Boletin di notisia, 13or

'Loveparade' a para bira 'deadparade'
Sigur 19 persona a pèrdè nan bida djasabra durante 'Loveparade' o sea 'parada di amor' na Duisburg, Alemania. 342 bishitante a keda heridá. Mas ku 1.4 mion persona a bishitá e suidat aleman pa partisipá na e fiesta di músika 'dance'. Final di mèrdia konmoshon a surgi den e tùnel entre e stashon i e úniko entrada di e festival. Lo ta'tin demasiado interes pa e festival e aña aki. Medionan di komunikashon aleman ta raportá ku por akapará solamente 500.000 persona riba e tereno kaminda a tene e festival. Pero dòbel di e kantidat ei tabata presente. Sigun testigunan algun bishitante a alertá ku un ke otro lo bai robes. Pero polis a ignorá esei i ora nan ta ke a sera e tereno pasombra e tabata yen, kos a sali for di man. Bishitantenan di e evnto lo a buska otro manera pa drenta e festival i lo a pusha hende for di trapi. E ora ei a disidí di para 'Love Parade'. Un di e víktimanan ta un hulandes bibá na Zwolle. Organisador di e festival a anunsiá ku nunka mas lo tin un 'Parada di Amor'.

Trein na Friesland ta penetrá den pakus
Pegá ku stashon di trein Stavoren na Friesland, un trein a kore drenta un pakus. Ta'tin 4 persona den kabina di trein. Dos a keda levemente heridá, un di nan ta e mashinista. Mas o menos mitar di 12 di anochi, e trein di mantenshon ku shete wagòn a kore dal kontra un tanki di disel ku tabata bashí. E trein di mantenshon a pusha e tanki bora un buraku di 30 meter den un pakus, ku ta bende artíkulonan di deporte marítimo. Despues di 100 meter e trein i e tanki di disel, a bai resultá riba un plenchi. Polis ta bisa ku ta un desaster na stashon di Stavoren. No ta konosí dikon e mashinista a pèrdè kontrol riba e trein. A hib'é hòspital.

Hayward ta haña hopi plaka serka BP si e tuma retiro.
Hayward, funshonario haltu di BP, ta haña mas ku 14 mion di euro si e tuma retiro. E korant britániko The Times a tende esei di bon fuente. Delaster lunanan Hayward lo a bira un ehèmpel típiko di ignoransia komo mènedjer di krisis di BP. Su tarea tabata pa guia e tim ku tin ku kombatí e desaster di petroli den Golfo di Mèksiko. Hopi kos a faya i segun krítikonan esei ta pasó Hayward a supestimá e katástrofe. Supuestamente BP lo konfirmá su retiro awe.

A laga prizonero liber na Mèksiko pa kometé asesinato
Na parti nort di Mèksiko a laga prizoneronan liber pa nan kometé asesinato. Esei lo a sosodé riba enkargo di un kabes di kartèl di droga. Ministerio públiko mèksikano ta bisa ku wardadónan di prizòn Gomes Palacios ta duna e malechornan arma i vehíkulo pa asina nan por kometé e delitonan. Despues nan ta bolbe prizòn manera nada no a pasa. E skandal a sali na kla despues di un homisidio na Torréon. 17 persona a fayese siman pasá na momentu ku a tira riba nan na un fiesta di añ'. Na e sitio a haña bala di arma ku bewakernan di prizòn Gomez Palacios ta uza. A arestá direktor di e instituto penitensiario i dos otro persona. Mas ku 25.000 mèksikano a pèrdè nan bida den e guera di droga ku ta durando 4 aña kaba na e pais.

Ekonomia merikano lo no kai atrobe den un reseshon
Ekonomia merikano lo no kai atrobe den un reseshon. Esei minister di finansas merikano Geithner a deklará. Segun Geithner ekonomia merikano lo drecha poko poko durante próksimo dos aña. El a alertá ku ta nesesario kambia sistema di betaha di belasten pa esnan riku. Di e manera ei ta mustra ku ta trahando seriamente pa baha debe. Ta trata di merikanonan ku ta gana mas ku 250.000 dòler pa aña i ku ta probechá di e medidanan di belasten ku èks presidente Bush a instituí. No sa si Kongreso ta bai di akuerdo ku paro di e bentaha fiskal. E republikánonan ta kontra i opinion di e demókratanan ta dividí.

Giovanni van Bronckhorst a tuma despedida komo hungadó di bala
Giovanni van Bronckhorst a tuma despedida komo futbolista profeshonal den stadion De Kuip na Rotterdam. Durante e wega amistoso entre Feyenoord i Real Mallorca a kambia Van Bronckhorst den háftaim. El a kana rònt stadion pa gradisí i yama ayó, durante un kaminata di honor den e stadion. Giovanni van Bronckhorst a hunga su promé wega na 1993 den ekipo di Feyenoord kontra FC Barcelona. Na 1998 el a bai hunga pa ekiponan internashonal manera Glasgow Rangers, Arsenal i FC Barcelona. Tres aña pasá el a bolbe Rotterdam. Van Bronckhorst a hunga 106 biaha den selekshon nashonal di Hulanda. Na mundial di futbòl na Sur Afrika el a enkabesá selekshon hulandes.

Contador a gana 'Tour de France'
Alberto Contador, siklista spañó a sali ganador di 'Tour de France' pa di tres biá konsekutivo. Durante e delaster etapa dje kareda na Paris, tabata opvio ku nada no por a stroba Contador di keda ku e kamisa hel. Andy Schleck, siklista Luksemburgues, tabata 39 sekònde mas poko poko kune. Di e manera ei el a sali na di dos puesto. Denis Mentsjov, siklista hulandes di grupo Rabobank, a terminá na di tres lugá.

Oro i plata pa Antia na CAC Games
Fin di siman ku ta tras di lomba Antia hulandes a gana oro i plata na Central American and Caribbean Games na Puerto Rico. Atleta Churandy Martina a prolongá su título di 2006 riba 100 meter. El a gana ku un tempu di 10 i shete sentésimo sekònde. Djasabra Marisca Verspaget a gana plata ku karate. Durante final el a pèrdè den kategoria te ku 61 kilo di su atversario Sulin Garro di Costa Rica.

Wer na Hulanda:
Ta nublá i awaseru ta kai. Tambe tin chèns di maltempu. Mas lat den dia ta bira seku na parti nort wèst di Hulanda. Temperatura ta 20 grado.