Boletin di notisia

Informadó Opstelten tin ku akudí serka Lareina pa relato final
Awe informadó Opstelten lo bishitá Lareina pa entregá e relato final na su mahestat. Ayera formashon djun gabinete derechista a frakasá ya ku Geert Wilders, kabesante di PVV no tin konfiansa mas den partido CDA. El a bin ku eksigensha i a pidi pa garantis'é ku e tres parlamentarionan disidente di CDA aseptá aprobashon di kongreso di CDA pa kolaborá kune. Si nan no tum'aden antó e or'ei e trio mester entregá nan asiento. Maxime Verhagen, lider di frakshon di CDA na su turno a reakshoná bisando ku esaki ta un eksigensha imposibel i ku ademas ta pugna ku konstitushon. Atawor Mark Rutte, dirigente di VVD mes ke skibi un akuerdo di gobernashon. Ta keda n'e otro partidonan si nan ke negoshá riba dje òf laga.
E idea di Rutte a lanta reakshonnan diverso. Verhagen di CDA ta haña ku Rutte tin kurashi ku su proposishon, i ku lo e tené seriamente na konsiderashon. Job Cohen, lider di frakshon di PvdA a duna di konosé ku e ta preferá skibi un konsepto dje akuerdo huntu ku Rutte, miéntras ku D66 i GroenLinks ta di opinion ku e idea ta muchu prematuro. Meskos ku ChristenUnie nan ke pa investigá un posibel koalishon sólido promé. Alexander Pechtold, kabesante di D66 ta deseá un debate den parlamento tambe ku informadó Opstelten. Partidonan D66 i Groenlinks a bolbe duna di konosé ku nan ta preferá un gabinete Püs-plùs, miéntras ku e sosialistanan di SP, ku Ronald van Raak na kabes, ta haña ku a bira tempu pa papia djun koalishon sin VVD, kemen sin un partido derechista.

Formashon a malográ na Bélgika tambe
Na Bélgika tambe formashon a malográ. Prereformadó Di Rupo a entregá retiru serka Rei Albert. E monarka belga ta studia e retiru akí promé. Elektorado di Flandres ke pa trese divishon den distrito elektoral Brussel-Halle-Vilvoorde, miéntras ku Walonia ke pa duna nan un rekompensa finansiero, pero riba esaki e partidonan di Flandres i di Walonia no por a yega n'un kombenio.

Temblor na Nueva Zelandia
Un temblor a sakudí Zuidereiland di Nueva Zelandia. Sobretodo na i alrededor di ChristChurch, un siudat ku 400.000 habitante a surgi hopi daño na edifisio, brùg i karetera. Algun edifisio a basha abou i koriente a bai n'e siudat. Band'i mitar di sinku di mainta a sinti e temblor, ku tabatin un intensidat di 7.1 riba eskala di Richter. Hopi hende a spièrta tur spantá i a kore subi kaya ku pániko. E kantidat di víktima dje temblor na Nueva Zelandia por pasa. Te awor ta informá di algun erido so.

Mas desaster na Nueva Zelandia: avioneta a kai
Nuebe hende a pèrdè nan bida den un desgrasia di avioneta na Nueva Zelandia. E avioneta a pega kandela djis despues di despego i a dal abou. Algun 'skydiver' tabata na bordo. E aksidente na Zuidereiland di Nueva Zelandia no tin nada di aber ku e temblor.

Fidel Castro ta tira spich pa públiko atrobe
Ta pa promé biá den kuater aña ku Fidel Castro a dirigí palabra na públiko kubano. E anterior presidente di Kuba a aparesé den unifòrm militar na universidat di Habana, kaminda mas o ménos 10.000 hende a akudí pa para skuch'é. El a spièrta pa peliger djun guera nuklear a konsekuensha dje preshon internashonal riba Iran. Despues di 40 minüt Castro a laga kai, loke ta muchu mas promé ku antes, tempu ku su diskursonan tabata dura oranan largu. Na 2006 Fidel Castro a bira malu. El a pasa su tareanan presidenshal pa su ruman hòmber Raúl. El a keda lider sí di partido komunista di Kuba. Ultimo simannan Castro di 84 aña di edat tabata aparesé regularmente den públiko atrobe, pero esaki ta su promé biá dilanti un multitut asina grandi.

Taliban ta responsabel pa atentado sangriente na Pakistan
Taliban a reklamá responsabilidat p'e atentado sangriente djayera na Pakistan. Por lo ménos 50 hende a pèrdè nan bida den un manifestashon di protesta di musulman shiíta na siudat Quetta. Komo 80 a keda eridá. E Shiítanan kier a mustra solidaridat ku e Palestinonan mediante e manifestashon. Taliban ta bisa ku a kometé e atentado di bòm pa venga asesinato djun lider religioso radikal. Esaki ta e di dos atentado di bòm di taliban dje siman akí kontra e minoria shiíta na Pakistan. Djárason último mas ku 30 hende a peresé den un atentado di bòm na Lahore.

Deporte-futbòl
Hulanda a gana su promé wega di klasifikashon pa Kampionato Oropeo di futbòl den e partido afó kontra San Marino. Ekipo Oranje a derot'é ku skor di 5 pa 0. Klaas-Jan Huntelaar a hinka tres gol, Dirk Kuyt i Ruud van Nistelrooij kada un a marka ún gol. Van Nistelrooij a kai aden despues di háftaim. Tabata su promé wega den selekshon hulandes despues di mas ku dos aña. Selekshon turko di entrenadó Guus Hiddink a derotá esun di Kazakstan ku 3 pa 0, miéntras ku e ekipo ruso di entrenadó Dick Advocaat a gana Andorra ku 2 pa 0.
Na 2012 lo tene Kampionato oropeo di futbòl na Polonia i Ukraína.

Wer na Hulanda
Awe solo ta bria regularmente, parti atardi sí shelu ta nubla den zùit i wèst. Temperatura ta 18 te 21 grado. Mañan djadumingu ta solo-solo i algu mas kalor ku awe.