Boletin di notisia, 25 di ougùstùs

OTAN ta yuda insurgentenan na Libia
Insurgentenan na Libia último dianan a haña ayudo di trupanan na tera di algun pais di OTAN. Asina un funshonario di OTAN a bisa CNN. Segun e, komandonan di entre otro Fransha i Gran Bretaña a yuda trein insurgente ku rekomendashon i informashon. Esaki lo a sosodé espesialmente último dianan, ora e insurgentenan den purá a ranka bai Tripoli. For di mart OTAN ta mantené e prohibishon pa bula riba Libia i ta vigilá na e embargo di arma.

Boneiru oranan largu sin koriente
Ayera un konflikto entre produsente di energia EcoPower i kompania di distribushon WEB a pone Boneiru keda sin koriente oranan largu. Gezaghebber Glenn Thodé a tuma mando na EcoPower pasobra segun e, e asuntu tabata toka interes general. Despues koriente a bini bèk. Sentro di e konflikto ta e tarifanan ku EcoPower ta kobra WEB. WEB no ta paga promé ku nan a kontrolá e resibunan rigurosamente. EcoPower a menasá mas be kaba di para entrega di koriente si no paga na tempu. Ayera e kompania su kana a yena.

Komishon Rosenmöller lo investigá Sint Maarten tambe
E komishon di investigashon bou di guia di Paul Rosenmüller ta bai investigá kalidat i integridat di gobernashon na Sint Maarten tambe. Segun e èks parlamentario, minister Piet Hein Donner di Relashonnan den Reino a formulá e enkargo di investigashon ámpliamente. Atenshon no ta bai solamente pa integridat di gobernashon i Banko Sentral, sino tambe pa tur instituto públiko na Kòrsou i Sint Maarten. Segun media lokal gobièrnu di Kòrsou den un karta na minister Donner a laga sa ku nan lo no koperá ku e investigashon. E komishon ta ferwagt di bini ku resultado na òktober.

Potrèt nobo di turista ku a pèrdè na Aruba
Na Aruba a publiká mas potrèt di e dama merikanu ku a pèrdè tres siman pasá. Ministerio Públiko ta spera di haña informashon di posibel testigu. A saka e potrètnan e dia ku e dama a disparsé. Por mir'é huntu ku su kompañero merikano riba kámara di seguridat, entre otro na un restorant. Kuminsamentu di e luna aki e turista a disparsé ora el a bai snòrkel ku su kompañero. E kompañero ta será komo sospechoso, pero e ta nenga di ta envolví den e desaparishon. Anteriormente Ministerio Públiko di Aruba a duna potrèt kaba di e turista, ma esaki no a resultá den tep ku a sirbi.

Forsa di orkan Irene ta oumentando
Aktualmente orkan Irene ta pasa riba islanan Bahama. E orkan di kategoria 3 tin velosidat di bientu di shenti ochenti sinku kilometer pa ora i por trese te ku 300 milimeter di áwaseru. Ta ferwagt ku Irene lo krese bira kategoria 4 promé ku e yega kosta merikano. Ekspertonan di wer ta ferwagt ku e orkan lo yega tera na North Carolina i pasa kosta ost bai ariba.

Probablemente lo no anunsiá mas ekonomisashon riba Prinsjesdag
Minister De Jager di Finansa no ta ferwagt ku riba Prinsjesdag gabinete hulandes lo anunsiá mas ekonomisashon riba e 18 miar euro ku a palabrá kaba den e akuerdo di gobièrnu. E simannan aki gabinete ta papia tokante presupuesto pa otro aña i De Jager ta kere ku djabièrnè nan lo keda kla. Segun e minister, situashon ekonómiko sigur sigur lo tin efekto riba presupuesto. Komo ku gobièrnu tin ménos entrada, i algun gastu tin chèns di subi, mester tuma medida, asina e ta bisa. Pero segun De Jager probablemente lo no ta nesesario pa ekonomisá èkstra.

Steve Jobs a baha komo kabes di kompania Apple
Steve Jobs a stòp ku su trabou komo kabes di e kompania Apple. Asina e ta skibi den un deklarashon di prensa. Jobs di 56 aña di edat basta tempu ta sufri kebrante di salú. E ta skibi ku e no por kumpli mas ku su tareanan. Tim Cook ta siguié; Cook tabatin maneho diario kaba for di yanüari ora Jobs a retirá pa motibu di salú. Steve Jobs lo keda seka Apple sí komo presidente di Konseho di Maneho. Meimei di añanan setenta Jobs tabata un di esnan ku a lanta Apple, pero despues di dies aña mester a retirá pa motibu di un guera. Na 1996 el a bini bèk i a hasi Apple un di e kompanianan di mas grandi di Merka.

Pronóstiko di wer na Hulanda
Promé tin niebla, despues tur kaminda solo ta bria. Awe tardi den parti ost tin áwaseru pisá i mal tempu. Temperatura lo ta entre 21 i 25 grado.