Boletin di notisia, 27 di desèmber

A mata turista hulandes na Paramaribo
Na Paramaribo a mata un turista hulandes. A ranka tas di e hòmber di 54 aña di edat i su kasá. Nan tabata na kaminda pa nan apartamentu di vakashon. E hòmber a trata di kué e tas bèk, pero esaki a faya. Djei e malhechor a kue un arma di kandela i tira e hòmber hulandes. El a muri mes ora. Amigu i konosí a akohí e kasá.

Èks presidente venezolano Pérez a fayesé
Na Miami èks presidente venezolano Carlos Andres Pérez a fayesé. Dos be e tabata presidente di Venezuela, na añanan setenta i di 1989 pa 1993. Den su promé término e tabata e forsa tras di nashonalisashon di e sektor di zeta, loke pa motibu di preisnan haltu di zeta e tempu ei, a sali ekonomia venezolano mashá di bon. Den su di dos término tabatin krísis ekonómiko i algun atento pa kometé gòlpi di estado. Na 1993 a fors'é di baha riba akusashon di korupshon i mal uso di poder. Último añanan regularmente e tabata buska publisidat ku krítika riba presidente Chavez, ku e tempu ei tabata un di esnan ku a kometé e gòlpi di estado. Carlos Andres Perez a bai sosegá na edat di 88 aña.

A haña seis hende sekuestrá morto na Méhiko
Den un pos den nort di Méhiko a haña e kurpanan sin bida di seis hende sekuestrá di un famia. Nan ta ruman hòmber i primu di otro. Tres luna pasá a sekuestra nan. Bishitante di un mina den e estado Chihuahua a haña nan kurpa den un pos. E víktimanan tabatin herida di tiru. Ta suponé ku morto di e seis rumannan i primunan ta relatá ku e lucha entre e bandanan di droga na Chihuahua. Diferente banda ke dominá e ruta lukrativo di kontrabanda di droga pa Estados Unidos. Na Ciudad Juarez so kaba, violensha di droga a kosta mas ku 3 mil bida e aña aki.

A lansa satelit di internet na Kazachstan
For di e base di lansamentu Baikonoer na Kazachstan ku éksito a lansa un satelit di internet. Ku e satelit akí un mion oropeano den areanan leu lo haña aseso na internet. Aki 4 luna e satelit mester kuminsá traha. A lans'é ku un rakèt Proton. Algun siman pasá e lansamentu di tres otro satelit ku un rakèt asina a faya. Pa motibu di mal kalkulashon di kombustibel nan a kai den Oséano Pasífiko.

Selebrashon na Turkia pasobra barku Mavi Marmara a regresá
Na Turkia miles di hende a selebrá ku e barku Mavi Marmara a bini bèk. Sentenar di blas a bai laira ora e barku a yega haf di Istanbul. Na luna di mèi komando israelí a subi e barku ora e tabata na kaminda den un konvoi di produkto di ayudo den faha di Gaza. Nuebe hende a pèrdè nan bida. E atake a kousa hopi tenshon entre Turkia i Israel. Minister di Asuntunan Eksterior di Turkia ke mehorá lasonan ku Israel pero e ke pa nan pidi despensa si pa e akshon riba e barku. Ma Israel no tin idea di pidi despensa.

Gran Bretaña ta keha nuebe terorista potenshal
Na Gran Bretaña ta keha nuebe di e diesdos hòmbernan ku a arestá pa preparashon di un atentado terorista. A laga tres bai. Ta akusá e nuebe otronan ku entre promé di òktober i 20 di novèmber nan ker a kousa un eksploshon. E hòmbernan akusá tin entre 19 i 28 aña di edat. Mayoria di nan ta britániko, tres ta bini di Bangladesh. No a divulgá nada tokante e blankunan eksakto ku nan tabatin na bista. Segun polis a intervení trempan. Ora a arestá nan, a bisa ku ta riba internet nan a studia e posibel blankunan.

Abogado di somalinan na Hulanda ta bisa ku AIVD ta pifia
E abogado di dos di e èks sospechosonan di terorismo ku a laga liber ayera na Hulanda, ke un investigashon di e manera di traha di AIVD, servisio di informashon i seguridat. Nan manera di traha parse pifiamentu, asina abogado Ruperti a bisa den e programa di radio Met het Oog op Morgen. E ta bai pidi e komishon di supervishon di servisionan di informashon tene un investigashon independiente. Ademas e ta preparando un prosedura di daño. A base di informashon di AIVD djabièrnè a arestá 12 Somali pasobra nan lo tabata preparando un atentado na Hulanda. Ayera a laga sinku di nan bai pasobra no tabatin prueba kontra nan. Un di e klientenan di Ruperti a bisa ku el a hui for di Somalia pasobra e tabatin miedu di un atentado di terorismo. Awe Ministerio Públiko ta disidí tokante e shete Somalinan ku ainda ta será.

Geert Wilders ta boga pa kombatí terorismo islamítiko fuertemente
Segun Geert Wilders mester kombatí terorismo islamítiko mas fuerte posibel. El a bisa esaki den un reakshon riba e arestashon di e somalinan sospechoso di teror. "Esaki ta mustra kon vulnerabel Hulanda i henter Oksidente liber ta pa e peliger di terorismo islamítiko. Ta nos libertat ta na peliger", segun Wilders. I si ke mantené e libertat aki segun e mester para "islamisashon di nos pais".

Papa di Roma a kondená e violensha na Nigeria di mòslem konta kristian
Papa di Roma a kondená e violensha na Nigeria di mòslem konta kristian. Awo atrobe tabatin disturbio entre kristian i mòslem, espesialmente rònt di e siudat Jos. Esaki ta keda riba frontera entre e parti suit ku ta kristian i e parti nort ku ta mòslem. E violensha a lanta Pasku anochi, ora ku den diferente pueblo tabatin atentado riba misa.

Wèlga na Kosta di Ivor kontra presidente Gbagbo
Awe ta wèlga na Kosta di Ivor kontra presidente Gbagbo. Su rival Ouattara a pidi un wèlga nashonal pa pone preshon riba presidente pa e baha. Luna pasá Ouattara a haña mayoria di voto den elekshon presidensial, pero Gbagbo ta ninga su derota pasobra lo tabatin froude. Komunidat internashonal tambe ta sigui pone mas i mas preshon riba dje. Lidernan di e paisnan wèst afrikano Benin, Siera Leone i Kabo Bèrdè mayan ke konvensé Gbagbo pa baha. Nan di ku ta su último chèns pa bai sin intervenshon militar.

Universidatnan na Maleisia lokashon ideal pa rekrutá terorista
Universidatnan na Maleisia a bira lokashon ideal pa ekstremistanan mòslem rekrutá hoben pa ret terorista. Asina ekspertonan di e pais asiatiko ta avisá awe. Último aña a aresta un kantidat di terorista strañero. Promé minister Muhiyiddin Yassin a yama esaki "un trend insaludabel ku por hasi daño na seguridat nashonal". Te awe mayoria di tempu Maleisia a keda liber di atake terorista.

Pronóstiko di wer
Kasi henter dia lo ta seku i nublá. Temperatura lo ta rònt sero.