Boletin di notisia, 28 di òktober

Reina Beatris a yega Aruba
Reina Beatris a yega Aruba pa un bishita ofishal na tur seis isla karibense di Reino Hulandes. Sentral den e bishita di dies dia ta e desaroyonan riba e islanan despues di desmantelashon di Antia Hulandes dia dies di òktober aña pasá. Lo bishitá tur sorto di proyekto, entre otro den ramo di enseñansa, kultura i deporte. Prens Willem-Alexander, prensès Máxima i minister Donner ta kompañá Lareina. Asina na a yega Aruba, Minister Piet Hein Donner di Asuntunan Interior i Relashonnan den Reino a firma un akuerdo kaminda Aruba i Hulanda ta primintí di koperá mas ainda, komo partner igual. Promé minister di Aruba Mike Eman ta preferá di wak kiko ta mara e dos paisnan i no e diferenshanan.

Reunion di krísis den parlamento hulandes
Ayera nochi tabatin un reunion di krísis den parlamento hulandes. E reunion tabata trata di sakamentu di e hóben Mauro, angoles ku ta buska asil na Hulanda. E hóben tin 18 aña di edat i tin dies aña ta biba seka un famia di kriansa na Limburg. Minister Gert Leers djárason a disidí ku e mester bai su pais bèk. Esaki a kousa inkietut den parlamento i den Leers su propio partido CDA. Parlamentarionan di CDA Ferrier i Koppejan ke pa Mauro haña un pèrmit di estadia. E resultado di e deliberashonnan no ta konosí. Djamars lo sigui reuní tokante e asuntu.

Masakre na estado mehikano Guerrero
Kriminalnan a kousa un masakre den e estado mehikano Guerrero. Den diferente eksploshon di violensha segun media mehikano sigur 18 hende a pèrdè nan bida. Polis di Guerrero entre otro a haña kurpa sin bida di sinku hòmber kant’i kaminda, dos di nan a kita nan kabes afó. A tira sinku hende mata den un bar. Na Acapulco sigur dos hende a pèrdè nan bida pa motibu di violensia. No ta sigur ta ken ta tras di e asesinatonan. Na Guerrero tin sigur dos organisashon kriminal aktivo, kartel di Sinaloa i banda di Beltran Levya. Méhiko tin añanan largu ta sufri bou di un guera kriminal sangriento. Gobièrnu no ta logra kontrolá e violensia. For di aña 2006 a asesiná mas o ménos 40 mil hende na Méhiko.

Awa ta kore ku habitantenan di Bangkok
Habitantenan den parti nort di Bangkok, a haña e rekomendashon urgente pa bai laga nan kas en buska di lugá mas haltu. E kapital di Tailand ta lucha ku inundashon di mas pisá di último 50 aña. Áwaseru di múson inkreiblemente pisá den parti nort , ost i mei mei di e pais a kousa un kantidat di awa ku ta kore via Bangkok bai Golfo di Tailand. E awa den e riu ku ta kore den Bangkok mes tambe tin chèns di subi. E awa no por bai niun kaminda pasobra awa di laman mes di repente a subi masha haltu. Entretantu e inundashonnan a kousa morto di un 400 hende. Mayoria di e mortonan a kai den nort i mei mei di e pais. Na tur, kasi dos mion i mei di hende a haña nan ku problema pa motibu di awa.

Temblor na Turkia a kousa 570 morto kaba
E kantidat di morto kousa pa un temblor na Turkia a subi bai 570. Asina outoridatnan turko ta bisa. Kasi 25 mil hende ta heridá For di e temblor di djadumingu último a saka 187 hende bibu for di bou di e ruinanan. Entre nan un mucha hòmber ku a haña ayera nochi despues ku el a pasa 100 ora derá bou di un edifisio di apartamento na e siudat Ercis. Ta suponé ku por tin sentenar, kisas miar, di hende bou di e ruinanan ainda.

Deporte: Futbòl
A posponé e wega entre dos klup di futbòl Argentino, esta San Lorenzo i All Boys pa un motibu remarkabel. Djárason despues di trein un fanátiko rabiá a ataká defensor di San Lorenzo Jonathan Bottinelli. Djei outoridatnan lokal a disidí ku no ta hunga futbòl djadumingu. Bònt di futbòl a laga sa ku nan a tuma nota di e desishon i ku nan ta konformá. Bottinelli a haña sla na kaminda pa kamber di troka paña. E hungadó tin idea di bandoná San Lorenzo, ku ta pasando den un temporada desapuntante.

Ekonomisashon èkstra pa Fransha
Fransha tin ku ekonomisá seis pa ocho miar euro èkstra. Asina presidente Sarkozy a bisa ayera nochi den un entrevista di televishon. Segun Sarkozy e ekonomisashonnan den su pais ta nesesario pasobra ta kalkulá kresementu ekonómiko di Fransha ta di un porshento. Sarkozy a papia tambe tokante ayudo di paisnan di euro pa Gresia. El a bisa ku e ta konfia ku e pais lo rekuperá di e krísis di debe ku e ta aden aworakí. Ademas el a bisa ku tabata un eror pa laga Gresia drenta zona di euro na aña 2001, pasobra e pais no tabata kla p’esaki niun ora so.

Pronóstiko di wer:
Solo ta bria, tin hopi nubia tambe i temperatura lo bira mas o ménos 16 grado. Mayan tin hopi nubia fini pero de bes en kuando solo lo bria. Lo keda seku i suave ku un temperatura di 16 grado