Boletin di notisia di 13:00 or

Bouterse i Venetiaan a papia ku otro despues di 18 aña
Presidente elekto Bouterse di Sürnam a kombersá ku presidente aktual Venetiaan.Nan a papia ku otro kasi dos ora, despues di un silensio di 18 aña.Bouterse i Venetiaan a kombersá tokante pasamentu di mando i situashon di e pais. Segun Bouterse e kombersashon tabata bon i agradabel. E enkuentro tabata un inisiativa di presidente di parlamento Sürnam. Ministernan i èks presidente Wijdenbosch tambe a djòin. Semper Venetiaan tabatin hopi krítika riba Bouterse; siman pasá e no kera felisitá su siusesor ku su elekshon. Aki dos siman Bouterse lo tuma mando ofishalmente di Venetiaan.

Governor nobo pa Sürnam
E ekónomo Gilmore Hoefdraad ta bira e Governor nobo, esta presidente di banko sentral di Sürnam. Asina Winston Latkin, e hefe di gabinete di Bouterse a bisa Wereldomroep. Hoefdraad ta Sürnameo i ta traha pa IMF. E ta sigui André Telter komo Governor. Hoefdraad tabata favorito pa e funshon.

Lubbers ke tende kiko a para di djasabra awó
Informadó Lubbers ke tende djasabra si kombersashonnan entre VVD, PVV, i CDA tabatin resultado. Ainda Lubbers no a tende nada di e lidernan di frakshon. For di djaluna nan ta papia di e posibilidatnan pa forma un gabinete nobo. Lubbers no ta presente aki. Segun e esaki no ta pas den su enkargo pa djis mira si tin posibilidat pa un gabinete di mayoria. CDA. PVV i VVD ta palabrá posibilidatnan pa un gabinete di minoria tambe, ku PVV lo tolerá.

Zeta den Golfo di Méhiko ta desintegrá mas lihé ku a spera
E zeta den golfo di Méhiko ta desintegrá mas lihé ku a spera. Asina sientífikonan merikano ta bisa. Mikrobionan ta sòru pa e zeta larga mas lihé. Ademas dos tempestat den e area a plama e manchanan grandi di zeta for di otro di moda ku nan ta desintegrá mas fasil. Segun sientífikonan e akshon pa limpia a yuda, pero esaki ta trata espesialmente zeta na superfisio. Ainda e speshalistanan ta preokupá pa e daño na medio ambiente riba termino largu.

Haiti preparando pa temporada di orkan
Na Haiti nan ta preparando pa e tempu di orkan pa evitá un desaster nobo. Haitianonan ku a pèrdè nan kas ta biba partí riba e isla den un 1300 kampamentu di tènt. Krus Kòrá ta teme ku si bini un orkan lo kai hopi víktima. Nan ta trahando stòk di emergensha,hasi inspekshon di kaminda di skonde i ta drechando e fasilidatnan den e kampamentunan. E instituto meteorológiko merikanu a pronostiká nuebe tempestat tropikal ku por krese bira un orkan.

Wes na Arizona ta intervení den lei di imigrashon
Wes den e estado merikano Arizona a para e partinan mas kontroversial di un lei kontra hende ilegal. Tabata a sina ku polis por a pidi un hende pa identifiká nan mes si nan tabata sospechá ku e ta ilegal. Arizona ta haña e lei nesesario pa kombatí kriminalidat, pero a bini hopi resistensha. Agrupashonnan di derecho humano ta teme ku lo bai arestá hende a base di nan koló. Presidente Obama a bisa ku e estadonan riba nan mes no por tuma desishon den asuntunan di imigrashon. Wes tabata di akuerdo ku esnan ku tabata kontra. E lei ta drenta na vigor awe pero sin e partinan ku awo a taha. Gobernador di Arizona ta bai apelá e kaso.

Fèrlòf sin pago mandatorio pa amtenar na California
Den futuro amtenarnan na California mester tuma 3 dia di fèrlof sin pago mandatoriamente. E medida ta keda na vigor te te ora traha un presupuesto nobo. California ya pa largu tempu tin problema finansiero: tin un défisit di presupuesto di kasi 15 miar euro. Gobernador Schwartzenegger a deklará estado di emergensha finansiero. E ke ekonomisá kasi 6 miar euro, emte otro riba ayudo pa pober.

Tur 152 okupante a fayesé den krèsh di avion na Pakistan
Den e aksidente di avion na Pakistan tur 152 okupante a fayesé. E avion di Air Blue djarason a kai serka di e kapital Islamabad. Binti minüt promé ku e krèsh toren do kòntròl a pèrdè kontakto ku e avion. E Airbus a kai den mal tempu den un area ku seru. E avion tabata bini for di Karachi.

Awa limpi a bira derecho humano
E derecho riba awa limpi a bira un derecho humano ofishal. Un mayoria di Nashonnan Uní a bai di akuerdo. Bolivia a entregá e resolushon. Algun estado miembro, entre nan Estados Unidos a keda sin vota. Segun in bosero di Estados Unidos ku e resolushon aki no por eksihí e derecho riba awa limpi. Ta pesei awa limpi komo derecho humano tin mas tantu un nifikashon polítiko.

Deporte
Diego Maradona a reakshoná furiosamente riba su retiro komo coach di e tim nashonal di Argentina. E ta akusá e bònt di futbòl di mentira i traishon. Na kampeonato mundial di futbòl na Sur Afrika Argentina no a yega mas leu ku kuart final. Djarason e b1ont a disidí di no prolonga Maradona su kòntrakt. E por a keda pero su eksigensha ku mester a mantené e staf tékniko tabata inaseptabel pa e bònt. Segun Maradona e bònt tabata sa ku e no por sin su trahadónan di mas serká. E coach di e tim di jubentut ta tuma su tarea tanten

Pronóstiko di wer
Awa ta kai aki aya i awe merdia den interior tin mal tempu ku bientu duru. Mas lat lo ta mas seku den west i solo lo bria poko. Ta bira mas o  menos 22 grado. Mayan solo i nubia lo troka ku otro henter dia i temperatura lo ta di 21 pa 24 grado.