Akuerdo di ekonomisashon
Tweede Kamer a konkluí e debate tokante ekonomisashonnan ayera'nochi mas lihé ku a spera. Un mayoria ta sostené e pakete ku VVD, CDA, D66, GroenLinks i ChristenUnie a bai diakuerdo kuné despues di dos dia di negosashonnan intensivo. Promé minister Rutte a reakshoná masha kontentu durante e debate riba e akuerdo. El a elogiá minister De Jager di finansa i e sinku lidernan di frakshon envolví. PvdA i SP a krítika e palabrashonnan pisá. Segun e partidonan aki no ta repartí e karga honesto.  E èks partner tolerante PVV a bisa ku partidonan a kore hinka un pakete den otro ku ta mishi ku posishon di tur hende. E akuerdo ta enserá entre otro ku edat pa baha ku penshun ta subí entrante otro aña kaba ku un luna. Amtenarnan no ta haña mas salario, ta suavisá lei di retiru i akseins riba alkohòl i tabako ta subí. Awor ku Tweede Kamer a aprobá e pakete di ekonomisashon, minister De Jager por manda e plannan pa Komishon oropeo na Bruselas. Djaluna 30 di aprel e término pa entrega e plannan ta kaduká.

Sindikatonan no ta satisfecho
Sindikatonan no a reakshoná positivo riba e akuerdo. Segun presidente Jongerius di FNV e koalishon insidental aki ta ekonomisá kibra Hulanda den un dia i mei. Di e manera akí e konfiansa di suidadanonan den ekonomia i polítika ta sak te bou di sero, asina Jongerius ta bisa. Presidente Smit di CNV ta haña ku partidonan a hasi hopi bon trabou pa na yega na un akuerdo bou di un preshon asina haltu. Pero Smit no ta masha kontentu si ku a adelantá hisamentu di edat pa baha ku penshun. E medida aki ta bai kontra di e akuerdo di penshun ku partnernan soshal a kumbiní anteriormente. Doñonan di trabou ta kontentu. Nan ta haña ku e sinku partidonan a " hinka un pakete den otro ku ta demonstrá korahe i e pakete aki ta bon pa nos pais."

Imáhenan di tiramentu di Osama ta keda sekreto
E potrèt i vidionan saká ora a tira Osama Bin Laden mata ta keda prohibí pa publikashon. Asina un wes federal merikano a stipulá. Un organisashon a entamá un kaso kontra e servisio di inteligensha CIA i ministerio di defensa. Ta eksaktamente un aña pasa ku militarnan merikano a mata lider di Al Qaida Bin Laden. Di e momentunan aki nan a saka potrèt i graba vidio, pereo segun presidente Obama e imáhenan ta muchu kruel pa publiká.

Vigilante di bario a kolekta sèn pa su defensa
E vigilante di bario na Florida ku a tira e tinedger kolo skur Trayvon Martin mata, a kolektá 200 mil dòler via ínternèt pa su defensa. Siman pasa e vigilante di bario a haña su libertat bou di fiyansa. E ta bisa ku el a tira pa defendé su mes. Segun komunidat di hende di koló tabata un asesinato rasista. Morto di Trayvon Martin, ku no tabata armá a okashoná hopi komoshon na Estados Unidos, prinsipalmente pasó polis di Florida den promé instante no kera detené e vigilante di bario.

Siria no ta kumpliendo ku e akuerdo di pas
Sekretario General di Nashonnan Uní Ban Ki-moon ta bisa ku gobièrnu di Siria no ta tene su mes na e palabrashonnan di pas. Segun e no a retirá ni trupa ni ármanan pisa for di suidatnan. Ofishalmente tin un armistisio na Siria ku mester pone un fin na un periodó di 13 luna di violensha, pero ahinda ta violá e armistisio aki. A kumbiní un plan di pas despues di negosashonnan bou di liderasko di e enviadó internashonal Kofi Annan. Ban Ki-moon ta eksiguí di Siria pa kumplí mas pronto posibel ku e palabrashonnan.

Na estado di nuebe yu
Un muhé na Méhiko ta na estado di nuebe yu. Asina medianan lokal ta indormá. E muhé, su edat o ta konosi, a sali na estado despues di un tratamentu di vertilidat i e lo duna lus den kareda di 20 di mei. Si tur nuebe yu nase na bida e señora lo ta e promé muhé na mundu ku ta duna lus na nuebe yu. Tin algun okteto si na bida.

Klink no ke bira lider di CDA
Eks minister Ab Klink no ta disponible pa bira lider di CDA. E ta haña minister De jager di Finansaun kandidato súmamente bon pa e funshon akí. De Jager a duna di konose diferente be kaba ku e no ke bira lider di partido, pero segun Klink pa loke ta trata su 'personalidat, integridat i su manera di aktuá",  e ta un kandidato ideal. Si De Jager no bira lider di partido mester bin un generashon nobo pa guiá partido, segun Klink. E èks minister di salubridat a sali for di parlamentu na sèptèmber 2010 despues di un krisis den frakshon di CDA tokante koperashon ku PVV. Klink tabata kontra e kopeashon aki.

Kastigu di prizon pa ofrese yu pa sèks
Tata di un yu muhé di 8 aña ku a ofresé su yu riba ínternèt~pa sèks a haña 2 aña i mei kastigu di prizòn. Seis luna ta kondishonal. E hòmber di 46 aña di Hardinxveld-Giessiendam huntu ku su kasa a ofrese nan yu muhé pa sèks pasó nan tabtin mester di plaka.

Willem-Alexander 45 aña
Prinsipe Willem Alexander ta kumpli awe 45 aña. E ta selebra su aña den seno familiar huntu ku prinsesa Máxima i nan tres yunan, Amalia, Alexia i Ariane. Djaluna Willem-Alexander ta selebrá dia di lareina na Rhenen i Veenendaal.

Pronostiko di tempu:
Awe mainta den parti wèst di pais solo ta briya. Awemèrdia tin mas nubia pero na hopi luga ta keda seku si. E emperatura ta mas o menso 16 gado.