Joran ta keda Perú pa kumpli ku kondena

Joran van der Sloot ta sigui sinta su 28 añanan den prizòn gewon na Perú, asina minister di Hustisia peruano a bisa enfátikamente awé den deklarashon pa media lokal. Na yanüari a sentensiá Van der Sloot pa asesinato dje damita peruano Stephany Flores Ramírez. E minister a reakshoná riba informe, kaminda a bisa ku kisas lo pasa Van der Sloot pa Hustisia merikanu, ku a pidi pa ekstradit'é en konekshon ku froude i ekstorshon di mama di Natalee Holloway, e mucha muhé merikanu k'a pèrdè na Aruba na 2005. Nunka no a haña su kurpa. Van der Sloot a primintí mama dje mucha ku lo e bisa unda e kurpa ta, te dia djawe. Si Perú reakshoná positivamente riba e petishon di Merka, lo hiba Van der Sloot Estados Unidos pa e presensiá veredikto di su proseso n'e pais. Despues e tin di regresá su sèl den prizòn na Perú, asina e mandatario peruano a splika.

Rakèt pakistani ku alkanse di 3000 kilometer
Pakistan a lansa un rakèt eksitosamente. Ta trata djun proyektil ku ta kapas di transportá karga nuklear. E lansamentu pakistani a tuma lugá ménos ku un siman despues djun prueba similar na pais bisiña India. Ekspertonan ta bisa ku e rakèt tin un alkanse di 3000 kilometer. Esun ku India a tèst siman pasá por kubri un distansha di 5000 kilometer. Teorétikamente e por alkansá siudatnan na China i Oropa. Servisionan di informashon merikanu ta kalkulá ku Pakistan ta disponé di 90 te 110 arma nuklear. E arsenal di arma, ku ta kresiendo mas rápido na mundu ta esun di Pakistan, segun e merikanunan.

Breivik ta haña ku sikiaternan ta gañadó
Anders Breivik a bisa dilanti tribunal di Oslo, ku e sikiaternan ku ta kere ku e no ta moralmente responsabel i kapas a inventá prueba den su kontra. Breivik a bisa ku ochenta porshento dje investigashon ta konsistí di mentira. E ta kere ku e sikiaternan no tin eksperiensha ku estrimista polítiko i ku nan mes tambe a keda morto spantá despues dje atentadonan. E sikiaternan a skibi ku e norwechi ta sufri di skisofrenia paranóiko i di sikósis. Breivik no ke pa deklar'é morlamente inkapas, ya ku e ta haña ku mester tuma su ideanan di islam na serio. Na yüli di aña pasá Anders Breivik a mata 77 hende na Oslo i na Utoya, mayoria víktima tabata mucha yòn sosialista.

Romney a bolbe gana preelekshon republikano
Na Estados Unidos Mitt Romney a gana elekshon preliminar republikano na sinku estado den nortost dje pais. Den un diskurso tabata manera kos k'el a kleim kandidatura. El a gradisí elektorado p'e responsabilidat eksepshonal ku nan ta konsed'é. "Huntu nos por gana na novèmber", asina Romney a bisa. Ofishalmente no a eligi'é ainda komo kandidato republikano, ma kasi sigur lo nomin'é. Su avanse ta muchu mas k'esun di su kontrinkantenan, manera Rick Santorum, su rival mas importante, ku a lébumai kontienda elektoral fe dos siman pasá.

Detenshon sospechoso desaster BP den Golfo
Na Merka a gara èks ingeniero di kompania petrolero BP. Supuestamente el a destruí material di prueba dje desaster di zeta den Golfo di Méhiko. El a delete sentenares di SMS, konteniendo informashon ku ta demostrá, ku BP tabata na altura di magnitut dje lèk di zeta muchu mas promé. Ta trata dje promé aresto den e investigashon. N'e desgrasia di 2010, band'i 750 mion liter di zeta a bai resultá den Golfo di Méhiko, despues djun eksploshon riba un plataforma di bor petroli. Presidente Obama a yam'é "e desaster ambiental mas serio den istoria merikanu".

Situashon Siria ainda inaseptabel segun Annan
Kofi Annan, enviado di Nashonnan Uní pa Siria a deklará pa Konseho di Seguridat, ku situashon n'e pais na Medio Oriente ta sigui inaseptabel. El a konta di eksperienshanan dje opservadornan, ku tin ku vigilá e armistisio ku a drenta na vigor e luna akí. Annan a ekspresá indignashon, sobretodo k'e situashon na Hama. Djaluna pasá ehérsito lo a mata desenas di hende n'e siudat sirio, siendo ku un paro di tiramentu ta na vigor. Konseho di Seguridat di Nashonnan Uní ta spera ku e kantidat di opservadó na Siria ta oumentá di 30 bira 100.

Surkoreanonan a para benta di karni merikanu
Dos empresa di produkto alimentisio na Sur Korea a stòp ku benta di karni di baka merikanu despues k'a diskubrí un kaso di BSE, o sea enfermedat di baka loko na California. Ayera outoridatnan merikanu a raportá e promé kaso di BSE despues di seis aña. A bisa tambe ku karni kontaminá no a bai resultá den e kadena alimentisio. Bosero di un dje kadenanan di benta surkoreano, ku 95 nogoshi afiliá, a para benta di karni di baka merikanu debí n'e prekupashon serka nan klientela.

Reseshon ekonómiko atrobe na Gran Bretaña
Ekonomia britániko a bolbe krem den e promé kuartal dje aña akí, asina ofisina di estadístika britániko ta informá, basá riba e promé kálkulo. Ekonomia di Gran Bretaña a baha ku 0.2 porshento kompará ku e kuartal anterior, siendo ku ekonomistanan a pronostiká un kresementu di 0.1 porshento. Debí n'e di dos kuartal konsekutivo ku ekonomia ta krem, por bolbe papia djun reseshon ekonómiko na Gran Bretaña. Banko Sentral britániko a atvertí un biá kaba kontra mas reseso den e kuartal akí.

De Jager den kòmbersashon ku partidonan
Minister De Jager ta papia henter dia awé ku parlamentarionan pa wak si tin un manera pa sali for dje impase pa kuent'e ekonomisashonnan. El a papia tambe tras di kòrtina ku partido sosialista SP i despues ku GroenLinks, D66 i Christenunie, esta ku tur tres pareu. Fin dje luna akí gabinete mester raportá na Komishon oropeo kon e ta kere di redusí e défisit presupuestario. Pero den Tweede Kamer a surgi diferensha grandi di opinion, relashoná ku e forma ku esei tin di sosodé. De Jager a bisa ku loke el a hasi mas bien te awor ta, skucha deseonan dje frakshonnann i ku no a negoshá. Lider di D66, Alexander Pechtold a bisa ku awor ku De Jager a papia ku e partidonan, tin mas espasio pa sigui kòmbersá, ma el a enfatisá sí ku "n'por kore regla un kos, ku no por a solushoná den shete siman, den shete ora awó".

Deporte-futbòl oropeo
Chelsea a alkansá final di Champions League, a kosto di Barça, ganadó di biá pasá. Na Spaña skor a bira 2 pa 2, sufisiente p'e ekipo di Londen, despues dje viktoria di 1 pa 0 di siman pasá. Na promé instante situashon no tabata mashá favorabel p'e inglesnan, ora ku Barcelona a skor dos gol i Chelsea mester a sigui ku 10 hungadó so, pa motibu di karchi kòrá pa Terry. Ma fe promé ku entremedio, Ramirez di Chelsea a hinka gol anto despues ku wega a sigui, Torres a skor pa Chelsea, empatando ku 2 pa 2 den tempu di leshon. Un avalancha di komentario a subi Twitter. Mayoria tweetdó a husga ku Chelsea no a meresé di gana ku e manera k'a hunga. Awenochi ta anunsiá ken lo bira kontrinkante di Chelsea: Real Madrid i Bayern München ta enfrentá otro.

Pronóstiko di tempu na Hulanda
Wer ta serando mas i mas i awa ta kuminsá kai kuminsando na zùitwèst. Bientu ta lanta atrobe i temperatura ta alrededor di 13 grado. Mañan wer ta blo kambia, temperatura máksimo ta entre 14 i 17 grado.