Boletin di notisia di 13or

Na Merka 33 miar èkstra pa guera na Afganistan
Kámara di Delegado, o sea parlamento merikanu a bai di akuerdo ku 33 miar di dòler adishonal p'e guera na Afganistan. Anteriormente Senado a aprobá e gastunan èkstra akí kaba. Si presidente Obama buta su firma, por usa e plaka efektivamente. E proyekto di lei a risibí apoyo sobretodo di e Republikanonan, miéntras ku e Demókratanan ta dividí den nan seno. For di febrüari Obama a pidi sèn, pero e Demókratanan merikanu a wanta votamentu lunanan largu.

Ocho kabes sin kurpa kant'i kaminda na Méhiko
Polis mehikano a topa ku ocho kabes di hende. E kabesnan tabata tirá kant'i kaya na vários lugá alrededor di siudat Durango n'e parti sentral di Méhiko. No a haña e kurpanan korespondiente ainda, pero segun polis ta trata di mucha hòmber yòn. Probablemente nan a bira víktima di asesinatonan den mundu di narkotráfiko. Na Méhiko a muri komo 25.000 hende relashoná ku droga den e último kuater añanan.

Desgrasia di avion di Air Blue na Pakistan
Un avion di pasahero a kai na Pakistan. Ta trata djun oroplanu di Air Blue, un kompania di aviashon pakistani. Na bordo dje avion  tabatin 146 pasahero i 6 tripulante. Algun hende a sobrebibí e desgrasia. Toren di kòntròl a pèrdè kontakto ku pilotonan dje avion binti minüt promé ku aterisahe. E Airbus a kai den un zona ku seru pegá ku kapital Islamabad. Entretantu tres helikòpter di Forsanan Aéreo di Pakistan a baha n'e region ku ta mashá difísil di alkansá. A haña kurpa sin bida di un piloto i di algun pasahero. Mayoria biahero ta Pakistani. E avion tabata prosedente di Karachi. Air Blue ta e di dos kompania di aviashon mas importante dje pais.

Tweede Kamer ke aklarashon di Wikileaks
E partidonan den Tweede Kamer, o sea parlamento ulandes ke aklarashon di ministernan Verhagen i Van Middelkoop enkuanto e dokumentonan di Wikileaks. Ayera djamars e wèpsait di redadó a publiká desénas di miles di dokumento sekreto tokante e guera na Afganistan. Ministerio di Defensa ulandes a bisa ku e kos akí no ta prekup'é, komo ku nunka Hulanda no a retené ni trose  informashon berdadero. Parlamento ulandes ke pa aklará suministro di informashon enkuanto víktima sivil na Afganistan. Tambe Tweede Kamer ke sa si militarnan ulandes a partisipá na mishonnan sekretu i si e ministernan konserní tabata na altura dje echo ku Pakistan ta yuda Taliban ku arma.

Kòmbersashon preliminar di Derecha na Hulanda
Awe partidonan ulandes VVD, CDA i PVV ta sigui papia tokante formashon djun gabinete nobo. Ayera ningun partido no kier a bisa den ki direkshon e deliberashonnan ta bayendo. A petishon di informadó Lubbers, e dirigentenan di frakshon ta papia ku otro sin muchu formalidat di un gabinete posiblemente derechista. E kòmbersashonnan akí ta tumando lugá na un lokalidat sekreto.

Habitantenan evakuá no mag regresá nan kas ainda
E habitantenan dje 32 bibiendanan, ku a desokupá den un edifisio di apartamentu na Amsterdam-Noord, no tin mag di bai kas ainda. Promé mester kita e asbèst ku tin riba kaya i den nan balkon. Munisipio ke evitá e asbèst di bula bai paden. A midi e kantidat di asbèst ku tin den nan flèt. Awe ta partisipá e resultadonan. Djaluna último a evakuá e habitantenan for di nan bibienda. Djadumingu pasá un eksploshon di gas den un flèt enfrente a pone asbèst sali, un supstansia konosí komo venenoso i kanseroso.

E 21 víktimanan di Loveparade na Duisburg a muri plèchá
Tur e 21 bishitantenan, ku a pèrdè nan bida durante e Festival yamá Loveparade na Duisburg, Alemania a muri ya ku a primi i trapa nan mata den e tumulto ku a surgi den e multitut. Esaki ta resultado dje outopsia. Promé a notifiká ku algun dje víktimanan a kai for di trapi tambe. Awe mèrdia a entregá e kurpanan sin bida na famia. Un di e víktimanan ku a fayesé ta un mucha hòmber hulandes di 22 aña di edat. Djasabra awor ta tene un servisio funerario pa víktimanan dje tragedia na Duisburg.

Deporte
Laura, e mucha muhé tineidjer ku ke hasi un gira rònt mundu ku barku di bela a risibí pèrmit di wes na Hulanda pa dal bai ku su biahe. Tribunal na Middelburg ta husga ku mayornan di Laura tin bos desisivo den e asuntu, asina ta ku e tin mag di barka bai. Laura ta di edat di 14 aña i denter di dos siman e ke kuminsá ku su gira marítimo pa alkansá un rekòrt. Konseho di Tutela a pidi tribunal pa pone Laura un aña mas bou di supervishon, pero tribunal no a konsiderá esaki oportuno.

Churandy Martina, koredó antiano a gana su di dos medaya di oro n'e weganan sentralamerikano i karibense na Puerto Riko. E biaha akí el a kore 200 meter den un tempu rekòrt nobo di 20 sekònde punto 25 sentísimo. Djadumingu último ei tambe Martina di 26 aña di edat a gana oro, esta pa e kareda di shen meter. Antia ulandes a subi bai na di 14 puesto riba lista di medaya, ku dos medaya di oro. Méhiko ta na kabes kétubai ku 104 medaya, siguí pa Venesuela ku 96 i Kolombia ku 85 medaya.

Lo no prolongá kòntrat di Diego Maradona, entrenadó prinsipal di selekshon futbolístiko di Argentina. Maradona a sirbi dos aña komo coach dje selekshon argentino i e ta supos di a yuda su pais bira kampion mundial e aña akí na Suráfrika, pero Argentina no a yega mas leu ku kuart final dje weganan. Nan a pèrdè ku 4 pa 0 di Alemania.

Wer na Hulanda
Despues djun mardugá ku pal'i áwaseru, solo ta briando mas i mas kuminsando na wèst. Awa por kai sí debésenkuando na regionnan mas nublá. Temperatura ta 20 grado na kosta te 23 grado den interior. Anochi awa ta kuminsá kai tur kaminda atrobe. Mañan tambe tin wer di awa.