Ta duel Van Vollenhoven ku Wereldomroep ta stòp den Karibe

Meester Pieter van Vollenhoven ta lamentá ku Wereldomroep mester para transmishon pa islanan hulandes den Karibe. E ta yama e medida  un ‘kibukashon istóriko'. “Ta di importansha esenshal pa Wereldomroep keda ayá'', asina el a bisa. Despues di djaweps, 27 di sèptèmber 2012 Wereldomroep ta para su programashon destiná pa Sürnam i èks Antia, despues di hasi esaki 65 aña largu. Komo presidente di e komité Relashonnan di Reino, Van Vollenhoven a bati alarma prinsipio dje aña akí serka vários ministerio, relashoná ku desaparishon dje emisora den Karibe, ma e lucha no tabata kos ku por a gana, asina el a bisa.

Repartishon hustu di kartera ministerial pa VVD i PvdA
VVD i PvdA no ke un minister pa Imigrashon i Asuntu di Asilo mas den un gabinete nobo. E partidonan a akordá esei ku otro den e kòmbersashonnan pa formashon di gabinete. E minister spesial pa asuntunan di imigrashon tabata deseo kumplí den e anterior formashon pa Wilders su partido PVV, partner tolerante di gobernashon. Gerd Leers, èks alkalde di Maastricht tabatin e kartera ei. Ma awor VVD i PvdA ta bisa ku no tin lugá p'e puesto ei den e gabinete nobo na Hulanda. E negoshadónan ke keda ku 12 puesto di minister sí. Enbes di imigrashon, mester bin un minister nobo, sea pa Komèrsio eksterior òf pa Koperashon pa Desaroyo. Lo repartí e karteranan di forma hustu entre e dos partidonan ganadó di elekshon: seis pa VVD i seis pa PvdA.

Awor sí a arestá hefe di Google na Brazil
Na Brazil a arestá hefe di Google n'e pais ei. Ayera a dikta órdu di detenshonkontra dje. Sekshon di Google na Brazil ta ninga di kita dos vidio for di YouTube. Supuestamente nan ta ofendé un polítiko, ku ke bira alkalde djun siudat, parti zùitwèst di Brazil. Hustisia brazilero ta kleim ku e grabashonnan ta pugna ku regla vigente pa spòt den tempu di kampaña elektoral. Google ta doño di YouTube. E empresa spesialisá den servisio riba enternèt ta bisa ku e no ta para responsabel pa kontenido dje vidionan riba Youtube.

Ecuador ke duna Assange hopi aña di refugio
Si ta nesesario, Ecuador ta dispuesto na akohé Julian Assange, fundadó di WikiLeaks añanan largu na su embahada na Londen, asina Ricardo Patino, minister di Asuntunan Eksterior di Ecuador a bisa ayera den Asamblea General di Nashonnan Uní. Awe ta hasi shen dia ku Assange a drenta e embahada. El a buska refugio einan, pasó e tin miedu ku lo ekstradit'é pa Suesia. Aya a denunsi'é relashoná ku violashon seksual. Assange ta teme tambe ku unabes e yega Suesia, e pais lo ekstradit'é pa Merka, kaminda ta ward'é un kastigu pa revelashon di dokumento sekreto di estado.

Aresto El Taliban lider Los Zetas na Méhiko
Na Méhiko a arestá un dje kabesnan dje guera di droga atrobe. Ta trata di Ivan Velazquez, un dje dirigentenan di kartèl Los Zetas. Sa yam'é El Taliban tambe. Polis mehikanu a ofresé un rekompensa di 2.3 mion dòler pa tep ku kondusí na aresto di Velazquez. Polis ta kere ku detenshon dje baron di droga lo trese mas trankilidat den e guera di droga mehikanu. Ta konsiderá Los Zetas responsabel pa miles di morto.

Ta basta awor ku tribon blanku devorador
Wèst Oustralia ta bai kombatí tribon blanku. E mònsternan marítimo akí ku por bira seis meter largu i pisa 200 kilo, a ataká basta landadó i sùrfer último lunanan. Antes e tribonnan aki tabata ataká ún víktima pa aña, ma e aña akí ya nan a morde sinku hende mata. Si nan landa muchu pegá ku kosta, tin mag di mata nan. Promé tabatin mag di mata nan despues ku nan devorá hende, ma awor por hasi esei promé tambe, komo medida di prekoushon.

Buki nobo Harry Potter a subi merkado awe
E buki tan sperá di J.K Rowling, outor di e serie di Harry Potter mundialmente famá ta optenibel na libreria for di awemainta. Su título ta ‘The Casual Vacancy’. A hasi mas ku un mion di pedido p'e buki, siendo ku e kontenido tabata topsecret te awe. Algun korant britániko a lesa e obra kaba. Nan ta atvertí mucha chikí amante di Harry Potter i nan mayornan. Parse ku e buki ta hororoso i opseno. Ta bisa ku en todo kaso e no ta adekuado pa mucha lesa. E ta yen di esena ku sèks i droga. Por lesa por ehèmpel kon diler di droga djun prostituta ta reip yu muhé dje señora ei. Esnan ku ta kritiká e buki nobo di Harry Potter ta gaba deskripshon interesante di e diferente personalidatnan. Nan ta elogiá e mensahe sosial tambe.

Primisia Hyundai serie outo ku hidrógeno
Na dezèmber Hyundai ta kuminsá produsí mil outo ku tanki di kombustibel hidrógeno pa merkado oropeo. E fabrikante di outo surkoreano ta e promé empresa na mundu ku ta produsí serie di outo ku hidrógeno. Hyundai ta denominá 'fuel-cell-technology' komo toppriority i a base djesei e ke bira e fabrikante di outo ku mas konsiderashon pa medio ambiente na mundu tambe. Éksito di e tipo di outo akí ta dependé altamente dje kantidat di lugá kaminda por yena tanki ku hidrógeno.

Pronóstiko di tempu na Hulanda
Dia a manesé trankil, ma e ta bai kaba ku pal'i awaseru i tempestat. Temperatura ta 16 grado. Mañan ta seku i solo lo bria regularmente.