Defendé kurpa i propiedat riba kustia di ladron

Partido PvdA ta di akuerdo ku sekretario di estado Teeven di Hustisia ku hende tin derechi di defendé nan kurpa i nan propiedat i ku por uza violensha ora hasi esei. Ma PvdA no ke responsabilisá e término 'ta ladron su asuntu òf ta ladron mes por ke' sí. Sekretario di estado Teeven, miembro di VVD a bisa ku e ladron ku a muri na Diessen despues dje pelea ku habitante mes a buska pa su kurpa. SP, D66 i GroenLinks ta kunsumí yùist k'e mandatario. Konseho di Hurisdikshon ta enfatisá ku polítikonan no mester mete ku e pregunta di kulpabilidat. E Konseho ta haña ku ekspreshonnan di polítikonan no ta influenshá outoridat di wes, ma ku nan ta mina aseptashon di komunidat sí di dikshon di wes.

Spies ta kere ku situashon Kòrsou ta sigui alarmante
Kétubai minister Liesbeth Spies di Relashonnan di Reino ta di opinion k'e situashon na Kòrsou ta alarmante. E ta mustra sí rib'e echo ku gabinete tin ku someté su mes na desishonnan ku a tuma demokrátikamente den parlamentu. No ta keda Gobernador otro kos tampoko sino di kumpli ku loke un mayoria den Staten a disidí, segun Spies. E minister a bisa anteriormente ku e ta spera ku por solushoná e impase na Kòrsou rápidamente. E mandatario ta haña ku gobernador a tuma e pasonan korekto ku ta kontribuí n'un solushon i ku por pone e proseso demokrátiko kana atrobe. Ayera minister presidènt demishonario Schotte a duna di konosé ku e no ta koperá ku un gabinete interino. Gobernador Goedgedrag a apuntá un formadó pa forma un gabinete interino ku tin ku atendé ku asuntunan pendiente te elekshon di 19 di òktober.

Sierto remedi no ta bai ku tratamentu kanser
Kasi mitar dje pashèntnan ku kanser ta guli remedi sin sa ku nan por ta nosivo pa e trata mentu ku ta duna nan. Un investigashon ku diferente hòspital hulandes a kolaborá kuné ta demostrá esaki. Ta remedinan ku ta baha efekto di medikamentu kontra kanser, òf ku ta empeorá efektonan sekundario. Ta trata entre otro di píldoranan pa drumi, pa baha zür di stoma, pa kombatí depreshon i pa hawa sanger di hende. Próksimo fin di siman lo presentá e resultadonan n'un kongreso oropeo tokante kanser.

Rebelde ta papia di morto ma gobièrnu sirio nò
Insurgentenan sirio ta bisa ku ta nán a kometé e atentadonan na hefatura di ehérsito, na kapital Damasko. Aya a surgi dos eksploshon den oranan di mardugá. E rebeldenan ta bisa ku a mata mas ku 10 hende, pero gobièrnu sirio ta kleim ku ta daño material so tin. Un periodista di un emisora di televishon iraní a peresé na momento ku e tabata relatando e suseso. Su kolega a keda gravemente heridá. Frankotiradónan a tira e reporteronan mata.

Van Miltenburg presidente nobo parlamentu hulandes
A eligí Anouchka van Miltenburg di VVD komo presidente nobo di Tweede Kamer, o sea parlamentu hulandes. Den e di tres tanda el a risibí 90 voto, mientras ku Khadija Arib di PvdA a risibí 56. Parlamentario Gerard Schouw di D66 a kai afó den e tanda anterior. Van Miltenburg tin kasi 10 aña den parlamentu hulandes. E tabata enkargá ku entre otro media, étika médiko i emansipashon di homonan. Último dos aña e tabata vise presidente di frakshon di VVD. Van Miltenburg ta sigui èks presidente di parlamentu Gerdi Verbeet di PvdA.

Matamentu na entiero di narkotrafikante na Méhiko
Na un entiero na Méhiko a tira por lo menos nuebe hende mata i a heridá 21. Tabatin hopi mucha entre e víktimanan. Un mucha muhé di 6 aña a muri i kuater otro a keda heridá. E tiroteo a tuma lugá na Torreón, parti nortost di Méhiko, kaminda bandanan di narkotrafikante ta hibando un lucha sangriente basta aña kaba. Durante e seremonia funerario a dera un presunto kriminal di droga, ku a tira mata den su outo siman pasá djasabra. Hòmbernan armá a kuminsá tira rib'e hendenan na ròu. Algun hende a tira bèk. Despues dje tiroteo, polis mehikano a deskubrí arma di kandela skondí mèimèi dje tumbanan.

Wes ke pa detené hefe desobediente Google Brazil
Un wes brazilero a dikta órden di detenshon pa hefe di Google na Brazil. E empresa gigante ku ta yuda usuario buska informashon digital, ta ninga di kita dos vidio di YouTube for di énternèt. Den e vidionan ta kritiká un kandidato alkalde anto ta sugerí ku e polítiko a fòrsa su amante pa kometé abòrtes. Siman pasá outoridatnan brazilero a duna Google òrdu pa kita e grabashonnan, komo ku nan ta violá regla elektoral. Ma Google ta bisa ku kontenido di su kanalnan digital no ta su responsabilidat. E empresa internashonal lo apelá e aresto ku wes a dekretá pa e hefe na Brazil.

Ultraderechistanan ta stroba seremonia pa Mandela
Miembronan di Voorpost, un organisashon ultra derechista, a stroba develashon di un estátua di Nelson Mandela na Den Haag. Polis a detené kuater hòmber i a duna nan prosèsfèrbal. Obispu surafrikano Desmond Tutu a develá e estátua. E aktivistanan a kuminsá grita i tira kos durante e seremonia.

Malema dilanti wes pa krítika kontra Zuma Suráfrika
Awe Julius Malema, un polítiko kontrovershal na Suráfrika, ta komparesé dilanti wes ya ku ta akus'é di korusphon. Su simpatisantenan ta bisa ku ta pa motibunan polítiko a denunsiá Malema. Polis surafrikano ta tene kuenta ku manifestashonnan masivo. A disidí di sera kaminda alrededor dje tribunal na siudat Polokwane. Na aprel dje aña akí a saka Malema di 31 aña di edat for di partido gobernante ANC. A reproch'é entre otro di ta kibra union den seno di ANC. Ta konsiderá Malema komo e politíko mas prominente ku ta kritiká Jacob Zuma, presidente di Suráfrika.

Ta kanta e di tres wèlga general na Gresia
Atrobe ta kanta wèlga general na Gresia. E dos sindikatonan mas grandi a hasi un yamamentu na trahadónan di kasi tur sektor pa pone trabou abou komo protesta kontra e medidanan di ousteridat di gobièrnu. Banko i pòstkantornan ta keda será i transporte públiko a paralisá kasi por kompleto. Ta trata dje di tres wèlga general dje aña akí na Gresia.

Inundashon i evakuashon na Gran Bretaña
Mester a evakuá sentenares di hende na Gran Bretaña debí na inundashon, ku mal tempu a okashoná. Na algun lugá a kai mes tantu awa ayera ku e promedio di henter un luna. E fluho di awa a asotá sobretodo parti nortost di Inglatera. Dos riu ta serk'i desbordá. A evakuá desenas di ansiano ya ku awa a yena nan kas te na altura di un meter. Sentenares di outomobilista a keda malpegá riba outopista ingles den nortwèst, pasó nivel di awa riba kaminda tabata subiendo mas i mas.

Pronóstiko di tempu na Hulanda
Ta seku na mayoria lugá, tempertura ta 16 grado. Maña solo ta bria, ma atardi awa ta kai. Temperatura ta 16 grado.