Boletin di notisia, 30 di yüli

Karta ta kaba ku maneho finansiero di Sint Maarten
E maneho finansiero di Sint Maarten no ta masha efektivo. Asina sekretario Geert Bergsma di e kolegio di supervishon CFT na Korsou ta bisa den un karta ku el a manda pa promé minister Balkenende. Den e karta Bergsma ta laga sa di ta hopi preokupá pa e kontinuashon riba tereno di maneho finansiero riba e isla. CFT ku ta bou di maneho di profesor Weitenberg, a keda lantá na aña 2007, despues ku na Hulanda i Antia, polítika a rekonosé ku e problemanan finansiero di e islanan ta serio. CFT ta tene supervishon finansiero riba e islanan. Pa medio di e supervishon aki e situashon finansiero riba e islanan a mehorá en general. Den e karta CFT ta skibi ku for di prinsipio Sint Maarten ta pasa trabou pa duna informashon kompleto na tempu. Ademas Bergsma ta fèrwagt ku trahamentu di e presupuesto pa 2011 lo bira un problema.

Ainda VVD, PVV i CDA ta deliberá
Konbersashonnan tokante un gabinete derechista ta seka di kaba pero e lidernan di frakshon di VVD, PVV i CDA no a bini kla ainda. Ayera nochi tambe Rutte, Wilders i Verhagen a sinta huntu, pero ainda nan no a disidí si nan ta sigui huntu i den kua forma. Meinta nan ta bini huntu atrobe i merdia nan lo informá nan frakshonnan. Informadó Lubbers a bisa ku e ke tende kiko a para pa mas tardá djasabra anochi. Henter siman e tres lidernan di frakshon a deliberá na un lokashon sekreto. Einan na lo a papia tokante tur tópiko importante. Ta mustra manera lo no bini un gabinete derechista di mayoria. Si nan bini kla mes ta ku un gabinete di minoria di VVD i CDA. PVV lo sostené e gabinete den parlamento. Asina ta evitá ku CDA mester negoshá formalmente ku PVV. Lider di frakshon Verhagen a pone algun kondishon na negoshashon direkto ku e partido di Wilders.

A mata e baron di droga mehikano Coronel
Ehérsito mehikano a mata un di e hefenan di droga di mas grandi di e pais. Ta Ignacio Coronel, man drechi di e baron di droga di mas buská di Mehiko, Joaquin Guzman. Militarnan a tira Coronel mata den na un di e kamindanan ku e tabata skonde. Den e tiroteo un militar tambe a pèrdè su bida. Mehiko i Merka tin añanan largu ta buska Coronel, ku tabata trafiká espesialmente den e supstansha masha adiktivo chrystal meth. Su morto ta un viktoria pa presidente Calderon den su lucha kontra e violensha di droga na Méhiko. Krítikonan tabata bisa ku e tabatin miedu di dil ku e kartelnan di droga di Guzman i Coronel.

FBI ta investigá Wikileaks
Gobièrnu merikano a enkargá FBI ku e investigashon na e dokumentonan ku a lèk tokante e guera na Afganistan. Tabata konosí kaba ku Defensa mes lo mira ken den ehersito ta responsabel pa e lèkmentu di sigur 90 mil dokumento riba e website Wikileaks. FBI mester konsentrá su mes riba e papel ku hende pafó di ehersito a hunga den e kaso aki. Esaki ke men ku e fundadó di Wikileaks, Julian Assange mester teme perhekushon. Pentagon ta haña ku Wikileaks a pone hende na peliger ku e publikashon. Hefe di estado mayor Mullen a bisa ku ta posibel ku Assange tin sanger na su man di un militar hoben òf un famia afgano.

Fout den deramentu na Arlington
Na e santana di honor Arlington na Merka a resultá ku 66 mil hende a keda derá robes, hopi mas ku a pensa anteriormente. Hopi kurpa no ta na e lugá ku a palabrá of tin un nòmber robes riba e graf. Na Arlington tin 300 mil hende derá, mas parti militar, pero polítiko i astronouta tambe. Pa motibu di e skandal e direktor a tuma su retiro.

Protesta kontra parada di homoseksual na Jeruzalem
Na Jeruzalem un forsa polisial enorme a guia e marcha anual di homoseksualnan. Tabatin kasi mes tantu polis ku partisipante. Un dos mil homoseksual i lesbiana a partisipá na e asina yamá djaweps ros kontroversial. Kontrario na Tel Aviv, e siudat sagrado di Jeruzalem tin hopi resistensia kontra e parada. Na aña 2005 un hudiu òrtodòks a kuminsa hinka e partisipantenan ku kuchu. Hope kreyente fiel, hudiu i moslem, a subi kaya awe pa protesta kontra di e parada homoseksual. E alkalde suplente di Jeruzalem, tabata un di e organisadonan di e demonstrashonnan, Esaki a pon'é haña hopi krítika pasobra e lo a instigá odio i violensha

Ola di kalor na Moskou ta mata hende
Na Moskou pa di dos be den un siman a kibra un rèkert di kalor. Temperatura tabata rònt 38 grado awe merdia. Djaluna ku 37 grado tambe a kibra un rèkert. E rekert bieu ta di 1920, tambe ku 37 grado. E ola di kalor ta durando mas ku un luna kaba i kada dia tin desenas di habitante di Moskou ta muti di kalor. Huntu ku e kalor tin hopi smog. Ta ferwagt ku mayan lo bin awaseru pero e kalor no a pasa ainda.

Djente falsu di Churchill na findishi
Na Londen a bende djente falsunan di e èks promé minister di Gran Britania, Winston Churchill, na findishi. E plachi di oro ku djente djariba a kue 18 mil euro. Ora Churchil a laga traha e djentenan na kuminsamentu di segundo guera mundial e la laga traha nan di un manera speshal ku e por a keda ku su lespel karakterístiko

Deporte
Antia a gana dos medaya di bròns den weganan CAC na Puerto Rico. Den nabegamentu ku barku di bela Ard van Aanholt a yega di tres lugá den e klase Sunfish, tras di dos venesolano. Den atletismo e tim maskulino antiano, ku Churandy Martina komo di kuater koredó a kue brons riba sprent di 4 be 100 meter, tras di Trinidad i Tobago i Jamaica. Anteriormente Martina a gana oro dos be riba 100 i 200 meter individual. Awo Antia tin seis medaya 2 di oro, dos di plata i dos di bròns. Aruba te awo a kue un plata ku taekwondo.

Pronóstiko di wer
Aki aya tin algun yobida pero nan ta pasa atrobe i solo lo bria bek temperatura di 21 grado na lamn i 24 den ost,
Mayan lo tin un temperatura di 21 pa 26 grado, pero tin mas chens riba yobida tambe. I djadumingu tambe awa lo kai