista Obrador a bisa mésora ku lo e kuestioná e resultado. E ta bisa ku Peña Nieto a kometé froude kumprando voto di hende. Supuestamente medionan di komunikashon mehikanu tabata partidista tambe. El a kalifiká e kontienda elektoral komo "shushi i desigual". Na 2006 tambe López Obrador a pèrdè elekshon presidenshal na Méhiko. E protestanan ku el a organisá e tempu ei a paralisá Ciudad de Méjico henter un luna.

Partíkula Higgs ta eksistí mashá bon
Sientífikonan di instituto CERN na Ginebra ta bisa ku nan ta sigur ku e partíkula yamá Higgs ta eksistí, es mas: segun nan e chèns ku nan no tin rasón ta solamente ún riba un mion. Ora ku a partisipá e notisia akí na Ginebra, mió konosí komo Genève na Suisa, públiko den sala a bati man sinfin. Peter Higgs, e promé sientífiko ku a pronostiká eksistensha dje partíkula, tabata presenta komo invitado spesial na Genève. Ta sali for dje punto di bista ku partíkula Higgs, konosí tambe komo partíkula divino, ta un dje piedanan elemental ku kua a konstruí universo. E partíkula aki ta sòru pa tur e otronan haña masa.

Aktivistanan na Peru no ke mina di oro
Por lo menos tres hende a pèrdè nan bida n'e parti nòrt di Peru den bringamentu entre polis i aktivistanan, ku ta kontra kobamentu djun mina di oro. Outoridatnan ta bisa ku por lo menosr 21 hende a keda heridá. No sa ainda si e víktimanan ta polis òf sivil. Band'i mil hende a tene un marcha na siudat Celendin. Ora ku aktivistanan a kuminsá manda edifisionan públiko ku piedra, polis a uza gas lakrimógeno. Despues djesei pelea a start. Outoridatnan ta bisa ku algun dje aktivistanan a uza arma di kandela. E manifestantenan ta haña ku mina di oro ta malu pa medio ambiente i pa suministro di aw'i bebe, miéntras ku outoridatnan peruano ta mustra yùist rib'e echo ku mina di oro ta generá miles di kupo di trabou.

Nóufragonan katamarán sano i salbo
Wardakosta di Colombia a reskatá 16 nóufrago, entre nan un hulandes. Awa a drenta den un katamarán, ku nan tabata nabegando riba Laman Karibe, 45 mia for di kosta di Cartagena. E boto a senk anto wardakosta a rekog'é e turistanan. Tan leu ku ta konosí no tin nada partikular ta pasando ku nan. Ademas dje hulandes, tabatin turista oustralianu, aleman, merikanu, norwechi, polako i panameo na bordo.

Aresto pedofil na Oustria i rònt mundu
Durante un akshon mundial kontra abuzu di mucha, a lokalisá sentenares di pedofil na 141 diferente pais. Na Oustria so kaba tin 272 sospechoso, asina emisora públiko djaya ta informá awé. Hustisia na Viena lo tene un rueda di prensa den kurso di dia. E akshon kontr'e pedofilnan, yamá Operashon Carole, a kuminsá un aña pasá. Probablemente e ta un dje operashon polisial mas grandi den istoria.

Yu'i Mandela embahador na Argentina
Suráfrika a nombra Zenani Mandela-Dlamini, yu muhé di èks presidente Nelson Mandela komo embahador na Argentina. Ministerio di Asuntuna Eksterior ta bisa ku esaki ta rekonosementu di gobièrnu surafrikano di importansha dje relashon ku e pais suramerikano. Zenani ta e promé yu muhé di matrimonio di Mandela ku su èks kasá Winnie. Zenani tabata mucha chikí ainda tempu ku Nelson Mandela a bai será. Tempu ku su tata tabata presidente, Zenani tabata kompañ'é regularmente komo First Lady di su pais.

Artista Cruise ta gana basta pida sèn
Tom Cruise ta pará te ariba den e top-100 di artista mió pagá i ku ta sali den e revista komersial Forbes. Entre mei di aña pasá i esun dje aña akí, Cruise a gana band'i 60 mion di euro. Último aña Cruise a protagonisá e di kuater parti dje serie sinematográfiko popular Mission Impossible. E number 1 riba lista di aña pasá, esta Leonardo DiCaprio, a baha bai number 2, un puesto ku e ta kompartí ku e artista kómiko Adam Sandler. Forbes ta skibi ku ambos ta gana kasi 30 mion di euro. Ayera Tom Cruise a kumpli 50 aña di edat. E i su esposa Katie Holmes ta den divorsio.

Wer na Hulanda
Solo i nubia ta alterná ku otro, mas den lat awa lo kai. temperatura ta 26 grado. Mañan tin tempestat i ta keda kalor.