Boletin di notisia, 27 di yüli

Pèrdida grandi pa BP
E kompania di zeta BP pa promé be den 18 aña a sufri un pèrdida di kuartal. E pèrdida tabata 17 miar dòler. Kousa di e sifranan malu aki tabata e lèk den Golfo di Méhiko. E ganashi a disparsé kompletamente pa motibu di e fondo di 32 miar dòler ku BP a krea pa kubri e daño di e lèk di zeta. E kompania britániko ademas a konfirmá retiro di e funshonario haltu Hayward. Esaki a risibí hopi krítika na Merka, espesialmente pasobra el lo a supestima konsekuenshanan di e desaster di zeta. Hayward ta keda seka BP, ma e ta bai manehá un kompania hermana ruso di BP. Dia promé di òktober e merikano Bob Dudley lo remplas'é. Ta promé be ku un hende ku no ta britániko ta haña mando den BP.

Estado di emergensha na prizòn Bon Futuro
Den prizon Bon Futuro na Korsou a deklará estado di emergensha. Esaki ta pa por kontrolá miho ora drenta e prizòn. Asina e minister di hustisia antiano Jacoba a bisa. Ademas prezonan no por usa telefon mas ku 10 minut pa siman via un telefon públiko. Ya tin un aña ku ta trata di hasi e prizon mas seif ku plaka hulandes i personal hulandes, ma esaki no tabatin sufisiente resultado ainda. Kuminsamentu di e luna aki a arestá algun hende ku supuestamente a lanta un negoshi lukrativo den droga i telefon selular. Entre nan tabatin dos amtenar tambe. E estado di emergensha ta keda na vigor sigur te fin di desèmber.

Chavez ta manda mil militar èkstra bai frontera di Colombia
E presidente venezolano Chavez a manda un mil militar èkstra bai frontera di Colombia. Asina e kabes di guardia nashonal na Venezuela a laga sa djamars. Den wikènt Chaves a laga sa ku "nunka promé, den e último shen aña" no tabatin un chèns asina grandi riba un invashon militar na Venezuela, biniendo for di Colombia. Siman pasá Chavez a kibra tur relashon ku Colombia despues di akusashon ku tin rebelde colombiano na Venezuela. Durante e konferensha di OAS na Washington e embahador colombiano a mustra vidio, potrèt i mapa. For di esaki lo a sali ku Venezuela ta duna protekshon i alohamentu na mas o menos 1500 gueriero di e movemento iskierdista colombiano FARC. Gobièrnu di Chavez ta ninga e akusashonnan.

Dokumento sekreto merikano riba Wikileaks
Pentagon ta buskando e persona ku a lèk dokumentonan sekreto riba e website WikiLeaks. E website a pone sigur 90 mil dokumento tokante guera na Afganistan riba internet. Hopi insidente kaminda siudadano a muri nunka no a publiká. Pentagon ta bisa ku ta posibel ku nan mester di simannan largu pa investigá kon grandi e daño ta. Segun Kas Blanku e lèkmentu di informashon por ta peligroso pa militarnan merikano. Segun Pentagon mas lo sali na kla via WikiLeaks. Ta ilegal i peligroso pa lèk dokumento sekreto, Kas Blanku ta bisa, ounke hopi informashon tabata konosí kaba. Den e dokumentonan tin entre otro nòmbernan di hende ku ta koperá ku ehérsito, i informashon tokante operashonnan sekreto. Ademas a sali ku Taliban ta mas poderoso ku a kere i ku Afganistan a bira mas peligroso. E fundadó di Wikileaks a bisa ku pronto lo e publiká mas dokumento tokante guera na Afganistan.

Defensa na Den Haag no ta preokupá ku lekmentu di informashon tokante Afganistan
Ministerio di Defensa na Den Haag no ta preokupá ku e lèkmentu riba internet di dokumento sekreto tokante akshonnan merikano na Afganistan. Segun e ministerio no ta trata di akshon kaminda hulandesnan tabata involví. Tur akshon hulandes kaminda tabatin morto di siudadano a keda raportá mesora i investigá. Den e dokumentonan ku a lèk ta menta un akshon hulandes na aña 2007 kaminda a kai kuater morto i shete hende a keda heridá.

Kantidat di morto na Duisburg ta subi bai binti
E kantidat di morto den e drama di Love Parade djasabra na Duisburg Alemania a subi bai binti. Un muhe aleman a fayesé di su heridanan. E tabata un di e bishitantenan di e festival ku den e kaos i pániko a keda trapá of primí den un tùnel. Durante e festival sentenares di hende a keda heridá, sigur kuarenta ta den hòspital ainda. Na Alemania tin un diskushon grandi tokante ken ta responsabel. Organisadónan di evento grandi ta papia di amatorismo i ta bisa ku no ta un aksidente sino un krímen. Hustisia ta investigá e drama.

Peliger di asbest na Amsterdam Noord
Na Amsterdam Noord djaluna nochi a evakuá 32 apartamento. Esakinan ta keda dilanti di e apartamento kaminda djadumingu anochi tabatin un eksploshon di gas. Den e restonan di e apartamentu distruí a haña asbest. Ayeranochi a pone aparato pa midi si asbest a kai den e apartamentonan. Polis a pasa na porta djaluna anochi pa pidi e habitantenan pa sali. Munisipio di Amsterdam ta ferwagt ku den kurso di dia nan por bisa unda tin asbest. Si ta seif e habitantenan por bai kas bèk. Seka e eksploshon na Amsterdam Noord un hòmber a keda heridá gravemente. E ta den hòspital.

Polítiko di VVD Henk Vonhoff a fayesé
E polítiko di VVD Henk Vonhoff a fayesé. Den añanan sesenta i ochenta e tabata entre otro miembro di parlamento i pa dos aña e tabata sekretario di estado di kultura, rekreashon i trabou sosial bou di promé minister Biesheuvel. Despues e tabata alkalde di Utrecht seis aña, i komisario di lareina na Groningen pa diesseis aña. Despues di su karera polítiko el a keda aktivo pa VVD. Tres aña pasá el a intermediá den e konflikto entre VVD i Rita Verdonk, kende nan a saka for di frakshon pero ku tabata ninga di entregá su asiento. Último añanan Vonhoff tabata presidente di hurado di Diktado Grandi di Idioma Hulandes. Henk Vonhoff a fayesé djadumingu meinta despues di un enfermedat kortiku na edat di 79 aña.

Pronóstiko di wer na Hulanda
Mayoria luga solo ta bria pero awe merdia tin nubia ta bini for di west i pa anochi awaseru ta kuminsá kai na kosta. Awe merdia lo tin 22 grado na Wadden i 25 grado na Limburg. Awe nochi imardugá e awaseru lo bai mas banda di ost.